مدونة هيا أدون ، اكتب و اُصور

بعض اشياء و بداية قوية لـ ٢٠١٩

بسم الله الرحمن الرحيم





ثلاث شهور من بدأت السنة الجديدة
واعترف كانت بداية قوية .. صعبة بنفس الوقت 

اقدر اقول انها كنت فترة المحك .. تغيرت فيها فعلياً 
منظوري للأشياء
نظرتي
تصرفاتي
بعض الاطباع اللي احرص اني اطورها لانها متعبة 
كانت هالثلاث شهور و تحديداً شهر فبراير عنق الزجاجة
عصرني عصر
لدرجة فكرت اني قاعدة أمر في ازمة منتصف العمر

النتيجة ، حالياً افضل بكثير 
جلسات مع النفس كانت كافية لرؤية الوضع و تقييمه من الخارج
مع اشياء عملتها من ناحية الاهتمام بالذات ، جسدياً ، عقلياً و نفسياً


بالنسبة للـ الڤيتامينات والمكملات العذائية ، انا مو من محبينها بسبب اني جربت كذا نوع وبعضها أربك لي معدتي و بعضها سوا لي مشاكل في بشرتي أو جابلي كتمة وضيقة!

من فترة حول ٣ شهور قلت خليني اهتم زيادة بنفسي لاني لاحظت تقلب حاد في المزاج ومعدل التوتر عندي مرتفع 

واقترحت من راسي اخذ حبوب الفوليك اللي بجرعة ١ ملجم ، وقريت ان فيها مكونات تساعد على الرواق و حتى زيادتها راح يخرجها الجسم من غير اي مشاكل

مو مثل ڤيتامين دال مثلاً اللي زيادته تترسب في داخل الجسم وتسوي مشاكل كبيرة

الشهر اللي فات لاحظت مافيه اي تحسن قاعد يصير و صار الاكتئاب وتقلب المزاج الحاد روتين و دوامة !!
هنا قلت خلاص لازم افحص واسوي تحاليل !

رحت قبل اسبوعين وعملت التحاليل 
طلبت تحليل لفيتامين بي و كمان ڤيتامين دال وللغدة و غيره 

يوم جيت استلم النتيجة 
شرحت لي الدكتورة عن النتايج وكانت :

المعدلات كلها طبيعية و نسبها ممتازة
ڤيتامين دال عندي اقل من الطبيعي ب نسبة بسيطة جداً ووصفت لي جرعة اخذها اسبوعياً لمدة شهرين

اللي لفتني
نسبة حمض الفوليك في جسمي مرتفع ثلاث اضعاف عن الطبيعي !!!
نسبته عندي ١٢٢ و الطبيعي بالاربعينات
هنا انا تبلمت !! 
كيف وانا قرأت ان الجسم يُخرج اي زيادة منه عن الحاجة!!!


سألتني اسئلة كثيرة واغلبها قريتها عن العوارض الجانبية لزيادة حمض الفوليك في الجسم وكلها ماكنت اعاني منها الا شي واحد !! الاكتئاب و تلف الأعصاب!!

اوقات الحرص الزايد والفلسفة تجي عكس ماتبي بس الحمدلله ، والحين تحليل اخير للكوليسترول وطلع عندي مرتفع بنسبة بسيطة جداً ،كل اللي احتاجه هو زيادة الحركة و الرياضة


سألتها لو اقدر اخذ مكملات حديد ، مع ان معدله طبيعي وجاوبتني لو عشان الشعر والاظافر مو مشكلة ولكن لا تزيد مدة تناولي له عن شهر ونوقفه اقل شي ٣-٦ شهور وبعده نكمل ،
هالمعلومة جديدة جداً بالنسبة لي وايقنت انه مو أي أحد ناخذ منه اي توصية عن المكملات لو مو تخصصه
-حافظة عندي صور مكملات حديد من اخصائي تغذية عشان اطلبهم ومافيه سيرة لتحديد المدة-
شوفوا ايش المشاكل اللي ممكن ادخلها بهالتصرف


نصيحتي

لا تستهينوا بأي شي من الڤيتامينات وان زيادتها ماهي مضره!!
قبل ماتاخذوا اي مكمل سووا لنفسكم معروف و اعملوا تحليل وشوفو النتيجة ، راح توفروا على نفسكم اوقات صعبة وحيرة مالها اول من تالي .. وفالكم الصحة والعافية ❤️



ألقاكم في مواضيع قادمة :)
مع السلامة :*






ليصلكِ الجديد ؛ اشتركِ معنـا
Subscribe to our mailing list


2 comments

  1. اجمل مدونة مريحة لنفس أسلوبكم في الطرح يدخل القلب ♥️♥️♥️♥️♥️

    ReplyDelete
  2. ما تشوفين شر و قدامك العافية ♡

    ReplyDelete