مدونة هيا أدون ، اكتب و اُصور

خمس أشياء في اكتوبر



تأخرت في اشيائي لشهر اكتوبر ،، عطيت نفسي اول سبع ايام من الشهر الجديد كـ حد اقصى لموضوع خمس أشياء للشهر اللي قبله ،  سعيدة اني هنا :)





هالشهر ، قررت اني راح التفت فعلياً للزراعة برا
سويتها من قبل و لكن للأسف مانجحت ..
كل الزرع مات تقريباً و نشف
رحنا في البداية لمزراع قريب ، واشترينا بعض الشتلات
وعلى الرغم من اني اسقيها لكن بعد عشر ايام من شريتها بدت تذبل و تصفر
كلمنا المزارع و كان مره متعاون ، انعش لي الاحواض ورتبها و اضاف نبتات جديدة


هدية من المزارع ، نبتة اركا كبيرة و كريمة
خلتني اشوف اللي عندي (عندي ثنتين قبل) مرة صغار في العدد
الثنيتن اللي عندي جمعتهم كلهم في حوض واحد لان ارتكبت غلطة من قبل وهي اني اشيل العود الناشف
واصدقكم القول اني مو عارفه لو هو التصرف الصحيح لان في بعضهم يقول ان العود الناشف الافضل ينشال لانه يأثر على بقية النبتة ..
النتيجة كانت تقلص حجمها بس الجانب المشرق للنبتين انهم عايشين لين الحين عندي وهذا بحد ذاته نجاح
كنت معطيته من أول ماشريته ٦ شهور ، والحين بيكملون سنة ، وبمناسبة هذي النبتة الجديدة خلتني احس اني راح اكون متفهمة اكثر لها وراح اتجنب اي اخطاء سابقة :)



ذيك اللحظة اللي تقبلت فيها فكرة انه في البيت مُراهِقة صغيرة

من فترة وانا احاول بعنف و اقاوم بـ ردات فعل مبالغ فيها حبتين على كل تصرف مايعجبني واخليه قصة كبيرة لو بنتي الكبيرة تصرفت بشكل مختلف عن اللي تعودته منها كونها (طفلتي الصغيرة) ..

جلست بيني وبين نفسي ولاحظت انه نتيجة اللي كنت اسويه ، قاعدة ابعد نفسي عنها ، امتلى البيت سلبية وتوتر ، مو العلاقة اللي كنت اتمناها بيني و بين بنتي !!
اعترف اخذ مني وقت قبل استيعابي لفكرة انها مراهقة ، استيعاب ان بنتي كبرت ومراهقتها بدأت ..
و كـ أول خطوة ، ومحاولة اني احط النقط على الحروف لنفسي اولاً ، جبتلها مثل المحلول السائل لانها كانت تشتكي من بعض حبوب الشباب في اجزاء من وجهها واللي كنت افكرها حساسية بس، نفس المنتج اللي اذكر ابوي الله يرحمه جابه لي في اول مراهقتي ،، وطبعاً ذكرت لها قصة المنتج وكانت بوجود اختي اللي هي خالتها وكيف تتابعت قصصنا في الجلسة بشكل عفوي في حوار كنت اتمناه بس صار من غير ما ارتب له..
الحين انا في مرحلة قاعدة استرجع كل شي كنت اسويه في مراهقتي و امسك نفسي عن قولة لأ أو مقاومة اي شي تسويه أو تطلبه لاني طلعت من نوع الأمهات الدقة القديمة مررررة ..
للآن الامور تمام والوضع مُستتب :)
قرات ان المراهقة قبل كانت تبدا في عمر ١٣ وفوق والحين صار يبدا ابكر
 واؤكد لكم انه صار يبدا من عمر ١٠ سنوات عالاقل



كوب ميكي ماوس شافته سلمى في السوبرماركت وتحمست له و عطاني فكرة
عندها كوب لـ شرب الماء بغطاء ، وكان بصراحة يحوس الدنيا ، لانها لسا ، عمرها سنتين تقريباً ولسا ماتعرف
فقلت هذا ممكن يساعد يشجعها تشرب ماء اكثر بـ اقل حوسة ممكنة
ونجحت :)
(سوبرماركت التميمي)



فكرتي عن الشتاء لهالسنة كانت تتمحور في اني حابة يكون له كنزة خاصة فيه
حسيت بـ حميمية مختلفة ، كون هذي السنة تعتبر ثاني شتاء ارجع اقضيه هنا في الشرقية بعد نقلتي من الطايف
الشتاء العام كان ماله معالم واضحة كنت مشغولة و مو مشغولة
أو بالاصح مشغول بالي عن ملاحظة هذي التفاصيل

الكنزة اللي كنت اتخيلها ، وحدة من ثنتين
كلاسيكية اكيد ، ولكن اما صوف تريكو أو كشمير
كنت حاطة مبلغ محدد لها
الكشمير شوي صعب ماحصلته بالاضافة الي سعره المرتفع وماكنت مستعدة ادفع له
والخيار الثاني لقيته بلون كلاسيكي بعد ولكن لانه محلي المُفضل سألتهم لو بيسون عروض قريبا وجاني جوابهم بالإيجاب ، فـ فضّلت الانتظار و حسيت اني فزت في هذي الصفقة و اخذت كنزتي الشتوية لهالسنة في عرض ومبلغ مناسب :)
(المحل رالف لورين - مجمع الراشد الخبر)


وصلتني الطاولة في اخر يوم من اكتوبر :)
يوم كان حماسي جداً
عشق لـ طاولات القهوة
تقريباً لي ٣ سنوات و انا اغلب فلوسي تروح على طاولة قهوة
احس بـ متعة و انا اشوف ايش الجديد ، أو اتخيل كيف بيكون شكلها و كيف ممكن ارتبها
واعتقد ان هذي الطوالة راح تكون كفيلة انها توقفني عن النظر لأي طاولة قريباً :)
(الطاولة من بوتري بارن)




شي سادس في بعض آشياء عن موضوع عملته في هالشهر ،
الرابط (سويها بنفسك : صبغ اثاث ايكيا (قبل و بعد))

هذي الزاوبة اكثر زاوية غيرت فيها !! ما ستقريت فيها على وضع واحد
لكن في نهاية الشهر خليتها ابسط من قبل
والبساطة قابلة للزيادة والنقصان :)








ألقاكم في مواضيع قادمة :)
مع السلامة :*








ليصلكِ الجديد ؛ اشتركِ معنـا
Subscribe to our mailing list


8 comments

  1. جميل اسلوبك بسرد القصه يحسسني كاني عشت اللحظه معك ،، ربي يحفظ لك بناتك ويبلغك فيهم ماتحبين

    ReplyDelete
    Replies
    1. امين يارب
      الله يحفظك و يحفظلك كل غالي ❤️

      Delete
  2. استمتعت جدا وانا اقرا هالبوست 🙊💕 وعلى فكرة الطاولة فتتتننننننة تبارك الرحمن 🤩👌🏼 تلفتني الطاولات اللي كذا تحسينها اوثنتيك ميد وخشب حقيقي بدون تعديلات وزبرقه كثير 💖

    وعاد على طاري مراهقة في المنزل فعلا بالضبط لاحظت في بنات العائلة انهم قاعدين يكبرون اكبر من سنهم او سننا وقت ما كنا قدهم 😂 فحلو جد انك استوعبتي هالنقطة وخليتيني استوعب معاك انه حركات العناد والعبط وتقليد الكبار اللي اشوفها وضعه طبيعي في الابتدائي 🤭

    ReplyDelete
    Replies
    1. الله يسعدك يارب روان نورتيني والله ❤️

      Delete
  3. الله يعطيك العافية استمتعت بالبوست جدا 🌷

    ReplyDelete
  4. استمتعت كثير وانا اقرا البوست يعطيك العافية يارب ويحفظ لك احبابك
    اعتبرك ملهمه لي .

    ReplyDelete
  5. صحيفة وظائف , السعودية , سبق ,Careers , jobs , وظايف , توظيف , وظيفة , التعليم , شاغرة , شركات ,

    عمل , عاجل , جريدة #وظائف , وظيفة , Careers , jobs - #عاجل , وظايف , السعودية , اليوم , وظايف ,

    توظيف , #سبق #وظيفة شاغرة , عمل , تعليم , جدارة , نتائج , شركة ,مؤسسة , التعليم , التقاعد , التأمينات ,

    العسكرية , القطاع الخاص , القبول و التسجيل , الترقيات , التقنية , التدريب
    اضافات وظائف

    ReplyDelete