مدونة هيا أدون ، اكتب و اُصور

خمس أشياء في نوڤمبر


احب شهر نوڤمبر
شهر سعيد بالنسبة لي
لما الاحظ حياتي في السنين اللي فاتت ، اغلب الاشياء السعيدة تتم في اخر السنة
يارب ..





اكثر وجبة خفيفة اعجبت سلمى و حبتها ،، سلمى الحين كملت هالشهر (نوڤمبر) سنتين الحمدلله وتم نسيان يوم ميلادها ماتذكرته الا وانا اخذلي موعد حق شي و انتبهت انه كان يوم ميلادها ،، وطلعت مثلي بنيتي ماتحب هالسوالف ،، لما جيت اغنيلها ورتني الوجه المكفهر و راحت عني و غنيت لحالي مع خواتها هههه

السناك مناسب ولذيذ فعلاً ،، عضوي وغير مُعدل وراثياً ،،
للأوقات وانتي طالعة مثلاً وولسا ماجا وقت وجبة الطف الاساسية ،، تصبيرة لذيذة لهم ..
هذي العلبة رقم ٢ :)

شريته من سوبرماركت التميمي
سعره ٤٦ ريال





اول مرة في حياتي اشتري هالقد شنط في فترة قصيرة
٣ شنط بستايلات مختلفة


الشنطة الاولى من واندلر Wamdler

WANDLER
Hortensia Mini leather shoulder bag

كنت ابحث عن شنطة من ماركة جديدة غير متداولة كثير وغير منتشرة
شي يعجبني فيه الستايل اكثر من اسم البراند ..
من اول ما شفتها حبتيها و دخلت قلبي
ومع الموديل الغريب ، درجة اللون هي عشقي وما اشبع منه ..
جا الحين و قت البحث ،، سجلت في اكثر من موقع وكنت خلاص بطلبها اون لاين و هالمرة حتكون اول مرة ادفع فيها مبلغ كذا ،، ماحب بالعادة ، بس من كثر ما عجبتني ..
مالكم في الطويلة ،، لقيتها مرة في موقع اماراتي اتوقع ، لهم محل قائم في مول الامارات في دبي ، هو موقع بوتيك ون
لقيت الشنطة اون لاين و لما راحوا خواتي لـ دبي طبعاً قلتلهم يجيبونها لي :)
المقاس واللون جميلين والجودة جميلة تستاااهل الانتظار :))))

موقع بوتيك ون
محل بوتيك ون دبي | الامارات مول



الشنطة الثانية :)
من كالڤن كلاين ، صغيرة وعملية ،، ونفس القصة مع الشنطة الثالثة ، شفتها من قبل  واستغليتها (كانت بـ ٥٥٠ ريال)
ولما جا وقت البلاك فرايدي في نهاية الاسبوع كانت من ضمن المنتجات اللي عليها خصم و اخذتها بسعر ٣٥٠ - ٣٧٠ كذا .. معقول :)
الستايل كنت حابة فيها هبة كتابة اسم البراند على الجلد ،، بكل بساطة ،، ولان لونا اسود مناسبة و عملية حق اي وقت  ومكان لما ابغى اشيل محفظتي و جوالي ومفاتيحي بس ..

محل كالڤن كلاين الخبر | مجمع الراشد - الظهران مول



الشنطة الثالثة كانت عاجبتني من زمان نسبة ٧٠٪ لكن كنت مستغلية سعرها ، من بولو رالف لورين ، هالماركة اللي احب كلاسيكيتها .. وطبعاً اللون اول مالفتني لها ،، ونوع الجلد و الرسمة الغير معتادة ماعندي منها كثير ،، شي مختلف عن شنطي الباقية .. في البلاك فرايدي (ميزة شهر نوڤمبر) محل رالف لورين عمل تخفيض للويكند و كانت هالشنطة من ضمن الاشياء المخفضة ولكن نزل عليها خصم تقريباً لنص سعرها .. :)

محل رالف لورين الخبر | مجمع الراشد


اضافة ديكورية لهالشهر
قطعتين غيروا المكان بشكل جذري وأحلى مما تخيلت ..


الرف الخشبي فوق سطح المكتب ،، اللون البني الخشبي مع لون الجدار الرمادي وكمان الشكل الدائري الغريب للرف (مع اني مو من محبي الدوائر بشكل عام) لكني شفته راح يخفف من الحدة ويكسر الجو في الغرفة و يعطيها نعومة شوي


المرايات الدائرية ، عندي في المجلس جدار مرة كبير ، ماكنت اتخيل اني ممكن ااحط عليه اشياء كثيرة عشان يكسر الفراغ ،، كنت ابغى قطعة الشغل منها و فيها وبنفس الوقت تحافظ علي المساحة ،، المرايات حافظت لي على المساحة اللي ابغاه ماضيقت المكان وكمان حركة المريايت مع اطاراتها المعدنية واللون الذهبي عطاها فخامة ..

كل القطعتين شريتهم من وست الم



أكثر ساعة لبستها هالشهر
من دانييل ولينغتون
بصراحة لما طلبوا مني الاعلان في الإنستقرام مااترددت لحظة ،، من قبل وانا اشوف صور سااعاتهم ، كثير منتشرة
واتخيل اللون اللي ممكن اختاره و من عين التصوير كنت متخيلة كيف الصورة تطلع
كان فيه وقت محدد ومتفقين عليه ، لكن قبلها سلمى كانت مريضة وبعدها انا ، فيوم انتبهت للتاريخ و باقي يوم على التسليم وانا لسا ماصورت اصلاً ،، بغض النظر عن التوتر و الفزع اللي مريت فيه ، لمدة ٥ دقائق بس ههههه على غير العادة ولكن لأني متخيلة النتيجة وباقي التطبيق فقط ، كان المشكل الوحيد هو الوقت و الدعاء انها ماتغيم اليوم قبل انتهي :)

كود خصم  يعمل الى نهاية ديسمبر ٢٠١٨
15haya





هالشهر فصلت على منتجات غسيل الملابس في ايهرب
عندي مشكلة مدري لوهي في الغسالة أو سائل الغسيل الا وهي ان بعض القطع القطنية الغامقة مع غسلها تصير مبقعه كن جايها كلوركس!! هذا وانا استخدم سائل غسيل حق العباية العادي برسيل من سنين ،، و كمان فيه سائل غسيل ثاني للأطفال ومافيهم اي نوع من التبييض !! فبديت بالبحث و جاري التجربة و اكتشاف العلة
لدرجة اني حطيت السبب في الماء لان اوقات انقد عليه فيه ريحة كلور بس مدري والله
عالعموم جاري التجربة و اكتشاف منتجات غسيل جديدة :)
الروابط للمنتجات كلها اللي طلبتها هالشهر و الشهر اللي فات

قائمة مشترياتي من موقع ايهرب لشهر نوڤمبر
قائمة مشترياتي من موقع ايهرب لشهر اكتوبر




ألقاكم في مواضيع قادمة :)
مع السلامة :*







ليصلكِ الجديد ؛ اشتركِ معنـا
Subscribe to our mailing list


4 comments

  1. جمال الأشياء وجمال التصوير

    ReplyDelete
  2. والله مدري كيف يعلق على جمال التصوير ام اختياراتك الجميلة

    ReplyDelete
  3. اعشق هاللون بالشنط اللون البني ❤️❤️❤️❤️ تدويناتك استرخاء بالنسبه لي الله يسعدك 🌸

    ReplyDelete
  4. حبيت الشنط و الساعة ❤️❤️

    بالنسبة لبقع الملابس جربي خففي الصابون بمويه قبل ما تحطينه في الغسالة , كانت عندنا نفس المشكلة

    ReplyDelete