مدونة هيا أدون ، اكتب و اُصور

سويها بنفسك : صبغ اثاث ايكيا (قبل و بعد)


فكرة طبقتها بتحويل رف خشبي من اللون الأسود الى الابيض



الفكرة بدأت لما تذكرت الرفوف عندي من ايكيا صارلها تقريباً ١٠ سنوات ، ايام ما كان ذوقي يختلف عن الحين
كان لونها اسود ..فكرة الرفوف هذي احبها ، عملّية و تعطي طابع كاجوال وغير رسمي للمكان
بس كانت مشكلتي باللون الاسود
الالوان الاساسية في المكان هي الابيض كأثاث أو بني خشبي ،، اسود !! لا لا
الحل : اغير لونه الى الابيض :)

الرفوف ما ثبتتها في الجدار لاني احب اغير دايم ، لكن لازم تتثبت لو بتحطينها في مكان لانها تتحرك وماتقدرين تحطين عليها اشياء ثقيلة و هي مو مثبتة.
ولان الزاوية اللي موجودة فيها حالياً ماعليها حركة واجد فقلت بخليها بس كذا.

الرفوف قبل
(تصوير جوال)





الأدوات

برايمر : البرايمر وظيفته يجهز السطح المعالج للقطعة وتحضيرها للون الجديد
البرايمر هنا اساسي جداً لان اللون اسود و ابي اصبغه ابيض
جربت على قطعة رف (المكسورة) اللون الابيض بدون البرايمر ، التجربة غير ناجحة ابداً
خطوط اللون والابيض مو باين ،، البرايمر هنا اساسي
متوفر في ساكو
اللون الأبيض : مخصص للأثاث الخشبي ، مطفي
متوفر في ساكو
فرشة اسفنجية : اخترت هذي الأداة للتوزيع لان الفرشة العادية من تجارب سابقة تعملي خطوط في اللون وعلى السطح ، الاسفنجة هذي عطتني أنعم نتيجة.
متوفرة في كل مكان ، جرير و ساكو مثلاً





الخطوات

  • تنظيف السطح من الاوساخ و الغبار وتجفيفه
  • بداية بالبرايمر ، نبدأ بتوزيع البرايمر ، في نفس اتجاه خطوط الخشب في الرف 
  • من باتجاه واحد فقط ، يعني ما نروح و نجي ، لا 
  • نبدا في بداية الرف ولما نوصل لنهايته نرفع الاسفنجة و نمرر بسرعه لو احتجنا
  • هنا البرايمر طبقة خفيفة ما نحتاج تكون كثيفة ، ومو ضروري تكون ممتازة ، لان فقط عملها تجهيز السطح واللون الظاهر مو اللون النهائي
  • نتركها تجف يوم أو 3 ساعات عالاقل
  • يجي دور الصبغ الابيض ، نفس فكرة البرايمر ، نمرر الاسفنجة بخفة ، ما أبغى يتكون طبقة ثقيلة من الصبغ لانها حتكون صعبة في الجفاف و راح تبان كـ بروز على السطح ، فالافضل السرعة نوعاً ما عشان ما تتكون هذي الطبقة. ولو تكونت بنفس الوقت احاول امرر وامشي الصبغ على باقي الاطراف بس لازم م ا اعيد اكر من مرتين بس
  • بعدالانتهاء ، نتركها تجف لـ ثاني يوم 
  • نبداأ في الطبقة الثانية ، عشان يعطينا نتيجةه اللون الابيض الناصع
  • نتركه يجف ليوم ثاني 
النتيجة في صور مُقربة بدون تعديل كثير وفلاتر
السطح ، راضية جداً بالنتيجة ، تحتاج عين مجهرية لإكتشاف اي عيب


هنا غفلت عن هذا الجانب و مانتبهت له الا بعد ما انتهيت :\

ملاحظة ، هذي الوحدة مثل اختها برفوف لكن صار حادث بسيط و طاحت وانسكر الرف الاولي ، جاتني فكرة اني اخليها مثل السلم اللي دايم افكر اشتريه ، فكرة جتني برجليها :)))


ألقاكم في مواضيع قادمة :)
مع السلامة :*






ليصلكِ الجديد ؛ اشتركِ معنـا
Subscribe to our mailing list


9 comments

  1. آهـ جميلة جدا .. ومبدعة كعادتك هيا .. تحفزي الواحد انه يقوم يسوي له حاجة بالبيت عندي اشياء كثير من اكيا وودي اغير فيها ومكسلة .. الظاهز اني محا انام اليوم ����

    انتظر جديدك على احر من الجمر

    ReplyDelete
  2. تجنن الافكار مرررره حلوة وتحمس ,, سلمت يداك

    ReplyDelete
  3. تسلم يدك دائما احب اكون اول المتابعين لجديدك , لاتقطعينا

    ReplyDelete
  4. جمال لمساتك مبدعه كعادتك

    ReplyDelete
  5. اكثر شيء يعجبني في مدونتك انك تذكرين المعلومات كاملة بشكل مبسط وواضح.. شكرًا لك استفدت مرة 💘✨

    ReplyDelete
  6. القطع اللي صبغتيها خشب طبيعي او خشب مضغوط وملبس؟ عندي قطعة من ايكيا (مو خشب طبيعي) صبغتها وخلال يومين تقشر اللون من جهة حطيت عليها غرض وحركته حركة خفيف:/

    ReplyDelete
  7. شكرا على التوضيح وحببتيني اسوي البوية بنفسي لكراسي الحوش عندي يبغالها تجديد لون

    ReplyDelete