مدونة هيا أدون ، اكتب و اُصور

مقارنة | ماك Fix+ ومثب المكياج من سكندنفيا Skindinavia

بسم الله الرحمن الرحيم


كثير كنت اسمع عن مثبتات المكياج و اللي تخليه يدوم لفترة اطول
ومنها اول واحد شريته لهذا الغرض وهو بخاخ ماك فكس بلس .. ولكن !!

مع الوقت عرفت ان الغرض منه مو نفس السبب اللي شريته عشانه ..
في هالموضوع معلومات عنه و استخداماته ومقارنته مع منتج ثاني حبيته لتثبيت المكياج ..


ماك فكس بلس | MAC Fix plus

اعتقد هذا اشهر منتج بين محبي الميك اب ،، واكثر الناس يمكن شرته لغرض معين و استغربوا من هالضجة وحب الناس له..
الاعتقاد الاكثر شيوعاً لهذا البخاخ انه لتثبيت المكياج في مكانه ويستمر لساعات من غير مايتحرك ولا يتغير ، بس لما الناس تشتريه عشان هالغرض تستغرب انه ما ثبت شي وان الناس تحبه مجامله وهبَّه !!

ماك فيكس بلس هو عبارة عن رذاذ يدمج مع البشرة اي منتجات بودرية استخدمتيها في مكياجك ، من بودرة تثبيت الاساس او الكونتور ، برونزر ، حمرة خدود او هايلايتر (اضاءة) وهكذا ، والنتيجة اللي تحسيها احياناً بعد هذي المنتجات البودرية من شكل مطفي تماماً لمكياجك او مثل الطباشير او طبقات يمكن ، واللي بالعادة تاخذ ساعات عشان تفرز البشرة
 دهونها الطبيعة و تندمج بشكل طبيعي ، لكن مع ماك فكس بلس ، بعد استخدامك للمنتجات البودرية راح يعطيك النتيجة المخملية للميك اب على طول ويزيل اثر الطبقات للبودرة ويدمجها بشكل سلس على بشرتك  ..

مع رشات من الماك فكس بلس على كامل الوجه ، بالاضافة للنتيجة المخملية لمكياجك بعد استخدامك للمنتجات البودرية ، راح يعطيك الديوي والمنظر الندي لبشرتك .. استخدمه انا بعد قبل الميك اب ، يعطي نضاره للوجه وترطيب لطيف خاصة لو نسيت احط المرطب او بالاحرى تعيجزت ..

من الاستخدامات الثانية للفكس بلس ، ممكن ترشين منه على فرشة توزيع الايشدو (ظلال العيون) قبل ما تاخذين من علبة الشدو وتوزعين ،، راح يعطي لون اقوى للشدو وبعد يخلي قوامه مايل للكريمي ..


مثبت المكياج البخاخ من سكندنفيا
Skindinavia Makeup Finishing Spray

فيه منتجات معروفه باسمها انها لتثبيت المكياج ، وعملها بالاضافة لتثبيته وانه يدوم لاطول فترة ، تقووم بنفس عمل الفكس بلس وو دمج المنتجات البودرية على البشرة بشكل سلس و مخملي ..

مثبتات المكياج لها اثر جميل و فعاله جداً في المناسبات و اوقات الصيف لما تزيد الحرارة والرطوبة و ممكن بعد بعضها يكون فيه مميزات عن غيره بانه يتحكم بالدهون او يعطي ترطيب وهكذا ..

من هذه المنتجات هو مثبت المكياج البخاخ من سكندينيفيا ، هذا المنتج كان قبل يُستخدم في الافلام والستوديوهات لتثبيت المكياج تحت حرارة الاضاءة لاطول فترة ممكنة من دون الحاجه لعمل الرتوش كل فترة .. شركة سكيندينيفيا متخصصة فقط في مثبتات المكياج ، يعني كل اللي عندهم انواع من المثبتات من المثبتات الخاصة بالعروس او للمكياج او للتحكم بالدهون وكذا. قريت مرة ان مثبت المكياج السبراي من اربن ديكاي هو من هالشركة وفيه نفس الخصائص بس زين اني ماشريته لان عندي الاصل :)) بس اتوقع راح يكون هو خياري الثاني لان مثبت سكندينيفيا غير متوفر في السوق ولازم طلب عكس اربن ديكاي.

حقائق من مُصنعي سكندينيفيا لتثبيت المكياج :
٩٠ بالمية من المستخدمين يتفقون ان المكياج اخر اليوم نفسه اول ماحطوه
٩٤ بالمية من المستخدمين يتفقون ان البخاخ يعطي بشرتهم مظهر ديوي  وصحي متألق
مُثبت انه يساعد في ابقاء المكياج بعيد عن التجمع في اماكن خطوط التجاعيد او المسام (يعني ما يخطط ويتكتل)
يحوي البخاخ تقنية تخلي سطح البشرة بارد وهالشي يمنع من ان المكياج يذوب او يختفي 
جميع بخاخات سكندينيفيا خالية من البارابين و لا تسبب حساسية

طبعاً هذي الحقائق موجودة في موقعهم ولو دخلتوه بتلقونهم مغيرين شكل العلبة الحين ،، البخاخ اللي عندي للبشرة العادية ، لاني ذيك الفترة يوم اخذته كانت بشرتي مختلطة بس مايلة للجفاف (كان شتااااء).

استخدامي للماك فكس بلس و بخاخ سكندينيفيا :

قبل وضع المكياج ابخ رشة خفيفة على كامل الوجه من فكس بلس و بعدها بثواني لما يجف ابدا بالروتين ،، لما انتهي يجي دور مثبت المكياج من سكندينيفيا ، اخض العلبة أول وامسكه على امتداد يدي و ابخ قد المسافة على كامل الوجه (قبل المسكارا)، منها يروح اثر المنتجات البودرية و يعطيني النتيجة المخملية اللي ابيها ويثبت ساعات ساعات ،، من جد ماكنت اصدق ان المنتجات هذي لها اثر و بس لما جربت صدقت .. بالعادة احط مكياجي الصباح/الظهر واطلع لعزيمتي و للناس اللي بشوفهم ، وارجع البيت انسى انا كنت حاطه شي او لا ، حتى ماتعب نفسي خلال اليوم ، دايم كنت اطالع المراية وبببح كل شي مختفي خاصة من الجو الحار و الغطا وكذا .. بعد سكندينيفيا من جد المكياج ثبت ، يعني وانا قاعدة بوسط الناس واطلع مرايتي عالاقل يسواا اشيك واسوي رتوش  على بودرة و كحلة ،، ولا رجعت اروح امسح مكياجي من قلب :))

هذا ريڤيو كذا، سعيد ، للمنتجين ، احبهم اثنينهم ،، ومستحيل يخلى مكياجي من غيرهم ..


Evian Facial Spray

بخاخ الوجه من ايڤيان ، ذكرته لان له نفس فكرة المنتجين ، وفوق هذا ذاكرين على العلبة انه يستخدم لتثبيت المكياج ، انا بالنسبه لهالشي ماجربته ، يمكن ينفع لدمج البودرة عالوجه بس للتثبيت ممممم....

من وصف المنتج على العلبة : رذاذ لطيف لترطيب البشرة و انعاش المكياج .. يستخدم للازالة العرق والكلور و تهدئة البشرة من حروق الشمس و للبشرة المتهيجة ..

استخدامي :
المنتج حلو ماعليه يعني ،، انا اللي اشوفه انه ماء في علبة مضغوطة ، منعش للبشرة ، يرطبها ترطيب خفيف لطيف ، وحلو للاستخدام خلال اليوم للانتعاش ،، وانا استخدمه بعد التشقير ، الحف وكذا .. ممكن استخدمه خلال اليوم لانعاش المكياج لو الرتوش كانت ببودرة مثلاً ، بس لازم اتاكد ان المسافة للبخاخ عند الرش تكون بعيد عشان ماينقط :) 




القاكم في مواضيع جديدة
مع السلامة :*


ليصلكِ الجديد ؛ اشتركِ معنـا
Subscribe to our mailing list


12 comments

  1. يعطيك العافيه ، فكس بلس فعلاً يعطي ترطيب ونظارة اكثر من التثبيت اللي ماقد فكرت استخدمه لهالغرض لكن! هل مثبت اربكن ديكاي موجود بالسوق السعودي؟ كيف ممكن نحصل ع مثبت اسكندنافيا ومن اي موقع ووش فرق الاسعار
    اعتذر عن الاسئله الكثيرة لكن ماذكرتي شي وانا فضوليه بعض الشي ناحيتها

    ReplyDelete
    Replies
    1. اهلاً بك .. منتحات اربن ديكاي متوفرة في فروع سيفورا
      .. وبخاخ سكندينيفيا يوفرونه بعض المتاجر على الانستقرام
      ماجربت اطلبه مباشر من موقعهم
      ..
      بخاخ اربن ديكاي اتوقع موجود كذا نوع فأنتي تختارين اللي يناسبك

      Delete
  2. يعطيك العافية يا عسل على الريفيو الواضح والمفصل ❤️❤️
    تحمست على مثبت المكياج حق سكندنفيا

    ReplyDelete
  3. يعطيك العافية على المنتج الي بيخفف ثقل الشنطة من الميك اب ههههههه
    مااحب اشيل ميك اب معي عشان اعدل غير للشفايف المحدد او الروج

    تلاحظين ان الفكس بلس لما تبخينه على الفرشة للشدو الباليت يسوي زي الطبقة الخفيفة فوق اللون ؟
    اتضايق من المنظر هذا -.- صرت مرات اعكس الحركة اخذ اللون بعدين ابخ نتفة

    ReplyDelete
    Replies
    1. يعني قصدك يتكتل ؟
      مرة صارت لي .. فاتوقع انه لازم حركة سريعة في التوزيع
      بس بجرب طريقتك :))

      Delete
  4. مرة عجبني البوست تسلم يد اللي كتبته
    و فعلن انا مثبت اسكندنافيا ما اقدر استغني عنه من احلي المثبتات
    لازم الكل يجربه
    لكن بنسبالي مو للاستخدام اليوم لانه مرة قوي يعني للمناسبات البسيطة و الكبيرة لكن مو يومي لانه ممكن يقفل المسمام وهذا دليل علي قوته
    لكن للامانه جاتني فترة تقريبا كل يوم عندي مناسبة و حتي امكن كان في كل يوم مناسبتين و كنت احط منه باستمرار و للامانه و لله ما عدم بشرتي منتج جميل الصراحة
    شكرا علي البوست كان خفيف و مفيد

    ReplyDelete
    Replies
    1. شكراً هوازن :)
      وانا معك المنتج للاستخدام مو اليومي .. احس تخصيصي له للمناسبات راح يخليه فعال اكثر ههه

      :*

      Delete
  5. الله يعطيك العافيه 💜 تحمست احرب منتج سكندنفيا 👌👌

    ReplyDelete
  6. الله يعطيك العافية هيا
    جربت بخاخ اربن ديكاي اللي للبشرة العاديه و الجافة ممتاز جدا و عندهم نوع ثاني البشرة الدهنية يوازن الدهون ...حقي قرب يخلص و ناويه اجرب سكندنفيا

    تدويناتك دايما مفيده

    ReplyDelete
  7. مرحبا هيا البوست جمييل وكعادتك تفاصيلك للمنتج جدا دقيقه ومو ممله ابدد
    احب طريقتك في التدوين جدااا
    يعني بالتفاصيل والدقه المطلوبه من غير ماتحسي بملل وانتي تقري البوست
    اكيد المعلومات هاذي هتفيديني وهتكون باك اب
    تسلمي عالبوست ويعطيك العافيه

    ReplyDelete