مدونة هيا أدون ، اكتب و اُصور

مشترياتي في الصيفية | Big Summer Haul

بسم الله الرحمن الرحيم




موضوع اليوم عن مشترياتي في الفترة اللي راحت .. من اخر موضوع للمشتريات هنا الين اليوم ..
يعني تقريبا في الثلاث شهور الاخيرة .. 
بعضها حطيتها منفصلة في الانستقرام فـ بخليها اخر شي .. عشان اجمع كل شي في موضوع واحد :)


نبدا ..


واخيراً شريتها .. كنت مستصعبة اشتريها اون لاين بس جابوها سيفورا ..
هي متوفرة في بعض الفروع ، اول ما رحت جدة مريت سيفورا الرد سي مول ،، ورحت اتمقل !!
من كثر ما اشوفها عند اليوتيوبرز والبنات المُدونات وكلامهم الجميل عنها حبيت اقتنيها ..
اخترت ميا تو للوجه لاني ماأحس بحاجة للجهاز اللي يجي للوجه و الجسم .. الوجه يكفي ..
الكرتونه تجي بجهاز الكلاريسونيك ميا 2 ومعها غسول صغير كعينة ، وبعد الشاحن ، وعلبة لحفظ الجهاز عند التنقل ، والفرشة اللي تجي معه للبشرة الحساسة ..

صارلي استخدمها ٣ اسابيع .. طبعا كنت حاطة في بالي حبوب بتطلع بس الحمدلله جت سليمة و ماواجهت هالمشكلة وانبسطت بحالي ههههه ..

سعر الكلاريسونيك ميا تو للوجه : ٧١٧ ريال 

تحديث : بعد استخدامي له هنا رابط الريڤيو عن الكلاريسونيك كاملاً :)



ايستي لودر سيروم ليلي للوجه و العين | Estee Lauder Advanced Night Repair and Advanced night repair Eye

من زمان وانا عارفة اني لازم اشتريه .. كنت استخدمه كعينات تجي مع مشترياتي من ايستي لودر ..
مع الخوف من التجاعيد وحرص اني اهتم بحثت عن سيروم لمحاربة تجاعيد الوجه والعين .. (السيروم فعاليته اكثر من الكريمات العادية لتآدية وظيفتها المطلوبة) اغلب المنتجات ماكانت متوفرة عندنا هنا ومن ضمنها سيروم و كريم العناية بمحيط العين من كيلز Kiehl's الموجود في الكويت وويني على ما اروح هناك .. وحتى في امازون مالقيته ..

من اليمين سيروم  للكامل لوجه ، يمكن استخدام المنتج من خلال القطارة في الغطاء بوضع عدة قطارات على راحة اليد وتوزيعها بالطبطبة على كامل الوجه و الرقبة ، انا كذا استخدمها :)
واليسار (سيروم كريمي) لمحيط العين و كلهم لمحاربة علامات التقدم في السن .. يجي في العلبة معه ملعقه بلاستيكية صغيرة عشان سهولة الاخذ من العلبة ..

سالفة الشراء .. 

انا شفتهم و تذكرتهم بصراحة وانا في الطيارة .. في مجلة المبيعات الجوية للخطوط السعودية ،، وشكلهم مُغري جداً .. نفس اللي ابيهم .. احترت في البداية وش اخذ اول .. قلت باخذ سيروم الوجه و بشوف وبعدها اخذ حق العين ..
كان سعره ٤٤٥ ريال .. انا كنت عارفة ان الاسعار من المبيعات الجوية ارخص من الاماكن الثانية واغلى بشي معقول من طلبها عالنت مع اني ماعرف مكان يشحن ايستي لودر للسعودية مباشرة :( ..
المهم .. ولما وصلت الشرقية واتمشى .. واروح اتلقف واسآل عن سيروم العين من ايستي لودرو والقا سعره ب ٣٤٠ ريال .. 
طبعاً نسيت اسال عن سعر اللي اخذته حق الوجه .. فقلت مابدهاش .. وفي رجعتي شريت حق العين من المبيعات الجوية ب ٢٨٥ ريال :) .. 

طبعاً راح اكتب موضوع كامل بس عن هالمنتجين بعد مرور فترة كافية .. 

سعر سيروم الوجه من ايستي لودر : ٤٤٥ ريال
سعر السيروم الكريمي من ايستي لودر لمحيط العين : ٢٨٥ ريال



مشتريات موقع آمازون ..




هالمرة طلبت اغراض جديدة من موقع امازون ..
كتبت قبل موضوع عن اشياء سابقة  : (طلبيتي من موقع امازون)
طبعا كثير يسآلني ليش ما اطلب من موقع آي هيرب ،، السبب هو اني مابي اوزع طلباتي والسبب الاهم الحجم!!
اي هيرب كل الاحجام اللي فيه صغيرة و مقارنتها مع المنتجات والاحجام المختلفة من على امازون هي افضل .. انا احب الاحجام الراهية .. ماحب اشتري مثل العينات .. :)


زيت جوز الهند العضوي | Coconut Organic Oil 
صحيح كان من ضمن طلباتي الاخيرة بس لاني نسيته في الحر فترة وخرب علي :(
لازم يكون المكان مكيف او اذا ماقدرتي خليه في الثلاجة .. بس الزين اني كنت مخلصة نصه ..
حسيت  بالآمان لما وصل هههه ..

حجمه ٩٠٧ غرام (كبير)
سعره : 17.98 $ = ٦٩ ريال تقريباً

هنا رابط المنتج على موقع امازون ..




زيت الجوجوبا العضوي | Jojoba pure Oil
هالزيت عشان اكمل طقم الزيوت اللي عندي (اللوز المر و الافوكادو) و فوايدها للشعر والبشرة بس اكثر شي للشعر ..
فيه خصائص محاربة البكتيريا فيساعد في تنقية وتنظيف فروة الرآس مما يحافظ على الجذور و يقلل من تساقط الشعر .. جاري تجربتها ومتحمسه للنتايج ... :)
سعره للحجم ٤٧٣ مل : 23.88 $ دولار = ٩١ ريال تقريباً (بالضرب بـ ٣.٨٥ )

هنا رابط المنتج :




مايونيز الشعر | Hair Mayonnaise
هو ماسك للشعر بالمايونيز .. للشعر التالف والضعيف .. وشعري بسبب الصبغة الفاتحة ابي اكثف عنايتي فيه واللي بتشوفوها من خلال اغلب المنتجات في الموضوع لليوم .. شفاحة .. 
الماسك المايونيزي فيه اعشاب عضوية (مكتوب) و زيت الزيتون اللي ريحته ذكرتني بشامبو سيلفكرين بزيت الزيتون .. و بروتين البيض .. اهم شي ممكن يساعد الشعر .. 
شفت هالماسك عاليوتيوب وهو مخصص للشعور الافريقية .. فقلت اكيد راح يعطيني ترطيب مناسب خاصة ان شعري مصبوغ و ناشف .. جربته للان مرتين ، ترطيبه متوسط وبسبب بروتين البيض على ما اعتقد حسيت بملمسه عالشعر حتى بعد غسله ، يعني الشعر ما انقلب حرير .. بس حلو حلو اهم شي النفشه مافيه ،، والشعر باين صحي ومش جاف وهذا يكفيني ..

حجمه : ٥١١ غرام
سعره: 8.74 $ = ٣٤ ريال

هنا رابط المنتج :





شامبو شيمر لايت من كليرول | Clairol Shimmer Lights Shampoo for blonde and silver
وكل هالحوسة عشان اشتري الشامبو البنفسجي .. ولاني ماكنت اتوقع القى اي شي يرضيني عندنا هنا (تكملة السالفة بعد شوي)  .. كل مابحثت عن الشامبو البنفسجي (Purple Shampoo) للشعر الاشقر الرمادي كان هو يظهر في اول نتايج البحث ..
جربته للآن مرتين .. يعني شعري كان بادي يقلب على اصفر واستخدمته لمرة ماشفت نتيجة .. وغسلته ثانية وخليته عالشعر ١٠ دقايق و رضيت الحمدلله .. الشامبو البنفسجي ما يستخدم على طول ، مرة بالاسبوع بس انا استخدمه بصراحة مرة ايه و مرة لا .. عشان مايتراكم على جذور الشعر لانه مايتعبر مُنظف لفروة الراس و بنفس الوقت اكرر الاستخدام عشان احافظ على رمادية الشعر لاطول فترة ..

حجمه ٤٧٣ مل
سعره : 10.49 $ = ٤٠ ريال تقريباً

هنا رابط المنتج :





من جون فريدا شير بلوند شامبو | Jhon Frieda - Sheer Blonde Colour renew Shampoo

شريته لاني حسيت سعره اوكي ويكفيني مع هذا الين ازهق من الاشقر الرمادي ..
لما وصل لقيت ان عليه عرض واحد مجاناً .. 

منتجات جون فريدا كانت من ضمن نتايج البحث ههه .. عاد في اخر مرة رحت فيها لبوتس لقيت منتجات له .. شي جديد بس ماكان هذا المنتج من ضمنهم .. شفت شامبو للشعر الملون البني والغامق ..

حجمه ٢٥٠ مل
سعره : 9.98 $ = ٣٨ ريال تقريباً

هنا رابط المنتج :






زيت شجرة الشاي العضوي | Tea Tree Oil
البنترست لحس مخي .. كل ماشفت فيه شي حبيته :( 
عاد لاني دايم اقرا عن فوايد زيت شجرة الشاي فحسيت بحاجة له عندي ..
طبعا انا شفت عن زيت شجرة الشاي هنا في بودي شوب ومو نفس المنتج .. نسبة زيت شجرة الشاي ١٥٪ فيه بس هذا ١٠٠٪ ..

زيت شجرة الشاي يعتبر من الزيوت العطرية اللي ممكن استخدامها في عمل روائح مختلفة و له فوايد في معالجة حب الشباب والبشرة الدهنية .. وبعد اضافة قطرات منه لزيت مثل اللوز واستخدامه يعطي ترطيب للبشرة الجافة وممكن للمصابين بالصدفية .. وكمان اضافة قطرات للشامبو تساعد في ازالة القشرة .. وغيرهااا ...

حجمه : ١١٨ مل
سعره : 17.45 $ = ٦٧ ريال تقريباً

هنا رابط المنتج :




منتجات للشعر من ردكن | Redken Hair Products


تعتبر ردكن من الشركات المعروفة لمنتجات الشعر ويستخدمونها احترافيين في هالمجال ، ولانها مو متوفرة عندنا ومنتشرة بكثرة فماكنت احرص ادورها عشان ما اتعب ههه .. عاد شفت المنتجات لما كنت في سوفيتيل الخبر في محل الحلاقة (تصفيف الشعر) حق الرجال بس كان زحمة ووكنت ابا اخذ راحتي فآجلت الموضوع الين بعدين وعشان اقرا اكثر عنهم ..
عاد رحت للسوفيتيل قبل فترة ومريته كان فاضي ودخلت وبسطت اقرا وش عندهم ..
كان عندهم منتجات من لوريال و شركات ثانيه بس كان كل تركيزي على هذي الشركة Redken.



ردكن اكستريم كات هير سبراي (بخاخ لمعالجة الشعر) | Redken Extreme CAT Hair Spray
هو بخاخ لمعالجة الشعر وتغذيته بالبروتين .. قريت عنه كثير كان فيه منه نوعين (كريمي مثل البلسم و مائي مثل هذا) ..
طبعاً شرح الفلبيني اللي فيه كان غلط (قالي انه ينترك عالشعر ويحمي من الحرارة) بس ماخذت بكلامه لاني كنت عارفة وش ابغى .. قريت عنه انه يساعد الشعر خاصة بعد ماتعرضينه لمعالجات وصبغات متكررة انه يعيد الحيوية ويظهر بشكل صحي وبنفس الوقت النتايج مو على طول فيحتاج وقت .. اوقات احس اني ياريت اخذت النسخة الثانيه منه اللي يجي على شكل ضغاط كريمي لاني هالمائي ماشوفه (لازم اشوفه عالشعر عشان اقتنع هههه) بس بستمر فيه ..

سعره : ٩٠ ريال




ردكن بلوند قلام بلسم لتعزيز اللون البلاتيني |  Redken Blonde Glam Color Enhancer Conditioner
كانت اخر حبة عالرف ، ومسكتها لاني كنت ادور اشياء متخصصه في الشعر المصبوغ باللون الفاتح جداً .. وجا الفلبيني يتكلم وانه شامبو ويمدح .. انا انويت عليه لاني كنت لسه ماوصلني الشامبو البنفسجي اللي طلبته من امازون وماجبت معاي من الطايف اللي فك لي الازمة (بقول لكم عنه شوي) فقلت باخذه للطوارى .. وانا عنده استآذنت وفتحته عشان اشوف اللون .. الشامبو البنفسجي الزين اللي يتوصى فيه للشعر الفاتح الرمادي لازم يكون لونه بنفسجي غاااااامق جداً ، وهذا شفته بنفسجي موڤ بس غمضت واخذته .. المنتج هذا مو شامبو ، هو بلسم معزز للون اوالخصل الفاتحة ،، يعني المجموعة اكتملت بالصدفة ههه ..

سعره : ١٤٠ ريال

ملاحظة: (اسعار المنتجين في موقع امازون اقل بفرق ٢٥ ريال وهو فرق مقبول)



بروتين كومبلكس سيلڤر شامبو | Protein Complex Silver Shampoo
هذا الشي جمييل جداً والاحلى اني لقيته صدفة عندنا :) ،، لما صبغت شعري قعدت ادور وين ممكن القى شي عبال مايشرفون طلباتي من امازون ، ولاني كنت لسه في الطايف قبل اروح الشرقية ، رحت لمحلات تجهيز الصوالين و المتخصصه بالشعر ، لقيت هالشي في محل العسلي (اللي كان محمود سعيد) الموجود في شارع شهار ..
جربته وعطاني من ثاني مرة لون رمادي رمادي للخصل الشقرا .. حبيته كثيررر ..
حجمه ألف مل وسعره الاجمل ٣٥ ريال ..

يعني اتوقع لو بروح مكان منا ولا منا باخذ هذا ، بعبيه في علبة للسفر ... حبيته طيب! ههه ..



ماسكات للشعر من لوريال |  Loreal Hair Masks
ماشريتهم طبعاً مرة وحدة ،، اول واحد شريته كان اللي عاليمين تحت ، وهو مخصص للشعر المصبوغ .. ترطيبه حلو .. بس عشان لونه البرتقالي خفت يأثر على لون الصبغة ،، سمعت ان افضل المنتجات للشعر المصبوغ باللون الاشقر الرمادي تكون باللون الابيض مش اي لون ثاني .. خففت استخدامي وشريت الثاني عاليسار تحت وكان لونه ابيض و ريحته حلوة و ترطيبه كمان .. اما افضلهم المتربع فوق ، جميل جداً ريحته و ترطيبه ولهو بزيت الارقان و فيه حماية من الحرارة ..

سعر الواحد: ٣٩ ريال متوفر في السوبرماركتات والصيدليات 



وِيلا برو سيريس شامبو و بلسم للشعر المصبوغ | Wella Pro Series Shampoo & Conditioner for Colored Hair
جتني فترة شفاحة كل شي للشعر المصبوغ شريته (منقطعة عن الصبغات صارلي سنتين وعدت بقوة ههه) شفتهم في السوبرماركت واخذتهم .. حلوين مرة .. والبلسم ترطيبه حلو مررررة .. قوامه ثقيل ويغنيني عن الماسك للشعر ..
اسعارهم ما اذكرهم للاسف .. لون الشامبو والبلسم ابيض .. يعني مافيه خوف ان الصبغة يتآثر لونها كثير ،، مع العلم ان الشعر المصبوغ لازم تقللين من غسله وتعريضه للماد عشان ما يروح و يخف ..



شامبو بي ستايل للشعر الاشقر | B Style Shampoo for blonde hair
هذا اول شي شريته بالنسبة لمنتجات الشعر المصبوغ ، وانا في المحل (محل تجميلي عادي في الطايف البرج) قريت عليه انه للاشقر وشفت البنفسجي قلت يمكن هذا اللي يتكلمون عنه (الشامبو البنفسجي) ولاني استحيت افتحه اخذته ولما رجعت البيت لقيت لونه اصفر (فيه بابونج اللي اتوقع يساعد في دوام اصفراراية وتشقير الشعر) .. حسيته عادي يعني ..
سعره ٣٥ ريال ..

مشتريات من بوتس | Boots


يوسيرين اكوا كريم ترطيب للوجه و محيط العين | Eucerin Aqua Porion Active Moisturizing Cream & Eye

قريت عن هالشركة كثير .. هي شركة طبيه و منتجاتها مناسبة لاغلب انواع البشرة .. كريمي اليومي من ايستي لودر المعتاد خلص وماشيه عالعينات منها ،، حبيت اجرب شي ثاني قبل ما ارجع اشتري من ايستي لودر ،، هذا الكريم اخترته وفرحت لما شفته في بوتس ،، كل شي احسه ماعندنا بس لقيت الشركة بمنتجات محدودة في بوتس واخذت اللي ابي .. الكريم المرطب للوجه استخدمه في الليل لانه مافيه حماية من الشمس (قريت عنه واللي كنت ابغاه فيه حمايه من الشمس بس ماكان متوفر) فخليته في الليل او النهار عالرقبة .. كريم العين للترطيب محيط العين ، مو مذكور انه لاي شي ثاني مثل محاربة تجاعيد او هالات او انتفاخات ، بس ترطيب و كنت بحاجته لان منطقة ماحول العين صارت جافة من التنظيف اليومي من المكياج وهذا حل لي المشكلة و عطاني الترطيب اللي احتاجه .. وبما ان استخدامي كان في اواخد رمضان وحالة العين والهالت من التعب والسهر كسيفة ، جربت هالكريم لمدة يومين والحمدلله خفت اثار التعب مع الترطيب .. الحل في الترطيب من جد ..

سعر كريم يوسيرين المرطب للوجه : ١٠٠ ريال
سعر كريم يوسيرين لمحيط العين : ١٠٠ ريال

كان فيه عرض في بوتس على هالمنتجات ، اخذ اثنين والثالث مجاناً ، واخذت كريم ثاني للوجه :)




الشامبو الجاف من تريڤرسوربي | Trevorsorbie Dry Shampoo
لاني ابي اقلل من غسل شعري وتعريضه للحرارة في كل مرة ، الشامبو الجاف يفك ازمة .. 
كان عندي واحد بس ماجبته معاي للشرقية وهو اكثر واحد منتشر والحجم الكبير بعد .. 
احتجت واحد وبشدة ، فـ رحت بوتس اباخذ نفس النوع بس حجم اصغر وانقهرت مافيه الا الحجم الكبير ومستحيل اشتري شي وهو عندي اصلاً .. والحجم الصغير اللي متوفر عندهم فيه لون وانا مابي لون .. 
فـ كمحاولة اخيرة سألت البائع مع اني بيني وبين نفسي قلت شبيدريه بس والله ماتوقعت قالي ابشري وجابلي هالدراي شامبو من شركة جديدة اول مرة اشوفها (بوتس الدمام الشاطي متحسن مو زي اول ههه) بس سعره خلاني اقول ليش! هههه سعره بهالحجم مثل سعر اللي عندي بحجمه الكبير .. لما رحت البيت ، اختي الجميلة (هاي هدووو) اللي سآلتها من قبل اذا عندها شامبو جاف وقالت لا ، مع اني اذكر انها شاريه واحد وانا معها من قبل بس قلت اوكي لاأ لاأ ، ولما شافته معي قالت انا اصلا ما ناسبني الدراي شامبو (النوع الاخضر ذاك ونفس اللي عندي في الطايف) وقلتلها وينه ياحلوة ؟؟ قالت عندي :((( يعني خسارة الدراهم خخخخ ... المهم قلت ابجربه وامري لله شي جديد .. بس والله فرق فرق .. الدراي شامبو ذاك العادي يترك طبقة بيضاء واضحة مهما بعدتيه عن الشعر في التوزيع وريحته مرة واضحة .. اما هذا لا لا .. يدوب يبين و يعطي فعاليه في امتصاص الدهون في جذور الشعر .. حبيته وشروة بالمصادفة جميله :)

سعره :  ٥٠ ريال



فلكسيتول كريم للأظافر وماحولها | Flexitol Cuticle & Nail Cream
كريم شريته وقت الكرف في رمضان ، من بندة .. كنت ادور لترطيب الشفايف بس مالقيت الا هذا و مندعس ورا في الرف هههه .. ترطيبه حلوو وجميل و زود بياض الظفر (الجزء الخارجي البعيد عن الاصبع) بعد ماكان شبه شفاف من التعرض المستمر للماء (الكلمة اللطيفة لغسل المواعين ههه) من جد يعطي ترطيب ونتيجة حلوة .. ريحته يمكن غريبه وكنه شي مار علي بس ماذكر بس على النتيجه اللي يعطيها قابله ..

سعره: ٢٦ ريال


منتجات مكياجية متفرقة ..


بعض المنتجات ذكرتها في الانستقرام .. بس لتجميعهم في موضوع واحد .. بذكرها في اخر الموضوع ..


فرش الكابوكي من سنسي | Sensi Kabuky Brushes
فرش المكياج الكابوكي .. اللي تناسب في استخدامها للمنتجات الكريميه ، شفته في سنسي/المصباح فرع المطار ، حبيتهم مرة وماترددت اشتريهم لاني اول مابديت في حب الفرش للمكياج ، كان اول طقم فرش من سنسي وجودتهم حلوة وكل شي وسعرهم مرة مناسب (مادري اذا لسه متوفرة) فاخذت هالفرشتين الكابوكي ..

سعر الفرشة الوحدة : ٢٠ ريال :))))



روج مطفي ويبد كاڤيار من ان واي اكس (نيكس) | NYX Matte lipstick Whipped Caviar
دوشتني فيه اختي  .. تمدح فيه .. شريته عشانها هههه .. من اسمه انه مطفي بس لا مو مطفي .. نهايته كريميه ماتنشف الشفايف .. ولونه زهر وردي اساسه ازرق يعني يناسب البشرات الباردة شوي يمكن على بعض البشرات يبان كنك مريضة ويطلع مو مناسب .. انا نفسي ممكن يختلف شكله علي مع الوقت يعني يوم يطلع حلو ويوم لا .. حسب حرارة البشرة واذا هي شاحبة وكذا ..

سعره : ٣٩ ريال في ستاندات ان واس اكس في سنتر بوينت




مناكير تابو من شانيل | Chanel Nail polish TABOO
من لحسة البنترست ، حبيته من اول نظرة شفته فيها وسواتش له .. قعدت ادوره لما كنت في الرياض .. واخيراً لقيته في فرع سيفورا بانوراما .. اللون جميل واول مناكير لي من الماركات الهاي اند (الماركات الغالية) حافظة تقريباً اغلب الالوان من المناكيرات الثانيه من الشركات اللي تعتبر ارخص بس ذات جودة ، بس ماكان هاللون من ضمنهم ..
هالمناكير شي مميز و جودته عاليه ، ينشف بسرعة و يبان اللون من طبقة وحدة ..
كان من ضمن المشتريات اللي حطيتها في الانستقرام هنا

سعره : ١٣٠ ريال



قلم الكحل البيج من شانيل رقم ٦٩ | Chanel Le Crayon Khol 69 Cair
 افضل قلم بيج للحين .. جميل و لونه مناسب لتنوير داخل العين واعطائها اتساع .. الدرجة مناسبة جداً ..
بعد بحث طويل لقيته في دبنهامز فرع الظهران مول .. يجي معه في العلبة برّاية .. شي ههه ..
سعره : ١٢٠ ريال

وهذا سواتش له من بوست على الانستقرام من قبل .. (اضغطي عالصورة)





ظلال العيون من شانيل رقم ٢٣٢ في مجموعة الربيع | Chanel Eyeshadow 232 Spring Collection
الالوان:
الاعلى: لون اخضر ثلجي
اليمين: وردي فاتح
اليسار: فضي معدني - لون يجمع بين الاخضر التوبي (اللون التوبي هو اللي يكون من درجات الرمادي) مع نهاية معدنية اللون اللي بتوزيعه ممكن يطلع اكثر من لون .. متموج
الاسفل: فضي غامق على رمادي مع مسحة من اللون الاخضر الالوان جميلة .. عجبتني كثير .. عيب شادوات شانيل في بعض الاحيان تحتاج برايمر لوضوح اللون .. انا استخدم البرايمر مع كل الشدوات ..

سعرها ٢٨٠ ريال




مناكير من او بي آي نيد سن قلاسيز | OPI Need Sungalasses!
لون مش اصفر ،، جاي على لون المنجا .. جميل جدا ومايحتاج الا طبقة ونص في بعض الاحيان عشان يبان بوضوح ..
حلو مرة لهالصيفية ..
من سيفورا وسعره : ٤٩ ريال


حمرة خدود دِزرت روز من ماك | MAC Dessert Rose Matte Blush
حمرة خدود من ماك مطفيه ، لونها وردي مايل نتفة للموڤ ..
تكلمت عنه اكثر في بوست سابق عالانستقرام هنا .. او اضغطي عالصورة ..
سعره :  ١٢٠ ريال


قلم للحواجب من لوريال | Loreal Eyebrows Pencil
ماكان فيه الا هذي الدرجة .. بصراحة ماحبيته كثير ، ناشف .. واللون يالله يبين لازم تضغطين اكثر من مرة عشان يطلع اللون .. يعني لما تحطينه عادي كنه ظل مو واضح .. لحين ماحبيته كثير ومن المنتجات اللي انحطت في الدرج الين اعطيها فرصة ثانيه ..
سعره ٣٩ ريال من سنتربوينت



ايلانرات سائلة من لانكوم و محمود سعيد |  Artliner from lancome & MS eyeliner
اثنينهم حلوين .. بس حق لانكوم احلى بعد ، اقصد من ناحية سهولة الرسم.
سواد الايلاينر من محمود سعيد حلو ويدوم لفترة طويلة ..

الآرت لاينر من لانكوم سعره : ١٧٠ ريال
الايلاينر من محمود سعيد سعره : ١٥ ريال


مسكارات من ڤيكتوريا سيكرت | Victoria Secrets Mascaras
لاني حبيتهم .. هالمسكرتين مع بعض قمال آوي .. الوردية لاني خفت تخلص شري منها اثنين وتنفع للاستخدام اليومي وتعطي شكل طبيعي وتفرق الرموش وتعطيهم طول ،، السوداء تعطي كثافة ،، ولك ان تتخيلي ثنتينهم مع بعض كيف!
خفاف عالرموش و ماتكتل ولا شي ..

سعر المسكارا الوردية : ٥٠ ريال
سعر المسكارا السوداء : ٧٥ ريال

هنا الفرق في فرشة كل وحدة فيهم :)


___________________________


ألقاكم في مواضيع قادمة ..
مع السلامة :*





ليصلكِ الجديد ؛ اشتركِ معنـا
Subscribe to our mailing list


57 comments

  1. ماشاء الله تبارك الله تتهني هيووو

    ReplyDelete
  2. ماشاء الله جداً جممميل البوست, تتهنين فيهم ياربي ❤❤
    بالنسبة لسيروم ايستي لودر سعره حول الـ ٦٠٠ ريال هنا, وفيه موقع كويس وموثوق دايماً أطلب منه وسمعت من بنات كثير انه يوصل للسعودية وفيه عنده كل الماركات اللي تبينها واهم شي ايستي لودر
    http://shop.nordstrom.com
    كحل شانيل البيج, دورته بسيفورا الرياض قالولي مقطوع :( انشاء الله على نهاية الأسبوع هذا بأكون بالشرقيه
    لازم اشتري كحل شانيل و الفرش اللي من المصباح حمستيني عليهم

    ReplyDelete
    Replies
    1. هلا والله حبيبتي رناا
      يختي على السيروم والله فررررررق :)
      قبل فترة قصير سجلت في النوردستورم بس اذكر من قبل انهم مايوصلون ايتسي لودر للسعودية بس بتآكد شكلهم غيروو
      تسلمين حبيبتي منورتني
      :*

      Delete
  3. تتهني هيا مشتريات عجييبه ودخلتي في بالي كذا منتج بس نتطره تسوي بوست عن واحد واحد فيهم وتقولين لنا النتايج

    ReplyDelete
    Replies
    1. الله يهنيك ابشري ان شاء الله
      نورتيني :*

      Delete
  4. ماشاء الله تتهنى بمشتريتك

    ReplyDelete
  5. ❤❤بوست جميل يعطيكي العافية هيا حطيت كم حاجة في اللستة

    ReplyDelete
    Replies
    1. الله يعافيك ياسمين
      شكراً لمرورك :*

      Delete
  6. يعطيك العافية هيا جميلة ومميزة كعادتك
    :)لانه عندي Kiehl's طبعا المنتجات اللي بتكتبي عنها اثق انها من المنتجات المميزة انبسطت كثير لما شفت انك بتدوري على كريم
    اما بخصوص كريم جوز الهند صار فيني مثلك رغم اني قريت كلامك انه خرب مع الحر لكن ماتوقعت يخرب عندي كمان لان الجو عندنا ابرد شوي
    سالفتك مع شعرك عجيبة تذكرت شعري صابغته خلال الشهر اللي فات مرتين ولا فكرت اسوي نص اللي سويتيه ماشاء الله عليك

    ReplyDelete
    Replies
    1. الله يعافيك اميره حبيبتي
      نورتيني :*

      Delete
  7. صباح الشوبينق والروقان ..

    منتجات حلوه أضفت لقائمتي كم منتج حبيتهم وان شاء الله بشرتيهم قريب
    كريم العين من أستي لودر جربته وحلو .. ولكن مو هذا الإصدار القديم
    أكثر شي الإنتفاخ عندي راح في فتره بسيطه

    بالعافيه عليك : )

    ReplyDelete
    Replies
    1. الله يعافيك يارب
      اسعد الله اوقاتك
      :)

      Delete
  8. ❤❤بوست جميل يعطيكي العافية هيا

    ReplyDelete
  9. بوست طووويل بس جدااا مفيييييييييييييييييييييد اتعب وانا مفيد
    كنت بسالك عن الدراي شامبو تقصدي بالاخضر
    Batiste
    لاني حابه اجربه الفتره الجايه

    يعطيك العافيه

    ReplyDelete
    Replies
    1. الله يعافيك
      ايه بالضبط هو الشامبو الجاف
      :)

      Delete
  10. يعطيك ألف عافية على شرحك المفصّل
    هذي أول تدوينة أقرأها لك و بصراحة شديتيني بعفويتك و إنك ما تحاولين تفردين عضلاتك ببعض المفردات الإنجليزية الي تصعب على بعض القارئات وإنك كمان كاتبة شرح على كل كلمة .. برافو عليك
    -
    اما بالنسبة للمشتريات فجعلك بالجنة يا شيخة .. الكحل الي من محمود سعيد دايمًا اسرقه من عند بنات خالاتي وأخيرًا عرفت من وين اجيبه لان الي عندي ممسوح الكلام الي عليه
    و حابة اسألك عن مايونيز الشعر .. تنصحيني اشتريه ؟ شعري جاف لكن مو الجفاف الي يتكسر او يتساقط لكنّه ينتفش ولونه باهت شوي :(

    ككل يعطيك العافية على التدوينة الجميلة وبانتظار تدويناتك الجاية ♥♥♥♥

    ReplyDelete
    Replies
    1. الله يعافيك ياريم شكراً والله ..

      بالنسبة لمايونيز الشعر حلووو مرة كتغيير اذا حابة تجربين شي جديد وعندك قدرة للطلب من الانترنت ..

      شكرا مرة ثانية ريم اسعدتيني
      :*

      Delete
  11. اذا مافيه ازعاج و تعب عليك ..
    ممكن تحطين روابط المنتجات اللي اخذتيها من امازون
    لان هناك كثير قالوا لي لا تطلبين الا من شخص موثوق!
    شكراً اد الدنيا البوست مره جميل
    و دائما اتسفيد من كلامك و شرح الجمييييييل <3
    يسعدك ربي..

    ReplyDelete
    Replies
    1. ابد لا ازعاج ولا شي
      تم اضافة الروابط للمنتجات من موقع امازون
      :*

      Delete
    2. لو سمحتي انا بجده حاولت اطلبو علا امازون بس ردو انو ممنوع شامبو من وين احصله بجده

      Delete
  12. بوووست اكثر من روعة ، الله يعطيك العافيه هيا ❤❤❤

    ReplyDelete
    Replies
    1. الله يعافيك جوجو حبيبتي
      :*

      Delete
  13. هياا انقذيني ممكن تحطين رابط الشامبو البنفسجي عشا اشترية مالقيته بالمواقع

    ReplyDelete
  14. ماشاالله تجنن مشترياتك
    انا طلبت زيت جوز الهند العضوي نفس حقك من امازون وصحبتي في امريكا جابتلي هوا وكان سايح
    ايش معناته يعني حقي انخرب ول كيف ولسا ما استخدمتو

    ReplyDelete
    Replies
    1. لاماخرب بس هو من الحرارة ساح ، حطيه في الثلاجة وقت ماحتستخدميه ولما تحتاجيه طلعيه قبلها بوقت عشان يذوب شوي
      :*

      Delete
  15. مدونتك رائعة و تصويرك جدا جدا جميل ما شاء الله
    ايش رايك بسيروم الوجه ؟ ع قد المدح ؟ يعني كيف صارت بشرتك معاه ؟
    يتاسب البشرة الجافة ؟

    ReplyDelete
    Replies
    1. السيروم جميل وناسبني
      واعتقد انه يناسب البشرة الجافة

      شكراً جزيلاً للطفك حبيبتي
      :*

      Delete
  16. اخاف من التجاعيد بشكل وامي تقول من كثر ماتشيلين وتهتمين لها بتطلع لك :( لا يا منبع الحنان مو كذا كسرت مجاديفي هههههههههه ان شاء الله ناويه ع حق ايستي لودر لاني جربت كريم العين من اورجنز و ماحسيت له فايده يمكن لاني لسى 26 سنه مابعد ظهرن التجاعيد بسألك كيف طريقتك بسيروم العين لان شفت مره اخصائيه تحطه طبطبه على محيط العين مو ع الهالات نفسها !! استغربته
    ومسكرات فكتوريا ناويه عليها وحمستيني

    ReplyDelete
    Replies
    1. ايه بالضبط ، كريمات العين تتوزع بالطبطبة و بطبيعة الحال حتغطي مكان الهالات
      :)

      Delete
  17. الله يسعدك ويوفقك مرره استفدت منك كل الاحترام وتقدير لك

    ReplyDelete
    Replies
    1. ربي يحفظك
      شكراً جزيلاً لك و لرقتك
      :*

      Delete
  18. ما شاء الله اللي شدني في هالبوست كذا منتج ناوية اشتريهم وتصويرك والالوان اللي من جد تـــــأخذ العقل... بغيت اسألك وش اسم وموديل كاميرتك

    ReplyDelete
    Replies
    1. هلا عهود ،
      شكراً على كلامك الجميل :)

      كاميرتي
      Canon 7D

      Delete
  19. انت وينك!
    توني احصل البلوق تبعك!!
    الله يسعدك ... تجاربك افادتني كثير ... شكرا

    ReplyDelete
  20. أنت وينك!!
    توني أحصل البلوق تبعك ... الله يسعدك يارب ..
    كثير استفد من نصايحك
    شكرا بحجم السماء,,,

    ReplyDelete
  21. ماشاءالله مرتب وممتع ربي يسعد قلبك

    حبيبتي بسألك عن الشركه اللي شحنتي فيها مشترياتك ؟؟

    ReplyDelete
  22. ربي يسعدك استفدت كتير من المشتريات
    بس بتمنا انك تسوي موضوع طريقة الطلب من الامازون وباي شركة شحن تدخل المواد التجملية على السعودية
    ومشكورة كتير على كل شي بتقدمي في مدونتك

    ReplyDelete
  23. الله يسعدك مرره استفدت منك

    ReplyDelete
  24. يعطيك العافيه يارب والله روعه مشترياتك
    آيهيرب بالعربي

    ReplyDelete
  25. مرحبا هيا .. كيفك .. شفتك بالسناب يوم وصلت اغراضك حقت امازون وشفت الشامبو البنفسجي ف دخلت مدونتك عشان اعلمك تجربتي معاه .. الشامبو جربته قبل سنتين جابته اختي من امريكا طبعاً ينباع بالصيدليات عندهم حلو ولابأس فيه بس نتيجته تبان ببطئ
    الشركه هذي رخيصه نوعا ما وجا مره اتابع بيوتيوب بلوقر ويوتيوبر اسكتلنديه مدحت شامبو من شركه اسمها
    fudge
    ادخلي موقعهم اون لاين هي شركه لمستحضرات الشعر شامبوهات وكذا .. المهم طلبت الشامبو كان تقريبا ب ١١٦ ريال على ما اذكر وجربته رووووعه من اول استعمال بين معي واستعمله مره كل اسبوعين او كل ماشفت شعري رجع للاشقر الواضح لان يوم استعملته كل اسبوع شعري صار رمادي رمادي .. وحبيت مدونتك مررره 💓💓 بالتوفيق

    ReplyDelete
    Replies
    1. مرررة شكراً عزيزتي ماقصرتي على المعلومات
      افدتيني الله يعطيك العافية
      :*

      Delete
  26. من فين لقيتي الشامبو الجاف الي ف الطايف 😟 فرفرت الطايف مالقيت

    ReplyDelete
    Replies
    1. من صيدلية بوتس مالهم فرع في الطايف حالياً

      Delete
  27. فرش سنسي له رقم او اسم ولا اشتريه كده بالنظر ؟؟

    ReplyDelete
  28. فرش سنسي له رقم او اسم ولا اشتريه كده بالنظر ؟؟

    ReplyDelete
  29. فرش سنسي له رقم او اسم ولا اشتريه كده بالنظر ؟؟

    ReplyDelete
  30. هلا عزيزتي
    حبيت اسألك عن زيت جوز الهند اذا من داخل سايل او كريمي
    ويعطيك العافيه

    ReplyDelete
  31. روعة مشترياتك وفي اشياء مانتبهت لها قبل مااشوف البوست هذا
    شكرا لك ياجميلة ♥
    مدونة آيهيرب بالعربي

    ReplyDelete
  32. عجبتني مشترياتك روعه..استمري
    موقع اي هيرب بالعربي

    ReplyDelete