آساس دبل وير من ايستي لودر

بسم الله الرحمن الرحيم

و آخيراً .. ريفيو عن اساس دبل وير من ايستي لودر .. نبدأ .. 

وصف المنتج : من موقع ايستي لودر*

ثبات لمدة ١٥ ساعة ، تغطية كاملة طوال اليوم بشكل طبيعي و نَضر حتى خلال الآجواء الحارة و الرطوبة وانتي في نشاط مستمر ..

لن يتغير لون الآساس على البشرة او يتلطخ / يبقع على الملابس.

خفيف و مريح على البشرة.

المنظر المتكامل لبشرتك و الذي ترينه في الصباح هو الذي سيبقى طوال اليوم.

رأيي :

مناسب لـِ : البشرة الدهنية و المختلطة (الجافة ممكن ان يسبب ظهور قشور لو كانت شديدة الجفاف)

التغطية : كاملة

النهاية : مطفي

عمله : يوحد لون البشرة بحيث يخفي اثار الحبوب والتلون

التوزيع : فرشة الآساس (الستيبلينق او البفينق برش) او اسفنجة التوزيع - لا آفضل الآصابع لانه ممكن يكون طبقات ويطلع غير متناسق

نسولف :

مع قصة الحب اللي اعيشها مع منتجات ايستي لودر الا اني ماعرف السبب الحقيقي اللي ماخلاني افكر في اني استخدم هذا الاساس من قبل على الرغم من سمعته في التغطية وشكله الجميل على البشرة. في يوم من الآيام شفت اختي في العيد وكانت بشرتها بشكل اقدر اوصفها (فوتوشوب) يعني انا عارفة بشرتها عالطبيعة و مع اساسات ثانية و كنت متأكدة ان فيه شي جديد استخدمته هالمرّة .. سألتها وكانت اجابتها دبل وير! من يومها قررت اجرب هالجميل وفي اقرب زيارة لكاونتر ايستي لودر مارحت كالعادة ووقفت عند منتجات العناية ، رحت سيدا للتجميل والآساس .. درجات كثيرة و متقاربة شي يحيّر مثل كل مرة تختارين فيها تجربة آساس جديد .. حطيت عيني على درجة وفي زيارتي لمحل ثاني يوفر منتجات ايستي لودر البائعة هناك نصحتني اجرب درجة و جربته عندها وكان لونه طبيعي مو فاتح ولا غامق .. وتوكلت على الله و آخذته .. 

في استخدامي الأول لدبل وير زعلت نتفة لان الدرجة غمقتني بدرجتين عالآقل!! بس كملت توزيع الآساس وفي نهاية المكياج حبيت الشكل و درجة اللون اللي عطاني اياه .. يعني اول ماحطيته كان غامق ومع الوقت تشربته بشرتي وصار كآنه لونها الآساسي ،، اعتقة اني محظوظة كفاية ان المنتج تآكسد بشكل جميل (تآكسد يعني ممكن يكون لون ثاني بعد توزيعه عالبشرة وتعرضه للهواء) ..

في استخدامي له في المرة الآولى ولما جا وقت التنظيف للبشرة اعتمدت الطريقة الاعتيادية لإزالة المكياج (حليب منظف - تونر) وثاني يوم بدت تظهر لي حبوب (او عالاقل من ثالث يوم) وعرفت انه منه بسبب انه ثقيل و يحتاج تنظيف للبشرة اكثر وبقايا المنتج اللي ماراحت سدت المسامات (في الذقن و الجبهة و حول الأنف) وظهرت الحبوب. 

في استخدامي الثاني بعد فترة و الحبوب راحت ،، استخدمت الآساس عند ازالته اتبعت نفس الطريقة السابقة (حليب منظف - تونر) وتبعته بالغسول .. وما ظهرت لي اي مشاكل في تكون الحبوب ..

تغطية الدبل وير كاملة بالنسبة لي ماحتجت معها استخدم آي كونسيلر لآثار التلون عالوجه .. استخدمت فقط ستوديو فينيش كونسيلر من ماك لإضاءة ماتحت العين .. 

في الآساسات السابقة في نص المناسبة اول مكان يبدا يدهن ويروح منه الآساس هو الأنف، معه مالاحظت هالشي وفوق هذا انا عندي مشكلة الرؤوس السوداء عالأنف وغطاها بشكل كامل كأنه ماعندي هالمشكلة حتـى مع الوقت مابينت او راحت منها التغطية. لو كانت منطقة الانف تدهن عندك بشكل كبير ممكن تثبتينه او تعيدين عليه باستخدام البودرة اللي تمتص الدهون لإخفااء اللمعة الدهنية بس اذا احتجتي ..

آساس دبل وير من ايستي لودر بجد يستحق التجربة وبالنسبة لي افضل آساس لاي مناسبة او حتى اذا حابة تغطية متكاملة في حال فقط اخترتي الطريقة المناسبة لإزالته بشكل مناسب.

تجربتي في نقاط :

- قوامه شبه سائل

- العلبة زجاجية بسعة ٣٠ مل

- مافيه ضغاط وهو العيب الوحيد ، يعني ممكن يطلع لك اكثر من الحاجة

- درجتي في الآساس (الغامقة اللي اعجبتني) هي 3c2 PEBBLE

- الكمية الزائدة عن الحاجة ممكن تظهر بشكل طبقات

- عند توزيعه يفضل السرعة لانه ينشف

- استخدم فرشة ١٨٧ من ماك (الستيبلينق برش) في توزيعه بحيث احط كمية على ظهر يدي واخذ من المنتج على الفرشة وابدا في توزيعه على البشرة

- استخدمته لمدة ٩ ساعات ولا آجمل 

- مايبقع على الملابس ولا حتى له اثر عالنقاب هههه

- سعره ٢٣٠ ريال 

- منتجات ايستي لودر متوفرة في : دبنهامز - وجوه - فافافوم - باريس قاليري

الختام .. حبيته ، اعتقد اني ممكن استخدمه في النهار باستخدام فرشة ماك اللي ذكرت لمظهر طبيعي وخفيف بس للحين مارسيت اذا باخذ نفس الدرجة لما يخلص او درجة افتح .. في كل الآحول منتج جميل جميل هذا وانا ماحب شي يغمقني نص درجة بس الحب ههههه ..

ألقاكم في مواضيع قادمة :)

مع السلامة :*

ليصلكِ الجديد ؛ اشتركِ معنـا
Subscribe to our mailing list