منتجات تنظيف البشرة من شانيل

بسم الله الرحمن الرحيم 

و أخيراُ .. موضوع منتجات شانيل لتنظيف البشرة .. اشتريتها من رمضان .. يا سرع الدنيا .. يعني تقريباً صار لي استخدمها اكثر من خمس شهور .. ولهالوقت اعتقد انها كافية اني احكم عليها وكيف تأثيرها على بشرتي .. وما اذا عجبتني او لأ ..

نوع بشرتي :

- مختلطة ( اتي زون دهني وبقية البشرة عادي/جاف)

- ناضجة 30+

- تتكون الحبوب بسب الهرمونات من فترة للثانية بس مو دايم

- كنت استخدم قبلها غسول ايستي لودر ومنظف بيودرما وافن لإزالة المكياج (في موضوع سابق ذكرت الروتين هِــــنا )

DÉMAQUILLANT YEUX INTENSE Chanel

Eye Makeup Remover

مزيل مَكياج العيون من شانيل

مكوناته :

مستخلص من ماء وردة الذرة و ماء الورد لتهدئة منطقة العين الحساسة

استخدامي و تجربتي :

أفضل مزيل مكياج للعين استخدمته!! بإختصار ..

كنت قبل استخدم بيودرما في إزالة مكياج العين .. والمنتجات اللي استخدمها للمكياج ماهي ضد الماء .. وكان حلو مايسبب جفاف للبشرة بس كان مايعطي ترطيب للعين وللمنطقة اللي حولها .. بس كان مناسب ..

مزيل مكياج العيون من شانيل .. كلمتني عنه البائعة المسؤولة عن شانيل .. وبصراحة اغراني سعره وشفت انه ماراح اخسر شي لتجربته .. خاصة انه من شانيل ..

لو تشوفون العلبة تلقون السائل فيها منفصل يعني لازم قبل الاستخدام تخضين العلبة ومكوناته اللي هي عبارة عن ماء ورد (رائحته مو مبينة ابداً ولاّ كان انتبهت لها لأني مو من محبي رائحة ماء الورد و ألقطها على طول) و ماء زهرة الذرة.

المكونات هذي تعطي ترطيب او بالأحرى ماتترك منطقة العين جافة .. بعد ما أخض العلبة احط كمية منه على قطنة واحط القطن على منطقة العين واخليها ثواني وامسح .. ونفس الشي للعين الثانية .. إزلة المكياج ماتاخذ وقت .. وتشيل المسكارا بسهولة ولا تسبب حساسية او تهيج للعين ..

ومن الأشياء الممكنة لاستخدام المنتج لو كانت بشرتك حساسة جداً ممكن تستخدمينه في إزالة المكياج .. انا مخليته للعين فقط ..

سعره : 150 ريال
منتجات شانيل متوفرة في : دبنهامز - وجوه - سيفورا - فافافوم

العلبة خلصت خلال 5 شهور واستخدامي لها كان ثلاث - اربع مرات في الأسبوع .. وشريت علبة جديدة .. :)

Chanel Lait Douceur

Cleansing Milk (Face and Eyes)

الحليب المُنظف من شانيل (للوجه والعيون)

استخدامي و تجربتي :

لإزالة مكياج الوجه من اساس وبودرة .. استخدم هذا الحليب المُنظف من شانيل وهو للبشرة المختلطة (الكتابة بالوردي) وفيه انواع ثانية .. العلبة كبيرة والكمية بنفس استخدامي للمنظف السابق ( ثلاث - اربع مرات في الأسبوع) ولسه باقي فيه كثير ..
العلبة تجي بضغاط جميل .. يعني ضغطتين تكفي بزيادة بيين اصابع يديني وامسح فيه على كامل الوجه و راح تحسين بالحليب الكريمي تحول ل سائل من حرارة البشرة .. وبعدها بالتونر اللي بذكره بعد شوي ..

مكتوب انه ممكن يستخدم للعيون بس  ماجربته ..

كنت استخدم الحليب المُنظف من افن .. بس قوام افن كان أكثف .. وحق شانيل أخف بكثير مايدبق لدرجة وانتي تمسحين فيه على وجهك يروح اللون الحليبي ويصير كأنه سايل زيتي خفيف .. شي شي .. حق افن كان حلو بس اضطر اغسل وجهي بعده لأنه ثقيل ومخصص للبشرة الجافة اكثر ..

خلال استخدامي مالاحظت أي حبوب او تهيج لبشرتي .. لان بشرتي من النوع اللي من أول استخدام تتأثر اذا كان المنتج سيئ .. مع الوقت قلت كثير مشاكل بشرتي .. والحبوب .. اتوقع انه له علاقة بان هذا المنظف من جد يحمي البشرة من التلوث و يزيل المكياج بشكل فعال ..

رائحته غير قوية .. بس اذا كنتِ حساسة تجاه الروائح الأفضل تجربين قبل الشراء .. عن نفسي ريحته احبها وخفيفة (نظافة)

ميزة الحليب المنظف من شانيل مثل ماهو مذكور عالعلبة ( وراح تشرح لك البائعة هذا الشي بالتفصيل) انه يعادل لك البشرة ويحميها من التلوث .. يجي هو ومعه التونر .. منفصلين ..

سعره : 205 ريال
منتجات شانيل متوفرة في : دبنهامز - وجوه - سيفورا - فافافوم

___________________

Chanel Lotion Douceur

Gentle Hydrating Toner

قابض المسام من شانيل

استخدامي و تجربتي :

ااحب لا اشتريت شي من خط عناية اخذه كمجموعة! اعتقد اعتقاد كبير انهم يعطون فعالية اكبر وهم سوا .. 

هذا التونر (قابض المسام) للبشرة المختلطة (وردي وفيه أزرق لنوع بشرة اخر) استخدمه بعد الحليب المنظف ،، احط كمية منه على قطنه وامسح الوجه كامل وراح تشوفين بقايا المكياج .. مايترك بشرتي جافة ولا متهيجة .. 

الكمية اللي فيه تكفي لوقت طويل .. 

سعره : 205 ريال 

منتجات شانيل متوفرة في : دبنهامز - وجوه - سيفورا - فافافوم

___________________

Chanel Mousse Douceur

Foaming Mousse Cleanser

غسول الوجه من شانيل

استخدامي و تجربتي :
قبل، كنت استخدم الغسول المنظف من ايستي لودر .. قررت اغيره لما شفت بشرتي مع الوقت صارت تميل للجفاف وحبيت اغير من المنتج .. وشريت من ضمن مجموعة شانيل هذا الغسول ..
ميزته بما ان بشرتي مختلطة ينشف لي المنطقة الدهنية بشكل فعال وبنفس الوقت مايترك باقي الوجه جاف!
استخدمه في الصباح اغسل فيه وجهي واتبعه بكريمات العناية لليوم ..
من اسمه Douceur للتونر والحليب والغسول (معادلة وتوازن) اي يعمل على ابقاء البشرة بتوازنها الطبيعي .. وترطيبها بنفس الوقت ..
سعره : 205 ريال 

منتجات شانيل متوفرة في : دبنهامز - وجوه - سيفورا - فافافوم

ألقاكم في مواضيع قادمة :)

مع السلامة :*

ليصلكِ الجديد ؛ اشتركِ معنـا
Subscribe to our mailing list