مدونة هيا أدون ، اكتب و اُصور

DIY - سويها بنفسك : عمل حاجز جانبي متعدد الاستخدامات

بسم الله الرحمن الرحيم






موضوع اليوم عن طريقة عمل حاجز جانبي .. شفته في كاتالوق ايكيا وعجبتني الفكرة كثير ..

ممكن هالحاجز يكون لتغطية زاوية في الغرفة  او تغطية مكان تعليق الملابس اوممكن من الافكار اللي انذكرت لما حطيت النتيجة في الانستقرام (الأساسي وحساب المدونة)  تكون في غرف الأطفال ويكون خلفها مكان تغيير ملابسهم .. حبيت الفكرة :)




الأدوات :


- الخشب وهو وحدة جانبية من ايكيا وتتوفر بعدة احجام (طول) بس اللي كانت في المجلة واللي انا اخذتها هي اللي طولها 124 في 30 سم . . وتلقون معلومات اكثر عنها في موقع ايكيا هنـــا
سعر الوحدة : 59 ريال
العدد : 4



- أقمشة : اخترت أربع أنواع من الأقمشة و كلها من ايكيا واخذت متر واحد من كل نوع , لاني حبيت البارتشن اللي بسويه يكون ملون وطبعاً لكِ حرية ا لخيار ..
سعر المتر الواحد للقماش من 25 الى 35 ريال .. من ايكيا ..




- أدوات الخياطة : مقص - الشيك/شيك اللزاق (ماعرف اسم ثاني) - صمغ للقماش - كواية ملابس - متر قياس - لفة لتلصيق القماش بالحرارة من الجهتين (بذكر ملاحظة عنه) - دبابيس - طباشير قماش

لفة تلصيق القماش بالكوي : استخدمته في اول وحدة من الحاجز و كان متعب في الكوي مايلصق زين و ياخذ وقت.

شريت اغلب الأدوات من محل الزامل وتلقونهم في اغلب محلات الخياطة.

قبل استخدمت لصاق القماش بالحرارة من ايكيا و استخدمته مع الستاير وكان زين و أفضل من اللي شريته من محل الخياطة.



صمغ القماش من جرير (24 ريال) واستخدمت معه فرشة مكياج قديمة للتوزيع ..



- مفصلات : الحجم الصغير نفس حق البيبان شريتهم من محلات البناء الواحد بـ ريال واحد ..
شريت 9 على اساس بركب كل الأربعة الوحدات الخشبية مع بعض بحيث تربطهم المُفصلات (ثلاث) بين كل وِحدة بس بعدين غيرت رأيي واكتفيت بـ ثنتين بين وحدتين يعني الناتج زوجين منفصلين يربطهم اثنين من المفصلات (فوق و تحت).


العمل :

المقاس : تاخذين مقاس القماش بحيث يكون الجزء الظاهر هو اللي تبينه يبان في الخارج ، عرض الوحدة عشان تناسب هو 24 سم ووممكن تخليه 23 ونص .. وزيادة عليه 1.30 - 2 سم .. و المجموع اللي راح تقصينه من القماش هو 28 سم.



وممكن تستخدمين في تحديد مكان القص من الجهة الخلفية للقماش طباشير



بعد القص , تحسبين 2 سم وتصفطين القماش وتكوينه بالكواية عشان يصير فيه كسرة لتثبيته بالصمغ





بالفرشة , توزعين الصمغ في صفطة القماش وتضغطين عليه والأحسن انك تبدأين فيه كأجزاء مو كله مرة وحدة اسهل.




وتخلينه وقت وتشيلين القماش على جنب وتبدأين في القماش الثاني ..




-  تثبيت القماش على الوحدة الخشبية :

استخدمت الشيك شيك للتثبيت الخلفي ولأنها عريضة قصيتها من النصف .. حطيت القماش وركبته على الخشب وعدلته مقاسه الين يبان الوجه المطلوب من القماش وصفطته من الأعلى والأسفل و احدد مكان التثبيت واثبت الشيك شيك على القماش بصمغ القماش بحيث تكون متواجهتين ويثبتون على بعض .. الصور ممكن توضح اكثر ..




الحلو فيه انه ممكن اغير ترتيب الألوان على الوحدات ..




- تركيب الفصّالات :

اقيس من الأعلى 18 سم و من الأسفل بعد واخليه بداية لتحديد وين بثبت الفصالة



واثبت الفصالة بين وحدتين بحيث  يكون االلي بالوسط خارج شوي عشان الحركة ..
و بالمطرقة والمفك اثبت بالمسمار اللي يجي مع الفصالات ..


وبكذا مبروك عليك بارتشن - حاجز جميل ..






وبكذا خلص الموضوع .. ان شاء الله يكون الشرح واضح .. حاولت قد ما أقدر مانسى أي خطوة .. 
و ألقاكم في مواضيع قادمة بإذن الله ..







  Haya's Blog on Twitter  Haya's Blog on IG 

11 comments

  1. ماشاءالله عليك هيونه جدا فكره جميله وحبيته وايد خاصه انه فيه امكانيه تغيرين القماش مبدعه مبدعه الله لايضرك ،ووممكن يكون القماش طويل و يكون فيه شيك شاك حتى يكون شكله مرتب من قدام وورى ..
    سلمت اناملك

    ReplyDelete
    Replies
    1. بالضبط مثل ماقلتي عشان يبان مشدود
      تسلمين حبيبتي على كلامك ... شكراً جزيلاً
      :x

      Delete
  2. اووو ماشاءالله عليك يا هيا انتي شي مررررررره جميييييييل
    حبيت الفكره مره واكييييد كالعاده حبيت تصويرك احب تنسيقك وذوقك
    وراح احاول اسويها مع اني احس اني ما افلح بهالأشياء بس تستحق التجربه جد
    الخطوات واضحه والنتيجه مره جميله
    واختيارك للأقمشه يفتح النفس الشكل النهائي جمييل
    طبعاً فكره بالنسبه لي مش مؤلوفه ولا سبق وجت فبالي فأنتي جد مررره مبدعه
    يعطيييك العافيه :x

    ReplyDelete
    Replies
    1. حبيبتي نوره سعيدة جداَ انه عجبك
      شكراً على كلامك انتي لطيفة وجميلة بجد
      :x

      Delete
  3. ماشاء الله عليك مبدعة جدا حبيتها
    لما شفت الصور ع بالي شاريتها جاهزه حمستيني اروح اشتري واسوي مثلها
    يعطيك العافية :×

    ReplyDelete
    Replies
    1. االله يعافيك اميرا حبيبتي
      شكراً
      :X

      Delete
  4. هيون شكرا ي بعد قلبي دايم اشيائك جميله وتفتح النفس وسهله

    ReplyDelete
  5. مبدعه دائماً يا هيا
    ماشاء الله عليك ، شغل مرتب و فكره جميييله
    و شرحك وخطواتك واضحه و سهله
    و الأقمشه الوانها مبهجه حبيتها

    يسعدك ربي



    ReplyDelete