بعض أشياء .. طيارة | Few Things

بسم الله الرحمن الرحيم

بعد فترة انقطاع بسيطة الحمدلله .. وعشان ارجع لجو التدوين حسيت ان (بعض أشياء) مناسبة لـ إعطائي هالإحساس ..
في الفترة السابقة قضيتها في الشرقية .. مثل ماذكرت في اخر سوالف لي .. والحين ,, في اخر يوم والرجعة للطايف .. تفاصيل ..

اليوم الجمعة..
بعد مارتبت الأغراض عشان الرحلة بدري بعد العصر .. والقهوة الظهر تعطي جو ولها طعم غير .. 

في الطيارة ..
أحب الرحلات في النهار .. نشاط ورواقة .. ومناسب للأطفال عشان ماينامون واتوهق في الليل سهر.

وكلن في مكانه ..
وبجمبي بنتي الصغيرة .. اللي يبغالها استيعاب بزيادة، خاصة ان فيه مرحلة عمرية مابين السنتين الى ثلاث سنوات الطفل يبدأ يقول كلمة لأ! تعلمها وبيطبقها، وهي مرحلة بداية استقلالية الطفل وتكون شخصيته .. بالغالب تكون فيها نوبات غضب وصياح على أي شي يطلبه ومايتنفذ .. وهي مرحلة بتعدي بس لازم الأم تكون عارفة القصة عشان ما تتعامل مع صراخ وبكاء وعناد الطفل غلط بالضرب او تتعامل مع بأسلوب ممكن يأثر على نفسيتها ونفسيته. لوعرفت السبب واللي يمر فيها طفلها بيعطيها مجال تتحمل وتصبر على الصراخ المزعج والمتعب والمحرج خاصة اذا كان في مكان عام وأمام الناس. معرفة السبب ممكن يعطي الأم الهدوء النفسي الكافي للتعامل والتكيف في هذه المرحلة.

في الفترة الأخيرة ومع الجو الملخبط من أمطار وغبار وغيم خاصة المنطقة بين الرياض والدمام رجعت لي الفوبيا للطيران خاصة وقت الاقلاع واكثر شي وقت المطبات الهوائية.. عمري ماكنت كذا طول عمري وانا استمتع بس صار كل شي يخوفني .. أحاتي أحاتي .. ربي يهديني ..
ومن ضمن الفترة الزمنية المرعبة كان فيه بنات كبار (حريم) قاعدين وراي .. وانا في أضعف حالاتي هههههه مرعوبة ومميلة راسي يحسوبني داخلة جو رومانسي يعني -____- .. وبدا شغل النحاسة وقط الكلام (تمسكي تمسكي الحين بنطيح) ماتوقعت ان ممكن كذا يصير .. وفيه احد لئيم كذا ههههههه .. بس بيني وبين نفسي اضحك اقول نشوف بعدين الدنيا دوارة!! p:

ووصلنا لوجهتنا ..

ومن ثاني يوم بدأ تأثير تغيير الجو ..
سبحان الله جو الشرقية صار صعب .. احسه متغير ومُتعب مو مثل أول ..
وبدأ الصباح بتحضير العلاجات .. مع اني عارفة ان الزكمة كذا ولا كذا بتاخذ ثلاث ايام عالأقل بعلاج او بدون بس الكحة تتعب ..
وكان فتر ةصعبة لان بعد 5 أيام كنا بنروح لدبي .. بس اتصبر واقول عالأقل لا صرنا في دبي بيكون فيه مناعة وماراح يتغير عليهم الجو .. لأن المرض توه رايح ولسه الجسم متهيأ وفيه دفاعات جاهزة.

وبدأ ترتيب الأغراض .. وفرز وتوزيع الأشياء ..

الألوان ودفاتر التلوين ..
هالشيئين ماذكر اني في مرةرحت للشرقية من غير ماشتري للبنات شي منهم .. كانو في فراغ وازعجوني .. خلصو دفاتر تلوينهم ولازم شي جديد .. ولما شفت الألوان في العلبة الحديد حنيت .. أوقات اشتري اغراض لبناتي احسهم كنهم لي مولهم  :|

والشيئ الجميل اللي وصلني وانا في الشرقية ..
طلبت من فنانة (كوثر) تيشرت برسمة فيها اسمي وعن مدونتي ..
ابدعت طبعاً ماشاء الله .. اسلوبها راقي في التعامل وشخصيتها رايقة جداً ..
حسابها في تويتر: كوثــر | KawtherARTs

أعجبتني في تفاصيلها ..

وبعدها .. طرنا لدبي (تروقني)
وبرجع ازعجكم بمواضيع مشتريات ثانية ..

جميع مواضيع سلسلة (بعض أشياء)

ألقاكم في مواضيع قادمة :)

مع السلامة :*

ليصلكِ الجديد ؛ اشتركِ معنـا
Subscribe to our mailing list