مدونة هيا أدون ، اكتب و اُصور

بعض أشياء .. ما قبل سفر .. Few Things

بسم الله الرحمن الرحيم



مساحة اباخذ فيها راحتي .. وبعطي لنفسي اجازة من التفكير والتخطيط لأي كلمة بقولها!
مو عن موضوع معين .. بس لحظات مرت في يوم .. وقفتها صورة! ..

لحظات اتنفس . اتحرر من قيود الفكرة اللي بياخذونها غيري عني حتى لو مايعرفوني .. تاريخي و أي انسان مايبينه كلمة او تصرف.. حلوة العفوية .. جميييييلة .. مريحة للقلب .. بس لادخل فيها العقل الزايد .. يصير سجن أوقات ..
البريستيج سجن أصلاً ..

دام الحين بدأت الإجازة .. وهو يعني للبعض سفر .. مع اني مالي علاقة بالإجازات الرسمية لسه بناتي مادخلو مدارس (ان شاء الله بعد سنة او ثنتين) .. جت لي فرصة اروح للشرقية .. من بعد اطول مدة ابعد فيها تقريباً عن اهلي ماروح حول 3 شهور .. كبرنا وثقلنا :( الله يرزقنا بر الوالدين ..

فالروتين عادة في أي سفرة متقارب .. ابسطها التجهيز لروحة جدة مثلاً وبالنسبة لي مو سفر مثل ماهو تغيير جو :)
في الروحة للدمام والخبر تجهيز لملابس واشياء حقت عزيمة وشي رسمي وشي ماشافوه وهكذا ..

وكانت البداية في الحيرة اللأبدية ..................... وش ألبس .. وش أخذ معي !! ..
بس طبعاً عشان فيه بناتي .. لازم اغراضهم تترتب أول قبلي ..
وأول سؤال سألته لاختي .. صيفتووو!! .. لأن الطايف لسه برد وجدة حررر صيف .. والدمام في اليوم الواحد اكثر من فصل .. 
الملابس الشتوية باقية في الدولاب واخذتلهم البلوفرات الخفيفة .. حتى في المجمعات والأماكن الباردة تنفع ..
ولأني أم ماحب اشيل هم الفستان توصخ ولا البنت بردت ولا هالكلام .. الشي الوحيد اللي ماستخسر فيه لملابس الاطفال: بنطلون جينز وتيشيرت بولو .. حاجة عملية وتصلح لكل وقت وأي فصل. غير الليقنزات المرتبة في الصيف ..
هنا أصول الترتيب والتحضير .. ههههه ..




خلصت من الكتاكيت و جا دوري ... حطيت الجوال عالطاولة وبدأ التأمل ..


ممممممممممم.. 



بعد حساب الأيام ..
وتقسيم اللبس على الايام .. حليت كل شي .. 
وهو اسهل بعد من المكياج !! اللي مابي اخلِ شي واتحسف اني ماخذته ..
وطلعت الشنط اللي اخذها للميك اب ..

الشنطتين الصغار بالترتيب الصغيرة كانت تكفي وبعدها الكبيرة صارت تكفي .. وبعدها الرمادية صارت هي اللي تكفي ..
بس الحين على هوى اللي ابي اخذ .. الرمادية والسودا الكبيرة ممكن تفي بالغرض ..
للأن ماحطيت فيهم اغراضي .. بس تحضير ..





وشنطة البكلات والشبرات والاكسسوارات .. والأشياء اللي مالها مكان .. احبها 



والأغراض التقنية ..
 قبل ماكنت احرص كثير اني اخذ اللابتوب .. واقول اباخذ منه اجازة مو من طول قعدتي .. بس كذا .. والحين ماحس اني اقدر .. خاصة اني بقعد اسبوع تقريباً .. ماينفع كل هالبعد :))
وجمعت اللابتوب .. الهارديسك .. سي ديات برامج (ناوية افرمته) .. وشاحن الكاميرا ..
هذي زاويتي .. مارتاح الا هنا .. 



وزرعاتي .. أسقيهم .. قبل .. مع انهم بس مرتين في الأسبوع بس حرصت بزيادة هالمرة ،،
جبت وحدة جديدة تونس اللي قبلها (غاردينيا) والغاردينيا الحين شكله أحسن (عاليسار) بعد ماذبلت من سفر لي قبل ..
وماتت كل الاوراق .. بس مارميته مثل اللي قبل .. سقيت واهتميت الين حيت ثانيه .. الخضار يبعث طاقة حلوة .. 



بعد الظهر ..
كنشاط وفعل خير وتعليم الصدقة والرحمة .. عندي رز بني ولا استخدمه ماعرفت اطبخه ولا حد استساغ طعمه .. فاخذ منه واعطيه للحمام والعصافير .. وشاركو في بناتي .. يعرفون ويتعلمون شي مني واخذ اجرهم طول العمر :))) (الله يحفظهم ويحفظ قرة اعينكم)




العصرية ..
وقت شم الهوا .. وتفريغ الطاقات .. للصغار قبل الكبار .. 
الصغار لو مر يوم من غير نشاط بدني فعلي تتأثر نفسياتهم .. مثل ما أحنا نقول كيف الرياضة تحسن المزاج! مثل كذا الأطفال.. لا انحبسو انجنو .. ومن كذا صرت ما حب الشتاء لان مايطلعون من بعد ماكنت اعشق الشتااااء .. 






وأذن المغرب .. وخلص اليوم .. انا انسانة نهارية ماحب الليل .. 
يوم مر بلحظاته وحبيت اشاركهاا معك .. انتِ ..

تغيير عن سوالف المكياج .. صفحة يومية .. تفاصيلها .. تمر في حياتك ..
عطتني هذي التدونية دافع ورفعة معنوية .. من جاتني الفكرة الصبح من اول ما دخلت غرفتي وافكر كيف ارتب عفشي واغراضي .. شفت الصور والموضوع قدامي .. 

الفكرة الحلوة ه هي اللي تبقى ملازمة لك .. وتشاركها مع الغير بعد ماتطبقها .. 

يمكن ألقاكم في يوميات ثانية .. 
حطيت في بالي اصور كل لحظة ابي اتكلم عنها .. واجمعها .. في صفحة يومية .. و .. بعض أشياء ..


ألقاكم في مواضيع قادمة :)

مع السلامة :*




ليصلكِ الجديد ؛ اشتركِ معنـا
Subscribe to our mailing list





40 comments

  1. ما شاء الله تبارك الله
    الله يحفظلك كتاكيتك
    والفكرة على بساطتها جميلة منك
    الله يحفظكم :)

    ReplyDelete
  2. أهلاً فيك وبيومياتك الحلوة استمتعت وانا أقرأ
    ومن جد مع هالجو صار أصعب شيء إختيار اللبس الله يعين الجميع
    وبالوقت هذا صارت الأجهزة شيء ضروري جداً بكل مكان لازم تنأخذ ^^"
    الله يحفظ لك بناتك الحلوات عقبال ما يطلعون مثلك ^^

    سفرة سعيدة يارب

    ReplyDelete
  3. هلا بك و بيومياتك الحلوة .. حبيتها ^^
    ومن جد بالجو هذا أصعب شي إختيار اللبس الله يعين الجميع
    الأجهزة صارت شي ضروري بكل مكان لازم ترافقنا ^^
    الله يحفظ لك بناتك الحلوات ويطلعون مثلك ^^

    وسفرة سعيدة يا رب
    بالتوفيق

    ReplyDelete
  4. يسعدكم ربي ويوفقكم
    انتي اصلا كل حاجه تجي منك اكيد حلوه ..

    ReplyDelete
    Replies
    1. ربي يسعدك ويحفظك ياارب
      انتِ الاحلى بكلامك شكراً

      ;;-)

      Delete
  5. حبيبتي والله
    ربي يسعدك

    الذوق منك وفيك
    :x

    ReplyDelete
  6. جدا تدوينه بطله وتدخل القلب
    ربي يحفظ لك بنوتاتك ..

    ReplyDelete
    Replies
    1. الله يخليك يارب
      شكراً جزيلاً على دعواتك
      :x

      Delete
  7. رووعه البوست اعجبني بكل شي فيه ربي يحفظ لك بناتك و يوفقك

    ReplyDelete
    Replies
    1. تسلمين عزيزتي على دعواتك .. شكراً
      ربي يحفظك
      :x

      Delete
  8. جميييله جدا كل مواضيعك توني شفتهم ويني عنك من زمان استفدت كثير جزاك الله الف خير في انتظار الجديد

    ReplyDelete
    Replies
    1. الله يسلمك ويحفظك
      من ذوقك وطيبك عزيزتي

      شكراً جزيلاً
      :x

      Delete
  9. الله يخليلك بناتك وإجازة سعيدة جميلتي ..

    ReplyDelete
    Replies
    1. شكراً اسماء
      الله يحفظك
      ;;-)

      Delete
  10. التصوير حلوو مشآآآآآآآآء الله

    والمدونة حلووه كمان ومرتبه

    متابعه لك ان شاء الله ^^

    ReplyDelete
    Replies
    1. شكراً إيمان
      لي الشرف ..

      :x

      Delete
  11. هيونه يالجميله حبيت يومك وكثري من يومياتك
    دخلت جو معها ربي يحفظك ىيحفظ لك بنوتاتك 🌹❤❤

    ReplyDelete
  12. مدري وينراح تعليقي
    كتبت
    ياجمالك ياهيونه حبيت يومك وكثري من ايامك الجميله
    ربي يحفظك ويحفظ لك بنوتاتك🌹❤

    ReplyDelete
    Replies
    1. ربي يسعدك ياجميلةانتِ
      :x

      شكراً جزيلاً
      :)

      Delete
  13. عزيزتي من أروع اليوميات الي قريتها
    ..كتبت فأبدعت
    ما شاء الله عليك اسلوب رائع وبصراحع هدى اعصابي وخفف توتري ..
    انا من الخبر حبيبتي والخبر هاليومين جوها مائل للحرارة بس بالليل شوي برااد..
    موفقة باجازتك ..
    بتمنالك مهار سعيد

    ReplyDelete
    Replies
    1. تسلمين ..شكراً لك عزيزتي

      كلماتك اسعدتني جداً
      ربي يسعدك
      :x

      Delete
  14. جميلة ما شاء الله :") عجبتني اللقطات الي اخذتيها استمري يا قلبي

    ReplyDelete
  15. تدوينة رهيبةة كثري لنآ منهآ تكفين
    والله يخليلك بنوتآتك يّ رب ,,

    ReplyDelete
  16. هياء مره أنتي شيء جميل ومقبل على الحياة
    يا حلو الأمومة عليك الله يحفظهم يارب

    ReplyDelete
    Replies
    1. حبيبة قلبي
      شكراً شكراً
      ربي يحفظك

      :X

      Delete
  17. مشاء الله
    أنتي منجد أنسانهـ جميلةة
    الموضوع مرا يريح الواحد حسيت هدوء ودخلت جو معاكي
    ياليت تكثرين مواضيع جميلة زي كذا

    ReplyDelete
    Replies
    1. كلامك الجميل أسعدني ..

      شكراً لك من قلبي ..
      ربي يسعدك ..

      :X

      Delete
  18. ايش نوع كمرتك وعدستك وهل استخدمتى فلاش لان تصويرك رائع

    ReplyDelete
    Replies
    1. شكراً لك ❤
      ما أستخدم فلاش بس اصور في النهار
      كاميرتي:
      Canon 450D
      العدسة:
      50mm

      Delete
  19. ماشاء الله تصويركك جممممميل وش عدستكك و هل فيه اعدادات او لا

    ReplyDelete
    Replies
    1. كاميرتي كانون
      7D

      بس صور الموضوع هذا صورته بـ
      Canon 450D - 50mm 1.8

      والاعدادات ماحط شي معين اخليه عالمانويل واصور

      Delete
  20. حبببببببببببببببببببببببببببيت جدا هالمدونة

    ReplyDelete