فُرش ماك | My MAC Brushes

بسم الله الرحمن الرحيم

فرش ماك! وأخيراً اكتملت مجموعتي (تقريباً) بعد فترة حول شهر وشي .. على مهلي :)

كل فترة اشتري فرشتين واكون عارفة وابيها هي بالذات .. حافظة رقمها وشكلها واستخدامها .. وأصر عليها ولا أرضى بديل يمشي الحال لان تمشية الحال ممكن في شي رخيص مو مع ماك وتأكدي قبل لا تاخذين شي (وهو مو فارقه معك انه من ماك او لا) ترا فيه له بديل ارخص بكثير ...

اذا حابه فرش ماك (انا احبه الجودتها ولان مالي جلادة على اني اطلب من سيقما مع انه لسه فيه وحدة من سيقما ابيها) وتبين تبدأين مجموعتك ابدأي على فرشة في كل مرة .. ممكن على اهتمامك وعنايتك بالفرشة تستمر معك اقلها 6 سنوات. استثمار حلو والفرشة تستاهل .. عيبها الوحيد سعرها المرتفع!!

اذا كنتو تعرفون .. كنت استخدم فرش (طقم) من محل سنسي حق العطور .. وماقصر 3 سنين يكفي وبديت بكم فرشة من سيفورا وجميلة جداً .. وأيضاً فرش من محلات التجميل العادية ..

بالنسبة لنوعية الشعر فيها هو شعر وألياف طبيعية .. ونظام ماك في الترقيم للفرشة هو:

    الفرش اللي تبدأ من اليسار بـِ 1 هي للوجه

    الفرش اللي تبدأمن اليسار بـِ 2 للعيون

    الفرش اللي تبدأ من اليسار بِـ 3  للشفايف

الاسعار بتلاقونها في اخر الموضوع لكل فرشة ..

MAC 187 Duo Fiber Brush

فرشة الستيبلينغ من ماك .. مشهورة جداً .. وتعطي نهاية عند استخدامها لتوزيع الأساس طبيعية وجميلة وكاملة .. طبعاً قبل ماشتريها كنت انتظر اشتري فرشة الريل تكنيك ولا سيقما اوحتى من ميك اب فوريفر .. بس كانت هي في بالي وكل اللي دورت مالقيت اللي ابي .. وشريتها.

طبعاً الكلام اللي كنت اسمعه عن هالفرشة كنت ماصدقه واعتبره مبالغة في الوصف .. بس جربتها في توزيع الأساس جميييلة جميييلة جميييلة .. والتغطية اللي عطتني كاملة وطبيعية من غير شكل الطبقات .. تستاهل كل ريال ..

MAC 129 Powder/Blush Brush

فرشة متعددة الاستخدامات لتوزيع بودرة الوجه وحمرة الخدود. ناعمة جداُ وحجمها الكبير نسبياً مناسب عشان ماتلقط كمية كبيرة من اللون.

MAC 130 Duo Fiber Brush

هالفرشة قصة! هي كانت اخر فرشة شريتها من ماك! من قبل لا اشتريها حبيتها اكثر من اخواتها الفايبر الكبيرة والوسط وهذي الصغيرة! الكبيرة ماقتنعت فيها كثير لاني مرتاحة على طريقة توزيعي بالبفينق برش (يمكن اغير رأيي مستقبلاً واجرب الكبيرة) وبالنسبة للستيبلينق كنت ابي شي اجمد من الكبيرة والوسط (#187 - #188)واحب اشتري وانا طايرة بالشيء (متشفقة) رحت ابي اشتريها وانا عارفة اني ماراح احصلها لان الفرعين اللي قبلهم ماكانو فيه! وبعد انتظار البائعة لتفضالي ماحصلتها عالعرض ولقتها مرمية في الدرج من غير كيس قلتلها معليه اباخذها بس المشكلة ماكان فيه الباراكود عشان تدخلها بالسستم وتعرف سعره :(((( وبعد ماقعدت ساعة تدور في الملفات عنها جت الثانية تقول هذي من زماااان ماجتنا لا تتعبين نفسك موبالاوراق :(( المهم توكلت ومشيت وانا متحسفة. ثاني يوم وانا راجعه من جدة قلت خل امر يمكن البنت لقت الباراكود حق الفرشة, وسألتها وكنها عرفت سالفتي من امس وقالت اييييه ادوره لك *سعادة* طبعاً انصدمت من السعررر هههههه بس معليه استاهل. سعرها نفس الكبيرة والوسط.

المهم هذي الفرشة اقدر استخدمها في توزيع الفاونديشن عن طريقة الستيبلينق (التنقيط مو المسح) واقدر بعد لحجمها الصغير ادمج فيه الكونسيلر تحت العين او دمج البلش واشياء بكتشفها بعد لسه.

MAC 109 Small Contour Brush

تستخدم لتوزيع البودرة على الوجه او للدمج او لبودرة الكونتور (النحت).

احتجت فرشة لتوزيع البودرة المعدنية من ماك لتطفية اللمعة وتكون اصغر من فرشة #129 لكامل الوجه وأيضاً للإضاءة تحت العين والانف وممكن لبودرة الكونتور. وبعد قريت انه ممكن تستخدم لتوزيع الفاونديشن! استخدامات كثيرة لهالفرشة .. شي جميل.

MAC 168 Large Angled Contour Brush

فرشتي الجميلة! كانت الاولى في قائمتي. استخدمها للكونتور وجميلة في نعومتها وميلانها المثالي في التوزيع لتحت عظام الخدين.

MAC 195 Concealer Brush

هذي الفرشة ماقررت اني اشتريها الا بعد ماشريت كونسيلر ستوديو فينيش من ماك! ولأني ماأبي استخدم اصابعي بأي شكل من الأشكال واعتمد على الفرش قلت بخصص هالفرشة للكونسيلر وممكن بعد استخدمها لتوزيع الشادو الكريمي.

MAC 263 Small Angle Brush

أول فرشة لي من ماك وذكرتها في مشترياتي أول (هنا) جميلة هالفرشة ممتازة لرسم الجل ايلاينر ومناسبة جداً وأيضاً تنفع لتحديد الحواجب. فيه فرشت غيرها نفس الشكل وحدة اصغر (208) للحواجب والثانية أكبر (266). بس هالفرشة تؤدي المطلوب منها :)

MAC 217 Blending Brush

هي الفرشة رقم اثنين اللي على قائمتي ومهمة وحلوة!! لها استخدامات كثيرة مثل دمج الشادو وتوزيع كونتور الانف ودمج الكونسيلر لتحت العين مثلاً وتوزيع الشادو للعيون الكبيرة بعد ودمجها لألوان الشدو والزاوية الخارجية للعين.. اي شي ممكن يخطر على بالك!

MAC 224 Tapered Blending Brush

فرشة الدمج المعروفة من ماك. نفس الفرشة اللي قبلها (#217) بس هذي فلفي اكثر وتوزع تدمج وتضيع الخطوط الحادة اكثر! انا شريتها بعد لنفس السبب اللي فات انه شريت كونسيلر كريمي وحبيت استخدم للتوزيع والدمج شي منفصل عن اللي استخدمه للايشادو! وهذي ممتازة! واستخدمه أيضاً لتثبيت الكونسيلر بالبودرة.
بعد ماجربتها: الفرشة حلوة بس للمنتجات البودرية. يعني ماتنفع للتوزيع ودمج الكونسيلر ممتازة في تثبيته بالبودرة.
استخدمته في توزيع الكونسيلر الكريمي ودمجه وطلع لي خطوط .. عرفت ان الفرشة ماتنفع لهاذا الشي وابخلي استخدامها فقط على الشادوز وتثبيت بودرة الكونسيلر.

MAC 239 Eye Shading Brush

فرشة توزيع الشادو العادية الأساسية على كامل الجفن .. سمعت عنها كلام حلو كثير وشعراتها البيضاا كيف تلقط اللون وتوزعها بسهولة.

MAC 219 Pencil Brush

فرشة القلم، لدمج الشادو تحت الجفن السفلي ! اكتشفت اني اكثر شي ممكن احتاجه هذا الشي عشان ادمج خط الكحل لما يكون محدد بزيادة من تحت وممكن اذا حبيت احدد الزاوية الخارجية للعين او اذا بغيت خط درامي لرسمة  في كسرة العين.

الأسعار:

MAC Brush #187 - 237 SR.
MAC Brush #129 - 160 SR.*

MAC Brush #130 - 237 SR.

MAC Brush #109 - 185 SR.

MAC Brush #168 - 185 SR.

MAC Brush #195 - 128 SR.

MAC Brush #224 - 170 SR.

MAC Brush #217 - 170 SR.*

MAC Brush #239 - 142 SR.

MAC Brush #219 - 142 SR.

MAC Brush #263 - 110 SR.

*(مو متأكدة)

اشترك معنــا ليصلك كل جديد
Subscribe to our mailing list