مدونة هيا أدون ، اكتب و اُصور

مشترياتي من ماك وشوويات MAC Haul

بسم الله الرحمن الرحيم







جميع المشتريات كانت على فترات متقطعة خلال الشهر اللي فات, مابين الدمام والخبر - جدة - الرياض - الطائف. نبدأ:




أغلبكم سمعتو عن التخفيضات اللي سواها ماك! انا عرفت عنها بالصدفة كنت رايحة ادور عن كذا شي اللي خالصين طول الوقت, وشفت المحل مليان فلبينيات واستغربت ! المهم يوم جيت احاسب ولا اللي قبلي الفلبينية تحاسب وطلع حسابها 25 ريال!! ماقدرت اسكت يوم راحت قلت للمُحاسبة وشو اللي يبيعه ماك بـ 25 ريال!! ((وانا ارخص شي ممكن اشتريه اللي هو مثلثات الاسفنج على خبري كانت ب 30 ريال)) قالت انه ماك مسوين عرض على الاشياء اللي نزلت من فترة وكانت محدودة في وقت مو من خطها الدايم. قلت وينه!! والله واخلي اللي بيدي وابسط!! حاجات كانت مرررة حلوة والزين انه بدا يوم ثلاثاء وعلى الاربعاء كان كل شي خالص لاني رحت كذا فرع ومافيه شي .. وبالنسبة للي شريته ايلاينرات ملونة (تغيير عن الاسود) وشادوهات كريمية وبلش خدود. ولأني ماشوف لعرض صورهم فايدة فراح اكتفي بس بالاشياء اللي على طول موجودة في ماك :).

ماك (الراشد - الخبر):

MAC Fluidline Eye-Liner Gel in Blacktrack & MAC 263 Small Angle Brush



جل ايلاينرأسود والفرشة هذي حاجة جميلة .. من كثر ماحبيته وامدح فيه امي واختي راحو من ثاني يوم وشروه!!
انا بالعادة ماحب حركة اللي شطح نطح! كنت ماجرب ولااحط ايلاينر ابد ولا اعرف اصلاً!! بس من كثر الجمال اللي اشوفه يعطيه والشكل حبيت اجرب، بديت بالجل ايلاينر من ميبلين وفرشته اللي تجي معه جميلين!! وكان سعره 39 ريال! استخدمته الين ماتمرست يدي وعرفت كيف اضبط الرسمة وشغل احتراف!
الجل ايلاينر معروف من ماك اسمه بلاكتراك. قوامه كريمي جداً (وهو اللي اشتهر فيه اكثر شي) وماينقطع معك بنص الرسمة! اذا كان عندك وتستخدمينه حتى لو اي جل ايلاينر ثاني لماتفتحينه وتبدين ترسمين لا تخلينه مفتوح حطيه عالطاولة وهو مقلوب عشان ماينشف.



الفرشة كان فيه ثنتين بس الثانية كانت اصغر شوي وهذي يوم سألت اللي تبيع قالت للمحترفة اكثر! وكان هذا كافي اني اخذه من غير مااطالع الصغيرة هههههه.

الفرشة رقمها 263. حلوة حلوة حلوة وهذي أول فرشة لي من ماك :).

السعر: الجل ايلاينر: 95 ريال
الفرشة: 110 ريال (قالتلي يوم سألتها بـ 113 ريال بس عند الحساب تغير).


ماك (العثيم - الدمام):

MAC Paint Pot in Bare Study & Painterly





شادوهات كريمية, الشادو الأول بينترلي كنت ادوره من زمااان وكان مقطوع حتى براا السعودية! ويمكن تستخدمينه بعد كأساس للشدو واذا جفنك دهني ممكن لانه ناشف يعني لو ماوزعتيه بسرعه ماراح تعرفين له وبيطلع مو حلو! انا احطه اوقات مع ايلاينر وشدو بني خفيف على كسرة العين! يحلي ويخلي سواد الايلاينر وجمال رسمتك تبان اكثر :)
اسم الشدو بينترلي Painterly لحمي بيج على شوي وردي مطفي مطفي من غير لمعه. قوامه كريمي بس ينشف بسرعه! يناسب البشرات الفاتحة لو بتخلينه لحاله (لان درجته فاتحة وينفع كأساس للشدو).

الشادو كريمي الثاني اسمه بير ستدي Bare Study .. طول عمري وانا عندي حب للشدوهات الكريمة خاصة اللي تجي بلون ترابي وفيه لمعة بشكل متواضع! كنت شايفة مثله عند شانيل بس شفت هذا وحبيته مرة لون راقي بلمعة مثالي للوقت اللي تبين تصيرين واو من غير تعب :)

بير ستدي Bare Study لونه اوف وايت بلمعة (موقليتر) اضائته واضحة. يعطي شكل مُبهج وحلو للعين. وومن تستخدمينه كأضاءة لتحت الحاجب وعند دمعة العين.

الشادوهات الكريمية السابقة تقدرين مثل ماذكرت تستخدمينها كأساس للشدو :)

سعر الشادو الكريمي الواحد: 107 ريال

MAC - Mineralize Skinfinish in Soft and Gentle





فيه احد مايعرفه او سمع عنه!! من ماك بودرة اضاءة معدنية سوفت اند جنتل.
هذي العلبة كإضاءة ممكن تبقى عندك سنين وهي لسه ماخلصت! لان ابسط كمية تكفيك وزيادة لاعطائك اضاءة مرضية وممكن تحوسك لو زودتي شوي. ممكن تستخدم لاضاءة اعلى الخدود واحسها احلى شي وممكن باصبعك الصغير لمسة منه فوق كسرة الشفايف الوسطية! .. 

هالبودرة مليانة غليتر لاتتوقعين انك بتاخذينها وبتستخدمين فرشة عادية في التوزيع على كامل الوجه وخلاص لانك كذا ماراح تحبيه وماراح يكون حلو! الفرشة راح تاخذ كمية اكبر من حاجتك ممكن اصغر فرشة حتى لو بأصابعك راح تكون تمام! الأقل أحلى (بساطة).

بطريقة ثانية ممكن بعد ماتخلصين وتبين فرش لوك تاخذين فرشة البلش وبمسحة منه لكل خد! حتعطي شكل حلو وتعطي اضاءة حلوة للبشرة الباهته.

اذا كانت درجتك فاتحة - بيضاء على وردي, استخدمي المنتج كـ هايلايتر (اضاءة) اعلى الخد - تحت الحاجب - فوق الشفة العلوية - وسط الجبهة - مدمع العين.
اذا كانت درجتك تان - برونز- مشمشي - سمارا, استخدميه ممكن على كامل وجهك وبيعطيك القلو الصحي (اضاءة واشراق لكامل الوجه).

سعره بالنسبة للمنتج بلاش! نظراً للكمية اللي بتظل معك ولتعدد استخداماته.

سعره: 148 ريال .


ماك (مجمع العرب - جدة)

MAC - Brow Set/Gel & Eyebrow Pencil (Spiked)


هذا القلم حلو لتعبية وتحديد الحاجب من غيلر مايبان اسود Fake موطبيعي .. كنت ابي اغير لون حواجبي لانها سودا وافتحهم شوي بس يعني مستحيل اصبغهم! فشريت طقم تاتو الحواجب من فوريفر (بعد شوي جاي) وحبيت اللون بس بغيت لتحديد الحاجب من فوق يبان كنه صبغة ولازم احدده بلون اقرب للشعرة الطبيعيه ويطلع تمام وقلم الحواجب سبايكد من ماك سوا اللي ابيه.

سبايكد Spiked قلم ضعيف يناسب ضعف الشعرات, باستخدامه بضربات خفيف بنفس اتجاه نمو شعرة الحاجب راح يعبيلك المكان من غير ماتنتبهين حتى. جمييييييل! اكثر شي طبيعي قد جربته عجبني اكثر من طقم الحواجب من بودي شوب وهو عندي سنين :)
لاني مليت من الغبرة اللي يعطيها لحاجبي بعد ماحط شدو الحواجب! مع اني كنت استخدم فكس بلس وارش منه على فرشة الحواجب النظيفة وامرره عليها بس تروح الغبره ويروح شوي من اللون :(

ماك براو ست جل Brow set gel للحواجب حبيته مع اني استخدمته كذا مرة بس! لو حابة شكل فرش ومرتب. استخدمته مع قلم سبايكد ومشطت شعر الحاجب بفرشة الجل (قبل ماتمررين فرشة الجل مرريها على زوايا العلبة عشان ماتكون الكمية كبيرة). الجل يعطي ثبات لشكل الحاجب ومافي غبرة الايشادو على الحاجب .. احبهم ..

بعد ماتستخدمين المسكرا امسحيها بمنديل عشان مايتوصخ اللون الشفاف في العلبة.

سعره:

قلم سبايكد الحواجب بـ 90 ريال
جل الحواجب بِـ 90 ريال ..




ميك اب فور ايفر (فافافوم - الظهران مول):

Makeup Forever Aqua Brow



طقم التاتو الأشهر! كنت حابة افتح لون حواجبي من غير صبغة ومسكارا الحواجب من ماك منقطعة ولقيت فيه من بوبا ب 52 ريال بس ماقتنعت باللون اللي عطاني (فيه 3 درجات).

اخذت الدرجة 20. فاتحة صح بس هو نفس اللون اللي ابغاه. لان الاغمق منه ماغير لي شي كبير! حلو ويصبغ الشعرة وثابت بس استخدم معاه قم حواجب ماك لتحدي الحاجب من فوق عشان مايبان الصبغ. 

الاكوا براو من ميك اب فور ايفر Aqua Brow 20 لونه فاتح تحطين منه شوي على ظاهر يدك وبفرشته اللي معه بضربات خفيفة بنفس جهة منبت الشعر وبعدين ممكن تمررين المسكرا على اللون وتمشطين ويتوزع اللون. ممكن بعد تعبين الفراغات وتحددين بقلم ماك وتمشطين شعرات الحاجب بالتاتو. ثابت ثابت حتى مع الوضوء مثلاً.

يجي مع الأكوا فرشة تمشيط الحاجب وفرشة الرسم.

سعره: 202 ريال.




من محلهم في العثيم مول - الدمام:


يوم رحت له اول مرة كانت التخفيضات توها بادية! واخذت كذا شاور جل وحبيتهم لانهم صغار وينفعون للسفر وماتكرهينهم وهم لسه ماخلصو. يوم جربته وجربت البودي سبراي على انهم خفيفين ومو ذاك الثبات صح بس يغير لك المود شوي ومايعلق في ملابسك طول الوقت وتملينه. كانت زيارتي لهالمحل على جزئين: الاولى استكشافية وتشمم للعطور والروايح وكم حبة للتجربة والثانية لأخذ مؤونة كافية :)



الشاور جل: بعضهم كان عليه عرض تاخذين اثنين والثالث مجاناً واسعارهم العلب الصغيرة على 12 ريال وفيه انواع على 6 ريال.



معطرات الجسم: سعر كل واحد اخذته ب 30 ريال


حبيت ريحة العطر فرش كنك في فندق هههههه برتقال وزنجبيل. وكان فيه عرض تاخذين شي معاه بس ماعجبتني العطور الثانية اللي مثله واخذت سكرب للجسم من نفس النوع. سعر العطر 69 ريال.





نزيه - جدة:


ماسك للشعر الجاف, يستخدم بعد ماتخلصين من غسل شعرك بالشامبو وتنشفينه بالمنشفة وتحطين من الماسك على اطراف الشعر وداخل بس مو على الجذور وتخلينه لمدة 10-15 دقيقة وتغسلينه وممكن في اخر غسلة تكون بماء حلو. جربته الشهر اللي فات وعجبني.
شعري من النوع اللي اوقات ينفش! لمااستخدم هالماسك يهديه ويلين ملمس الشعره حتى من غير استشوار. وريحته حلوة :)

سعره 52 ريال وفيه منه حجم كبير ب 90 وشي.


كشك من مجمع العرب - جدة:



طقم مناكير الكافيار, يجي الوان كثيرة (اللون الاساس ومعه كرات الكافيار) مع انه مافيني ذاك الهوس على المناكير وماحب الشغل الكثير اصلاً بس قلت تجربة لظفر واحد بالكثير يكفي .. وفيه بعد في نفس الكشك (قبال كوستا والدو قبل قاب) علب صغيرة تنباع فيها حبيبات الكافيار لحالها. سعره الطقم اللي فوق 40 ريال.

طريقة الاستخدام: تحطين من اللون الاساس وتكون تحت ايدينك ورقة وتحطين بعدها قبل ينشف الكافيار (تكبينه بشويش وتثبتينه باصابعك) وتنتظرين ربع ساعة وتجمعين اللي طاح منه وترجعينه للعلبة (يجي معه قمع صغير).

من محل تجميل عادي (مجمع برج الطائف):

Kryolan - Ultra Foundation & Maybelline - Falsies Mascara


من كريولان اسمه الترا فاونديشن الدرجه D. سمعت كثير عن هالماركة ولأنه يباله احتراف عشان تستخدمينها حبيت اطبق الكونتور الكريمي وشريته وطلعت الخدود جميلة بس ريحته قوية شوي. عالعموم المنتج حلو وسعره 120 ريال.

مسكارا من ميبلين فولسيز. سمعت عنها كثير من البنات واليوتيوبرز ومدح كثير. فرشتها معقوصة مومستقيمة جربتها مرة بس تكتلت لازم اعرف لها اكثر لانه موثابته الفرشة لينه مرة وانا دفشة شوي!! سعرها 30 ريال!!!!

حلاة المحلات العادية في المكاسر هههههه .





ايكيا - جدة:


وانا طالعة من ايكيا بنحاسب شفتهم وحبيييتهم!! على طول تخيلت شكل الفرش فيهم واخذت ثنتين وانا ماعرف السعر وانبسطت. سعر الحبة 5 ريال!


هوم سنتر - الطائف:




حاجة اساسية على كل تسريحة ادري هههه .. كنت ادور اللي فيها لمبة من الداخل ماكنت ابي العادية وشفتها في ايكيا .. ولقيتها صدفة في هوم سنتر. لها وجهين مراية عادية والثانية مكبرة وفيها اضاءة وتقدرين لاخربت تغيرين اللمبة.

سعرها 179 ريال.



من هزاز الرياض والعائلة السعيدة في جدة:

منظمات الاكريليك احبهم احبهم .. سعر اليد 25 ريال (اتوقع) -الرياض-
والثانيه الادراج والحامل اللي فوق 35 ريال -جدة-



من المبيعات الجوية - الطيارة:

شنطة تحطين فيها اغراضك وتنظمها عشان سهولة الوصول لو كانت شنطتك كبيرة ولو كنتِ من النوع اللي يغير الشنطة كل يوم لان اغراضك كلها تكون فيها. قماشها حلو وفيها جيوب واجد وماتوقعتها تشيل اغراضي من غير من ادخل الاشياء غصب! مفيدة وعملية.

سعرها: 160 ريال.


مكتبة جرير - الرياض:




كتابين كنت ادورهم عن التربية والثقافة التربوية للأطفال. لماتوصلين لمرحلة اللي منتي عارفة كيف التصرف الصحيح انصحك فيهم.
مالقيته في جرير الخبر ولا جده الا كتابين ثانيين مو ذولا. الكاتب نفسه (د. مصطفى ابوسعد) يجي عالتلفزيون الوطن اوقات وله يوتيوبات ومتابعته في تويتر وعنده نظريات في التربية مهمة ومنها عدم معاقبة الاطفال مهما كان وان زاوية العقاب واي نوع للعقاب هو إهانة للطفل ولازم للوالدين انهم يتكلمون مع اطفالهم باستمرار وهم صغار وعلى كل شي عشان لاكبرو يتكلمون هم مع ابائهم. *فكرة*..
وعنده في الكتاب شرح واشياء ماتخطر على بال اغلب الامهات واللي احاول اعض على لساني لما اعصب (الله يهديهم) وبدال مايجيك صداع من الضغط على فكينك ولا لسانك اقري الكتاب بيعطيك امل .. 

سعرهم: التقدير الذاتي 59 ريال والتربية الايجابية 79 ريال.




هذا كل شي .. ماحطيتي شي من اللي فوق بلستتك؟؟!! 





  Haya's Blog on Twitter  Haya's Blog on IG 

28 comments

  1. عجبتني مشترياتك هيا الله يهنيك
    سوفت اند جنتل اروح واحي عليها من كثر ماقريت عنا هالايام شكلي بشتريها
    انجوي حبيبتي : )

    ReplyDelete
    Replies
    1. شكراً نوره .. نفس قصتي قبل لا اشتريه بعد ..
      بس تراه حلوو وان شاء الله بيعجبك
      ;;-)

      Delete
  2. loved this blog soo much, such amazing work , mashallah keep it up x


    Twitter: Jadorevintage_x
    Instagram: Jadorevintage_x
    FaceBook: jadore vintage paris

    ReplyDelete
  3. ماشااءالله
    اول شي تصويرك يفتني نظاااافه ماشاءالله *تربعت*
    سوفت اند جينتل عندي بس مدري ليه ماتفاهمت معه للحين !! احط منه حلو بس الاضاءه موواضحه الا شي خفيييف يبيلي اعيد النظر بالطريقه :/
    ماسكرا فولسز تجننن بس انتي خلي الجزء البارز ع رموشك وحركيها يمين ويساار وبعدين اسحبيها دايم اغير ماسكرات وارجع لها !!
    ماك فلويد كثار يقولون شبيه ميبيلين فماتحمست وعلى العموم صرت احط ايلاينر سائل احلللى وسواد اكثر ()
    فرش ماك عندي وحده شبيهه لها بس بتاكد من رقمها يمكن نفسها ههههه
    باث اند بودي نفس حالتي تووبه اخذ احجام كبيره ماتخلص وتملين منهااا :(
    والحواجب من ميك اب فور ايفر الفرشاه راح تكرفينها وتعشقينها وقولي قورجس ماقالت هههههههه
    واخر شي الاكليرك ناويه عليها ابي اضبط تسريحتي قررريب ! بس اخاف من الغبار بيتي يغبر بسسسرعه :"""(

    استمتعت بالقراءه والتصوير ، يعطيك العافيه هيا ومنتظرين الجاي اكييييد ؛*** *هق*

    ReplyDelete
    Replies
    1. يابختي فيك قورجيس نورتيني بجد ماتدرين شقد فرحانه بكلامك
      يازينك ويازين كلماتك مافيه احلى من كذا ❤❤
      :x:x
      سوفت اند جنتل للحين ترا مثلك احس انه خفيف بعد مع انه لونه قوي بس خفيف للحين يمكن يدي خفيفة عليه لسه
      ومسكارا ميبلين بسوي نفس طريقتك وان شاء الله تضبط ياحبيلك

      فرحتيني بتعليقك من وين اجيب كلام !!
      :x:x
      شكراً قورجيستا
      ❤❤

      Delete
  4. ماشاء الله لاقوة الابالله
    الله يحفظك بسم الله عليك

    تعبانه اليوم حتى تويتر مافتحته بس تذكرت البوست اللي بينزل على طول فحت الايباد على مدونتك ماقدرت اقاوم ههههههه:")

    تصويرك بجد ماشاء الله فتنه ومرتب الله يخليك

    كل شيء بمدونتك عجبني كالعادة ماشاء الله
    حبيت كلامك عن التاتو كل مرة بشتريه اتردد يجيني ذاك الشعور اللي مابعرف له :P
    بس بعد كلامك عنه اقتنعت يبي لي انط بااقرب فرصه ان شاء الله ..
    منظمات الاكريليك جميييييييلة عجبتني كثير ..
    لي فترة وانا ادور عليها مالقيت غير البلاستيك :(
    حطيت الشدوهات الكريميه في اللسته الوانها رايقه وطبيعيه ❤❤❤
    مشتريات الهنا ياررررب
    وربي يسسعدك ، ماحبيت اشوف البوست بدون مااعلق على كمية الجمال الموجودة :")

    ReplyDelete
    Replies
    1. يالله ....

      سلامتك حبيبتي ماتشوفين شر ..
      من البارح يوم قلتيلي وانا فرحانة بكلامك :)

      ان شاء الله لاجربتي تاتو فوريفر يعجبك وتدعين لي :)

      الله يهنيك ويسعدك ياااارب جمال كلماتك وقلبك الشفاف يرفع معنويتي الله لايحرمني
      :x

      Delete
  5. مرحبا
    انا جديدة هنا واتمنى افيد واستفيد
    حبيت أسالك عن
    (MAC Fluidline Eye-Liner Gel in Blacktrack & MAC 263 Small Angle Brush )
    كيف يستخدم ؟ شكله جل لونه شفاف ؟ كيف تستخدمينه مع الفرشة ؟ هل هو كحل ؟ وليه لونه ابيض كذا ؟

    والف شكر وربي يهنيك بمشترياتك

    ReplyDelete
    Replies
    1. شكراً عزيزتي وحياك الله

      اللي كتبتيه هو ايلاينر جل تستخدمينه لرسمة الكات اي او رسمة الكحل الممدودة لبراا فوق .. والعلبة زجاجية بس الشغل كله داخل ..

      والايلاينر انواع: سائل وجل اللي يكون بعلبة وتستخدمين فرشة خارجية وتبدين برسم عنونك
      :)

      واذا بغيتي اي شيئ علميني
      ;)

      Delete
  6. الله يعطيك العااافيه
    ماشاء الله كل منتج يقول الزين عندي :)
    عندي فرشة ماك المشطوفه لكن يختلف الرقم اللي عندي ٢٦٦ جدااا جميله
    وسوفت اند جنتل كنت متحمسه لها كثييير اشتريتها وضاعت قبل استخدمها :(
    نجي لباث اند بودي ووركس ادماااان بس حلو الواحد ياخذ احجام صغييره
    وبالنسبه لماسك نزيه حلووو جربته تحسينه يلين الشعره ويسهل الاستشوار بس خلص ولا رجعت اشتريه ناويه على ماسك المكاديميا من نزيه ��
    وتاتو فور ايفر حواجبي خفيييفه ولون شعري اشقر رمادي كيف درجاته ابغى لون بني مو غامق مررره حسيت اللون اللي جبتيه فااتح والا!
    اما المنظمات فهم عشقي بصراااحه ترتييييب وجمممال بس مااحصلهم عندنا كثيير اشوف مقسمات الارواج بساكو ب٦٠ احس السعر مبالغ فيه ولا حصلته بمكان ثاني
    الكتب�� حبيت موضوع التقدير الذاتي للطفل حسيته مفييد ايش انطباعك عنه ابغى شي يساعدني باطفالي ��

    شكرا لك هيونه استمتعت هنااا❤
    leen

    ReplyDelete
    Replies
    1. :-*

      تاتو فوريفر حلووو وتحسين باحترافية معه هههههه ,, انا درجتي فاتحة وانا متعمدة الدرجة هذي, اللي بعدها الأغمق 30 بني بس مو فاتح, افتح بدرجة من الاسود لو تبغين تكسرين حدة لون حواجب السوداا ..

      بالنسبة لللمنظمات انا شريت من ساكو للارواج اللي تشيل 6 أرواج بـ 14 رياال
      انا شايفتها اكيد
      والاشكال الثانية سعرها صحيح 70 وفيها ..
      وبتلقين اكيد اشكال الوان في محلات الكماليات الا مايكون عندهم زاوية وفيها منظمات

      كتاب التقدير الذاتي جميل قريت الين النص اعطاني اجوبة معقولة وصرت اطالع بناتي ومومعقولة كيف صرت احاسب نفسي قبل اي كلمة خلاني افكر قبل اي تصرف وافسر اي تصرف منهم واعرف السبب ..
      واهم شي انك تنمين الثقة في نفس الطفل وهذا مرة مهم .. واعتزازه بنفسه من الحين وتنمية هالجانب يريحك ويوفر عالطفل اشياء ومتاعب هو في غنى عنها..
      اطفال الحين غير عننا .. كل شي بحسابه واحس اي شي تزرعينه وتشتغلين عليه الاما يثمر ..
      هو من الاشياء اللي خلتني بعد اشتري هالكتابين اني اعرف شلون اتصرف لو جابو عادات مو حلوة من برا .. بنتي على وجه مدرسة وابي اهيئها قبل تروح واعرف وش ممكن تواجه ..
      الاطفال نعمة من الله ومسؤولين قدامه ..
      الله يهديهم ويحفظهم ويخليلك بيبياتك ..
      :x

      Delete
  7. Paint Pot مره حلوى الاضاءةو

    ReplyDelete
  8. انت فن بسم الله عليك
    يختي احبك من جد مخلصه ما شا الله لا من الصور وناظافتهم و جمالهم ولا من كلامك حتى السعر تكتبينه ..
    الله يسعدك و ينولك اللي فبالك ع كميه الجمال اللي تعطينا ،،
    اكيد حطيتهم في اللسته الشادوهات الكريميه و خاصه ستدي اب شفت نيك بقناتها حطته ع المودل وعجبني ..
    والهولدر من ايكيا وانا رايحه له قعدت اطالعهم وش ممكن احتاجهم له وتركتهم ><
    ماجا ع بال وعجبتني فكرتك حتى اشكالهم بالفرشش جميييله ..

    شكرا ي حبيبتي ،،،
    متابعين لك دايما

    ReplyDelete
    Replies
    1. يالله

      اخجلتيني بكلامك ولطفك وربي .. الله يسعدك ويرفع قدرك
      كلامك يشرح الصدر ويبرد الخاطر

      الله يحفظك وين ماكنتي ويرزقك سعادات
      :x

      Delete
  9. حبيبتي وين محلات العائله السعيده في جده
    ولو في اشياء تنصحينا فيها من نزيه او بوتس
    شاكره لك

    ReplyDelete
    Replies
    1. هلا والله

      طلع اسم المحل المناسبات السعيدة
      بس شكلي متأثرة بجوجو وريحانه والعائلة السعيدة حقتهم ههههههه

      الحي اتوقع انه النعيم في شارع الثلاثين اللي ورا حراء
      وبنفس الشارع فاتح وقت اللياقة
      هو قريب من الدانوب الكبير اللي بشارع المطار صح!
      اذا فهمتي علي علميني :$

      ومن نزيه وبوتس الاشياء اللي اشتريها منهم احطها هنا على طول وفي مواضيع كتبتها عن مشترياتي منهم

      من بوتس الستاندات حقات الماركات الطبية اذا تحتاجين كريمات ترطيب كريم عيون وكذا
      واذا تبغي خذي التونر مزيل المكياج الوردي من بيودرما عليه عرض حبتين كبار ووحدة صغيرة للسفر ب ١٥٠ رياال وهو سعر الحبة ب ٨٤ رياال وذكرته في روتين عنايتي في موضوعين قبل
      مدري شوفي بعد اش يعجبك
      :)

      Delete
  10. مدونة راقيه جداا ماشاء الله

    ReplyDelete
    Replies
    1. شكراً لك اسعدتيني جداً

      :x

      Delete
  11. ما شاء حلوه مرررره

    ReplyDelete
  12. يعجبني ترتيبك ما شاء الله

    ReplyDelete
  13. هلا حبيبتي عندي سؤال , كيف الوحدة ممكن تعمل شادو نظيف بحيث انه ما ينزل اسفل العين وقت عمله ، مره اعاني من هالموضوع واحس انه لازم يكون في طريقة غير الستكر الي ينحط تحت العين ..

    ReplyDelete
    Replies
    1. ممكن تخلين الفاونديشن بعد ماتحطين الشادو .. بحيث تبدأين بمكياج العين وتنظفين المنثور عالخد بفرشة نظيفة او تمسحينه بمزيل المكياج وتحطين الاساس .. او بدل الستيكر تحطين منديل ينفع .. ودايم اشوف الميك اب ارتيت بس مو مرة مقتنعة بالفكرة يحطون كمية من البودرة الشفافة البيضاء بعد الفاونديشن وهم يحطون الشادوز عشان يشيلونه بالفرشة المروحة بعد ماتنتهي من الشدو

      :)

      Delete
  14. السلام عليكم ورحمه الله وبركاته
    اول مره ادخل مدونه واكتب دايما بس اقراء
    اتصدمت لما قلتي انه ماك يسوي تخفيظ اول مره اسمع بهذا الشيء الزبده ابغى اعرف متى يسوون
    عشان اروح طيران هههههههه
    سوفت اند جيتل كونت مره متحمسه اشتريها وحمستني زياده
    MAC Paint Pot in Bare Study & Painterly
    هل هذاالايشدوا ينفع في توحيد الجفن المسمر يعني يعطي لوك متوحد ومشرق ؟؟
    مشكوره الله يعطيك الف عافيه دايما اتابعك وتصويرك يجنن يفتح النفس ماشاء الله

    ReplyDelete
    Replies

    1. ياحبي لك سعيدة بتعليقك والله


      تصدقين حتى انا ماكنت اعرف وعرفت بالصدفة ولا ادري اذا بيسونها ثانية او لا ههههه

      بالنسبة لشادو الكريمي بينترلي يوحد خاصة لو جفنك دهني ويجي على وردي ولو حابة مطفي على بيج فيه واحد اسمه اوكري اما البيرستدي ففيه لمعة مثل الصورة

      بس طبعاً مالهم تأثير علاجي او شي .. بس تجميلي

      شكراً جزيلاً لكلامك اسعدتيني جداً

      :x

      Delete