مدونة هيا أدون ، اكتب و اُصور

مقاضي الميك اب - Makeup buys

بسم الله الرحمن الرحيم




في هالتدوينة راح اكمل باقي المقاضي، بس هالمرة راح تكون بالغالب لاغراض الميك اب.
1 من لوكستيان، عطر صيفي جداً، منعش ويونيسكس. ينحط عالملابس والجسم. ذكرني بطقة سي كي ايام الثانوي بس هذا انتعاشه اكثر يخليني احس كأني توي ماخذه شاور D: في البداية استغليته شوي واخذتلي لفة بالسوق ورجعت اشتريه، وزين ماعملت هههه. سعره 270 ريال.

2 كنت رايحة للوكستيان مخصوص عشان هالكريم، كنت ابغى شيا لليدين وينحط بالشنطة، جميل هالكريم وقوامه ثقيل يستاهل. واخذت معه بنفس الحجم كريم 3 الموند (لوز) قوامه اخف من الشيا، بس ريحته جميلة جداً اعجبتني. عالرواقة احط الشيا وبعده الألموند وايديني تفحفح كني حاطة عطر (: . الاثنين بالحجم الصغير. 2 سعره 45 و3 سعره 49. لا يضحكون عليكم بعروض وخرابيط زي اختي (;

4 وانا احاسب قعدت اجرب عطورات الشنطة/الجيب الصغيرة وعجبني هذا لانه خفيف جداً ويجي معه في الجهة الثانيه غلوس مشمشي بس لما ينحط كنه شفاف. وقت الزهق لما مايكون لي خلق ينفع. سعره 115 ريال.





من دبنهامز كونسيلر ايف سان لوران, رايحة اشتريه مخصوص لان هالاتي خفيفة الى متوسطة وهو المناسب لهالحالة. وكنت ابغى شي كريمي وفيه ترطيب، لان قبل كان عندي كونسيلر من ريفلون (الصورة تحت) بس ماكان ينفع ينحط لتحت العين ابد وتغطيته يعني مو شينة، على سعره. اسمه Touche eclat له اكثر من استخدام غير التغطية، الاضاءة. وهي سبب شهرة هالمنتج. استخدمته انا كاإضاءة وتغطية لتحت العين، يبرزها بشكل ناعم وحول الفم (المنطقة الداكنة) وتحت الحاجب. اغناني عن الاساس والبودرة. واذا فيه عزيمة ولا شي احط فوقه البودرة. بيرفكت D:.
سعره لحاله ب 195 ريال واللي بدبنهامز قالت فيه عرض يجي معه هالسيروم العينة ويصير ب 200 ريال. وش فايدة السيروم ماجربته لسه بس قالتلي انه ينحط قبل المكياج وهكذا. اتوقع ترطيب وبرايمر. 
درجتي اللي اخذتها رقم 2 لاني احب الاضاءة اللي على وردي لأن رقم 3 على ماجربته عندها كان اضاءة على اصفر، ماحب.

اعتبره من الـ Must-Have. لاخلص اكيد بشتريه مرة ثانيه.

صورة كونسيلر ريفلون: 



والحين لأهم شي عندي في الميك اب اللي هو طقم النحت :):) هنا حقي مخلص من ميك اب فور ايفر رقم 2 لان فيه درجات بس هذا اللي ناسبني اكثر شي حتى لما رحت لمحل ميك اب فور ايفر في الراشد (الخبر) على طول اعطاني هالدرجة من غير ماأجرب الباقي وطلع الاختيار الصح. بس الحين المأساة مخلص في كل الفروع في محلات الميك اب الكبيرة ماحصلت نفس الدرجة يقولون مقطوع وماعاد يجي خلاص من الشركة (النصبة الكبيرة) مع اني عارفة انها كذبة بس قلت لازم اشتري شي لانه مرة مهم عندي :"( فقلت امري لله واشتريته من فيسز ب 170 ريال (كان 145). واخذت رقم 1 بس ابد ابد ماعجبني لان الغامق ينفع كـ بودرة خدود وخفيف لانه جاي على مشمشي بس الفاتح منه حلو لانه على وردي. كنت لازم احط من الغامق اكثر من طبقة عشان يبين اللون. ماحبيته.



لما رحت لمحل ميك اب فور ايفر في الراشد سألتها وعطتني اياه :)))) نفس الدرجة رقم 2 *رقص* قلتلها وين اللي يقولون منقطع وحاله ردت كلام بياعين. وانا اللي كنت عارفة هالشي بس خساير. انصح فيه وبشدة. سعره 170 ريال.





نجي للتسوق في الطيارة. فيه أحلى هههههه!. وانا اتصفح الـ SkySales القى بوبي براون!! قلت مايبغالها.
كان فيه 3 من منتجاتهم: البرونزر وثلاث ارواج مع بعض والايلاينر الكريمي. واللي حسيت قلبي دق له البرونزر مع فرشاته الجميلة الشكل واللون والملمس والاسم اللي عليها.



مع اني مو راعية تان وسمار (موحلو عليّ :$) بس هالبرونزر جميل كني حاطة شي كريمي على وجهي ولمعة ويجي بأكثر من درجة.
حلو اذا كان الميك اب على ذهبي-برونز-تان بيج-بني كله حلو، واقل لمسة منه تفي بالغرض يعني بيعمر عندي.
سعره 250 ريال.




نسيت احط هالجميل (:


Lip Gloss من شانيل.. اول ماشفته تذكرت ايام الكلية وشريته مع اني كنت ناوية اشتري نفس اللون من NYX . بس شانيل مافي زيها نفس الريحة ماتغيرت. وهاللون احسه عملي ويومي رقمه 46. سعره 146 ريال. *تقريباً*








ألقاكم في مواضيع قادمة :)

مع السلامة :*




ليصلكِ الجديد ؛ اشتركِ معنـا
Subscribe to our mailing list





2 comments

  1. تدوينه جميله ،، معليش بعد هالبوست صار عندي فضول اعرف شغله فيك ..
    انتي من النوع الي يصرف ع المكياج اكثر من اللبس ؟

    انا اذا الامر تعلق في اللبس وخصوصا الشوزات والشنط ما احاتي الريال ابد :/
    بينما شغلات ثانيه لا افكر شويه خخخخخخخخخخ

    ReplyDelete
    Replies
    1. بالضبط ههههههههههههههههه
      ;;-)

      Delete