مدونة هيا أدون ، اكتب و اُصور

تجربتي مع منظف ومرطب ايستي لودر

بسم الله الرحمن الرحيم



قبل سنتين، ايام ماكنت بأواخر العشرينات p: ماكنت اهتم بصراحة ببشرة وجهي ولا حتى ترطيب. على اساس انه لسه تو الناس وانه مهما حطيت كريمات بتدهن لي وجهي وبيضايقني وبالاخير بينمسح وبينركن عالرف والمسألة كلها بالجينات. وجت فترة حسيت الوقت تيك تك والمفروض اهتم اكثر بنفسي واحس اني انثى اكثر، فـ رحت واخترت اني اشتري منظف وتونر وكريم وسيروم (بما اني صرت على ابواب الثلاثين) من مجموعة ديور! بس مالي حظ مع هالماركة. استخدمتها فترة بس ماتجاوبت بشرتي معها! وظلت باهته وملونة ومافيها اي نظارة. ومليت منها وتركتها الين ماحل تاريخ انتهاء الصلاحية وانرمت. 
مع بقاء شحوب الوجه جربت انظف وجهي بالكلينسر حق اختي من ايستي لودر وبعده الكريم من نفس الماركة. حسيت اني ادمنت. وهو مخصص للبشرة المختلطة الى العادية. ويوم شفت نفسي تعلقت فيه رحت وشريته. المرة الاولى شريت الكلينسر مع الكريم بس عرفت في ثاني مرة ان بشرتي بما انها مختلطة الى عادية اخترت اني اخذ اللوشن من هالكريم، اخف بنفس المميزات.



من اول يوم جربت فيه هذا المنظف وقعت في غرامه لاني حسيته يسوي اللي انا ابغاه، ابي شي لاغسلت وجهي فيه احسه نظيف بريحة حلوة وبأقل كمية. وينظف الميك اب صح مايحتاج اعيد كذا مرة. وملمسه وانا اغسله تذكرني ليه هو غالي خخخخ.
صحيح انه ينشف بشرتي شوي لما اغسله بس ماكان عندي مشكلة مع هالشي لاني استخدم بعده كريم اللوشن بالنهار ولا مرطب الليل، والنظارة اللي يعطيني اياها تخليني اشتريه مرة وثنتين وثلاث، هو واللوشن الجميل مع حماية spf15 اخترته لانه مناسب لعمري، فيه واحد ثاني ازرق على مااذكر للعشرينات بس هذا يساعد على منع وتقليل العلامات الأولى للشيخوخة. وبما اني في هذا الوقت ثلاثينيه فهو الاختيار المناسب لي.

في بداية ماشريت هالمنتجين كانت اسعارهم معقولة بس في كل مرة اروح القى السعر مرتفع شوي الين اخر مرة كان سعر المنظف حول 200 وشي يمكن والكريم طق 300 :"( بس شنسوي كله يهون والنظارة تبقى. ومن جهة ثانية لاحظت ان المنظف يبقى عندي حول الأربع شهور وبالنسبة لسعره شي مقبول لي. واللوشن عندي بدائل ثانية وكلها من نفس الماركة كعينات وهذا كل اللي احتاجه .

الصور تحت كل العينات اللي اخذتها بكل شروة ونبذة بسيطة عنها.




سيروم Advanced Night Repair  للعيون (وانا استخدمه ايضاًاما حول الفم والجبين)، يعتبر من اشهر انتاجات ايستي لودر من موقعهم يقولو عنه: يقوم باصلاح الاضرار لما حول العينين. كعلامات التقدم في السن والتجاعيد وهكذا.
ماقدر اظلم المنتج لان استخدامي له على فترات متقطعه. وسعر العلبة الحين وصل حول 450 الى 500 يمكن.




كريم من نفس المجموعة مع السيروم بس للمتقدمين بالسن اكثر بحيث انه يقلل من علامات التقدم بالسن وخطوط الشيخوخة. مع نفس الحماية. مع ان البائع شاورني انه بعطيك عينة بس لاكبر منك قلت معليه ابيه هههه شي ببلاش ماينعاف :)




وهذي العينة كانت من اخر مرة شريت فيها. شكلها حبتني البنت اللي تبيع وقالت لي بعطيك شي ينباع بحول الـ أربع الاف ريال سويت بحث عنه وطلع خط فخم جديد من استي لودر، مكوناته من اغلى الاشياء واخر ماتقدمت به التكنولوجيا لخلق نتائج مبهرة. هيك بيقولو! بس ماجربته بصراحة الا كم مرة واحسه حلو كملمس وريحة كعادة ايستي ايستي لودر واي منتج غالي.


الخلاصة: طبيعة البشرات تختلف، حنى لو كانت من نفس النوعية دهنية ولا مختلطة. نصيحتي قبل لاتشترين اي شي غالي خذي عينة ولا جربيه عند اي احد تمونين عليه بكذا توفرين من غير ماتخسرين فلوسك وتفوزين بمعرفة المناسب ومعاها بشرة جميلة اذا نجحت التجربة.


دمتم بِسلام.







  Haya's Blog on Twitter  Haya's Blog on IG 

7 comments

  1. حلو بسالك من وين اخذتيهم ؟؟ من دبنهامز ؟؟

    ReplyDelete
    Replies
    1. اييه من دبنهامز (:

      Delete
    2. شكراً على ردك الله يسعدك

      Delete
    3. واذا كنتي من الشرقية في واحد سوري في فافافوم عند ستاند ايستي لودر فاهم كل شي ..

      العفو ❤

      Delete
  2. حبيبتي بسألك عن كريمات لتاخير الشيخوخه انا مثلك قربت من منتصف الثلاثين وصراحه عندي ضغط نفسي وبشرتي انعدمت وانا اصلا مااهتم ؟ ف وش رايك بايش تنصحيني ويعطيك العافيه ❤❤

    ReplyDelete
    Replies
    1. عاد الضغط النفسي سبب كافي لتعب بشرة الوجه حتى لو تهتمين ..
      الله يوسع صدرك ويفرج همك ..

      شوفي في موضوعي الاخير عن روتيني اليومي في العناية ويارب تفيدك بشي
      :x

      http://www.le-haya.com/2012/12/skin-care-routine.html

      Delete
  3. تسلمي على الطرح الجميل :-)

    باسالك حبيبتي السيروم
    Advanced Night Repair

    يناسب العشرينات ؟

    شكرا ياعسل

    ReplyDelete