بعض أشياء - في اسبوع | Few Things - In a Week

بسم الله الرحمن الرحيم







اشتقت لبعض أشيائي ، المُقدمة المُعتادة لكل موضوع منها :)
لما احتاج اكتب عن نفسي مو عن شي معين او تفصيل او تقييم الخ الخ الخ .. القى نفسي افكر اكتب ..
اكتشفت اني احب التدوين اكثر من اني انستقراميه .. السائد الان ..
احب استضيف قُراء للمدونة ، يتصفحونها واستقبلهم و اضيّفهم ، اعيّشهم معي الجو اللي ابيه اوَصله لهم و يعيشوه ..
في الانستقرام ، لا لا .. 
احط صورة ، كني مدري كيف .. فما احس بتأنيب ضمير كثير لو غبت عنه ..
فيه غيري يسد . . بس مدونتي مكاني لي بس .. لازم اتفقده واهتم من جا ومن راح ..
الانستقرام حلو مو شين ترا ،، بالعكس ، لأن  فيه اقدر اتواصل مباشرة مع المهتمين ، واسلم وكذا يعني .. :)

في الاسابيع اللي مرت .. جت فترة السكون!
اللي مافيه إلهام ، لموضوع او صورة ..
بالعادة ازعل جد ،، و اتنكد وادخل اوقات في حال اكتئاب ،
واقول خلاص ، خلّص كل اللي عندي وماعاد عندي شي اقدمه ..
وابدا في حالة التدمير الذاتي و التنقيص من اي عمل او فكرة ..
طبعاً هذا الشي و لله الحمد كان قبل سنتين ، اول مابديت ادون هنا ..

قريت قبل فترة عن Photographer's Block غياب الدافع والالهام والرغبة بالنسبة للمصورين
وينطبق نفس الشي لـ المُدون - الكاتب - الفنان ..


كلهم يجتمعون في نقاط واضحة محددة مشتركة جمعتها على اهميتها وتاثيرها علي في اني اطلع من هالمرحلة ،  و اقول انها :
- تغيير المحيط والجو العام ، الطلعة لآي مكان حتى لو تغيير المكان المعتاد للجلوس في نفس البيت
- الاحتفاظ بـ مذكرة ، لكتابة اي فكرة او خاطرة ، لانها لو جت وراحت من غير توثيق ماراح ترجع
- تصفح المدونات الثانية وقرائتها و مشاركتهم بالتعليق والتشجيع (اتكلم من ناحية التدوين) لانه راح يطلعني من المزاج الإقصائي اللي حطيت نفسي فيه
- اتفرج على صور كثيرة (تغذية بصرية) سواء من خلال تطبيقات البنترست - التمبلر - الانستقرام (من ناحية التصوير)
- اقدم لغيري معلومة مفيدة - مساعدة سواء من ناحية التصوير او اي مجال
- انشغالي عن نفسي راح يخليني امر بالمرحلة بسرعة
- لو حالة البلوك جت في التصوير ارتاح لي يوم ، وبعدها امسك الكاميرا او حتى الايفون ، ما اعطي نفسي مجال للجفا ،، لان لو طالت المدة يدي ماراح تعرف تمسك الكاميرا وتصور، ونظرتي حتكون محدودة للشي كتكوين و اخراج وحتى فكرة
- ممكن لو محوشة كم ريال ، تدلعين نفسك و تشترين شي تبينه من زمان و تضيفينه لعِدتك في التصوير راح تلقين نفسك تنشطتي ، وتبدين تقرين عنه وتتعلمين.

احمد ربي اني ما حصرت نفسي و كتابتي في موضوع واحد او مجال معين
يعني لو بس مدونتي متخصصة في الكتابة عن المنتجات والمشتريات ، ذيك الساعة بيجيني بلوك التدوين ألف مرة.
التنويع في الكتابة و الافكار و عدم التخصص احسن شي ، المجال مفتوح لأي فكرة ..
في بداية كتابتي هنا كانت الفكرة انه راح اكتب عن نقطة صحية متعلقة بالغذاء ، كنت حصور الصورة و انزلها الانستقرام ،، بس مشكلتي ايش! المشكلة ان الصورة تنزل ماحس احد ياخذها بجدية ، ولها فترة صلاحية و تروح .. مو مثل الموضوع في المدونة .. مو متعلق بمُعرف لشخص منزل التطبيق في جهازه او لا ، وما ينتظر تقييم لشعبية او ماشابه ..

يمكن عشان كذا حبيت السناب شات ههههه ، لا لايكات ولا تعليقات .. صَور و امش :))))))
محد ينتظر او متوقع شي في المقابل .. كذا أريَح خخخخ ..

كل هذي مقدمة .. خلني اتخيل شوي !!! طيب :)))

الموضوع اليوم عن بعض اشياء في اسبوع ، أحداث - افكار - سواليف ..



- اعتبر نفسي من الناس اللي ماعندي مشكلة مع منتجات الحليب و الاجبان ، تقريباً كل اكلي يعتمد عليهم ..
في الصباح الفطور اخفف القهوة بـ حليب ، و سندويشة توست بجبنة و عسل ولا مربى .. الغدا لازم فيه علبة لحالي زبادي وقبل النوم اشرب حليب كاس او اثنين .. طبعاً الشي اللي احب نفسي عشانه ومتعودة عليه اني اشرب اول ما اقوم من النوم تقريباً كاس ماء ،، ماعرف اكل شي على طول لازم مااء .. وله تأثير و وفايد اقرو عنها ..
مرت فترة صار عندي مشاكل في الهضم ، قولون ، اضطرابات نوم ، ضيق في التنفس ، كتمة ، مزاجي مو تمام ، ضربات القلب زايدة ،، حسبت اني مكثرة قهوة مع اني صرت اشرب بس في الصباح ، يعني مقلله كثير عن اول ،، ولا جا المغرب وانا ماشربت شاي خلاص ما شرب عشان اعرف انام زين .. فكنت اظن انه بسبب انه الغدا كان معه ثوم و لا السلطة ملخبطة معدتي .. يعني كنت القى اعذار وناسية سالفة الحليب.
في اليومين اللي فاتو لما اجي ارجع انام الصباح  بعد روحة بنتي للمدرسة ماعرف ،، ينقطع النفس ، ادخل في النومة واقوم مذعورة ان نفسي انقطع .. صعوبة في التنفس ،، قعدت اقرا واقراا ، من اللي قريته عن سكر اللاكتوز في مشتقات الحليب.
سكر اللاكتوز ممكن يسوي مشاكل هضمية حتى لو الانسان ماعنده مشكلة اساساً كـ حساسية او غيره ، فقررت اجرب اخفف منه في نظام اكلي ، فـ استبدلت الحليب مع قهوتي بحليب الصويا ، اسخنه و اضيفه لكوبي ..
في الغدا صرت اكل ملعقة زبادي وحدع ، وقبل النوم اكتفي بشرب الماء .. بجرب هالفترة و ان شاء الله الصحة تتحسن و يخف تأثير القولون ومشاكل المعدة .. سبحان الله كيف الانسان ضعيف ! كيف ممكن اقل شي يقلب حاله!




- جربت حليب الصويا مع القرانولا و توت بري اسود (العليق) كانت وجبة خفيفة و لطيفة وعشان القرانولا فيها الياف فاحساس الشبع يطول شوي .. القرانولا ممكن تستبدلينه بالرقائق بس مش الذرة زي الكورن فليكس، فيه يجي بُر .. وكلهم متوفرين في اغلب السوبرماركتات ..




- من الاشياء اللي شريتها مع حليب الصويا ، حليب جوز الهند ،، جربته مع ميلك شيك فراولة طعمه زين مو حاد او غير مرغوب .. وشريته لاني حاطه في بالي غدوة لأكلة هندية اسويها فيه :))



- الجو اليوم :)))





- بدا الشتا ، وطلعت الملابس الشتوية ، احب هالفصل ،، كل الذكريات فيه .. فصل الذكريات بجدارة ، مثل هالوقت ، العام كنت في الرياض .. الاياام تركض .. قضيت كل الشتا في الرياض .. بردهم برد :))))




- في الاسبوع اللي راح و صلتني منتجات من متجر ، بس هالمرة مو عشاني مُدوِنة و لا عشان اعلن ولا اتكلم و احكي ،، هالمرة عشان اصور كل منتج لعرضها في موقعهم .. فرحت والله ، مو عشان المنتجات ههههههه مع اني ذايبة عندهم وجايين على ذوقي ، عشان انا احب اصور ، احب اطلع الاشياء بشكل مرتب وواضح ..
من فترة سويت حساب على الانستقرام ماله علاقة بالمدونة ، كنت ابي ابدا بهالمشروع  لتصوير المنتجات ، عندي فكرة و رؤية واضحة كيف ابغى الصور للمنتج تطلع .. بس ظل الحساب زي ماهو ، وكل تأخيره فيها خيره ، عاد الحين افكر اسميه Haya's Studio ولا Haya's Photo .. شرايكم !؟ :)



- الكاكاوات المفضلة عندي ، من جالكسي ، احب طعم الجالكسي بأي صورة كانت ، ومع الريبل صرت اشتري كيك الڤانيلا ، عالعصرية كوجبة طاقة و حلا ،، لذيذ و مُشبع .. وحتى قبل في موضوع لـ Few Things | بعض أشياء ، احبها .. ، حطيت شراب الكاكاو من جالكسي.
شطحة: احس ان اللي يحب الجالكسي مو من محبين الكادبوري  والعكس صحيح ههههه يعني انا مااستسيغ طعم الفليك من كادبوري ولا الببلز مدري ببلي الجديد اللي منزلينه ، وحتى انصار الكادبوري يحسون الجالكسي زبدة وسكر هههه بس الناس و ما اشتهت في الحالتين :)




- من المواضيع اللي قاعدة احضرها للمدونة عن جهاز الكلاريسونيك للوجه .. تأثيرها في الروتين حلو ،، واحب احساس اني احب شي واحضرله واتكلم عنه .. ماحب اتكلم عن اشياء ماحبيتها او ماعجبتني ، اتجاهلها و بس :))


انتهى الموضوع والقاكم في مواضيع خفيفه في اشياء اسبوعية ان شاء الله ..

مع السلامة :*


ـــــــــــــــ

  Haya's Blog on Twitter  Haya's Blog on IG 









17 comments

  1. ياجمااالك، ربي يسسعد قلبك سعادة ماتنتهي
    ماتتصورين قد إيش تدويناتك وكلامك وصورك تلهمني وتسعدني، أنا متأكدة اني قلتلك هالكلام مليون مره وبأظل ابثرك فيه
    لأنك بمعنى الكلمة شي راقي وجممميل ونادر، تراني ما اعرف اجامل اذا ما اعجبني الشي اسكت وبس وحتى لو حاولت اجامل يبان علي، ولكن انتي ماشاء الله
    ربي يحفظك من كل عين لو اتكلم من اليوم لين بوكره مايجي ربع الجمال اللي تقدمينه

    القرانولا، شي جداً لذيذ بالفترة الأخيرة صرت أسويها بنفسي بالبيت ماحبيت الجاهزة لأنها حبتين حاليه
    آما الحليب فيه واحد كنت استخدمه من زمان وجداً رخيص مايتعدى الـ ٦ ريال اسمه لاكتور فري من شركة المراعي

    Haya's Studio حبيته أكثر

    ReplyDelete
    Replies
    1. حبيبتي رنااااا
      لوتدرين شقد بكلامك تعطيني شي كذا يسري في قلبي

      ربي يسعدك و يحفظك لغالينك يارب ..
      لك دعوات في ظهر الغيب

      و شكراً على الاختيار لـ
      Haya's Studio
      وانك شاركتيني .. يعنيلي والله
      :*****

      Delete
  2. هيو ،، صديقتي الروحيه ،، لما تتكلمي
    (احسك انا )،، تجيني هذه الكلمه كثير من متابعاتي بس ماقد حسيت فيها الا الآن ،،
    بشاركك نقاطك وحده بوحده ،،
    المدونه دايما غير بقية البرامج ،، وجد حلو انك تعطي بدون ماتنتظري ،، عشان تقدري تستمري لو قعدتي تنتظري مقابل حتجي فتره وتحبطي وتوقفي ،، الحمدلله توصلت لهذه النقطه اعطي بدون مقابل ، اعطي عشان نفسي ،، حاله الركود تجيني كثير كنت اتضايق وجد تحسي نفسك متوتره ، الان صرت اوقف كل شي وامارس حياتي بشكل عادي بعيد عن كل البرامج والمدونه وما افكر ،، سبحان الله كيف تجيكي افكار وانت رايقه افضل بكثيرررر من حاله التوتر ،، مشتقات الالبان والاجبان احبها بس هي ماتحبني ،، تتعب معدتي لدرجة صرت اخاف اكلها وانا بره ،، اكاونت التصوير كانت ومازالت فكره جدا رائعه ،، بانتظار ابداعك بالاكاونت هيو ،،

    ReplyDelete
  3. جميله التدوينه ومن أجمل المواضيع على قلبي بعض اشياء احب تعبيرك يوصلني مباشره واحب شغفك لعملك حتى تذمرك من نفسك راقي جميله هيا بكل حالاتك دمتي ❤️❤️

    ReplyDelete
  4. هيا ياجمالك وجمال روحك من اجمل تدويناتك بعض اشياء احب شغفك للتدوين والتصوير الله يوفقك حبيبتي ❤️❤️

    ReplyDelete
  5. هياا. . انتي انسانة رائعه ومميزة ودائما تلهميني.. ودائما انتظر جديد تدويناتك..
    بحب مودك واحب كيف يصير مودي لما اقرأ تدوينتك واشوف تصويرك..
    بانتظار موضوعك عن كلاراسونيك..
    بالمناسبة انا اعشق الجالكسي واموت بالكادبوري احبهم كلهم ♡♡

    حبيبتي بتمنالك التوفيق..

    بانتظار جديدك..

    ودي

    ReplyDelete
  6. احب البوستات اللي زي كذا اكثر من غيرها لما تتكلمي بعفوية
    لما شفت كيك الفانيلا فز قلبي احبه هههه
    و بخصوص حساب التصوير دامك حابه هالشيء و متحمسه له ليش لا تصويرك جمييل
    Haya's photo وقعه اجمل بالنسبالي
    تدويناتك جميلة هيا , الله يوفقك في كل شيء <3

    ReplyDelete
  7. هيا ياهياا ، كم انتي جميله ،
    من البنات اللي جدا جدا ودي اشوفك اتعرف عليك اكثر وتكونين صديقتي واختي وبدون اي مجامله ،
    تعجبيني كثير ومااجاملك ابد بهالشي ،

    وانتي فعلا مصدر الهامي

    ...
    انا مثلك شبه تركت التصوير عشان المدونه وعندي اكاونت ثاني بالانستقرام بس شبه هجرته
    بس ودي ارجع له بحب وشغف مثل قبل
    مشكلتي اني مزاجيه بس بحاول

    ..
    اه من الحليب ومشتقاته ، يتعبني ومعاي القولون بعد بس احبه ومااستغني عنه بس بجرب مره حليب الصويا ممكن ارتاح عليه
    ..

    وبالنسبه للاكاونت الثاني للتصوير انا ادعمك مليون مره وبالعكس خطوه جميله منك
    لانه تصوريك فتنه ماشاء الله

    حبيت اسم Haya's Studio لانك تستحقينه

    والله يوفقك في كل خطوه تخطينها لانك انسانه تستاهلين كل خير وحب

    ReplyDelete
  8. أحب مواضيع فيو ثينقز <3.
    تصويرك والكلام كلهم يودوني عالم ثاني.
    ومدونتك جميلة مشاءالله موفقة .

    ReplyDelete
  9. احبك واحب مواضيعك من الله كذا
    haya's studio ارتب
    واوفقك بنقطه الكادبوري والقاليكسي
    الله يوفقك يارب .

    ReplyDelete
  10. ملهمة! تدوينة رائعة استمتعت جدا بقرائتها. الله يوفقك

    ReplyDelete
  11. عفوية إلى أبعد مدى
    تمنيت التدوينة ما تخلص ;$
    حبيت اسم هيآ ستيديو على فكره
    خطوة جدا جميلة ، كل التوفيق لج يا رب
    و شدتني نقطة الحليب لما استبدلتيه
    جربت استبدله مع حليب اللوز لكن للأسف حسيته خفيف ما تقبلته
    أتمنى القى بديل افضل واتقبل ادخله بنظامي الغذائي ..
    حبيت التدوينة كلها على بعضها
    وحبيت الوردات الي ع التعليقات لووول كيوووت
    بانتظار جمال تدويناتج القادمه باذن الله
    دمتي بحب ❤️

    ReplyDelete
  12. الله يسعدك ويوفقك هيونه . انا كثير تعجبني اساليبك بالتصوير سوا بالبلوق او بالانستقرام وان شاء الله نشوفك من احسن لاحس.

    ReplyDelete
  13. ربي يسعدك ،، إنتي ملهمة بالنسبة لي ،، أحس سار عندي تدفق كبير من الأفكار ،، ربي يقدرني و أنفذها إن شاء الله ،، دعواتي لكي بالتوفيق و حياة سعيدة 💕

    ReplyDelete
  14. جدا استمتع لما أقرأ موضوع زي كذا ، احس انه الشخص يشاركني تفاصيل حياته و طريقة تصويرك دخلتني بالمود ، شلون طعم حليب الصويا ودي أجربه بس مدري :\ و ان شاء الله تنفع معك طريقة تقليل الدايري برودكتز ، ما عمري سمعت عن احد تعب منها غريبه
    http://iamruaa.blogspot.com/

    ReplyDelete
  15. ياخي أنتي جميله وكلامك جميل وطرحكك ممتع لأبعد ححد ، أحب الشخص المتقن بعمله وأنتي منهم ، يحسكك أنك لازم ماتفوت كلمه ولا حتى صورة ولا معلومه ألا أنت قاريها بتمعن وأستمتاع ، الله يوفقك ونشوف نجاحاتك بالمستقبل 🌿🌼🍃

    ReplyDelete