استخداماتي لزيت جوز الهند وغيره للشعر والجسم والبشرة

بسم الله الرحمن الرحيم





في الموضوع اليوم ، بذكر كذا استخدام لزيت جوز الهند العضوي .. منها للجسم والوجه كـ سنفرة/ سكرب ومرطب في نفس الوقت ، ومنها كـ ماسك للشعر ..
الجميل في هذا الزيت انه طبيعي وريحته حلوة ومافيه مواد حافظة ، وتقدرون تستخدمونه في الاكل حتى ..

نبدا ..


سنفرة/مرطب للوجه والجسم :



المكونات :
- زيت جوز الهند (ترطيب)
- بيكينق صودا (تقشير)


الطريقة :

تاخذين كمية تقديرية من جوز الهند ، في الصورة باين جوز الهند في العلبة جامد لكن راح يذوب بسهولة ، ولو عندك مايكرويڤ ممكن تذوبينه في ثواني. أضيف له مقدار عاللي تشوفينه من البيكينق صودا ، هالبودرة جميلة ولازم تكون في كل بيت صراحة هههه ، لها استخدامات كثير غير الطبخ ،، وفيها خصائص تقشير لطيفة للبشرة.

بعد ماتخلطينهم في نفس الكاس اللي في الصورة (انا استخدمت علبة مربى) والآحسن تكون العلبة لها غطاء عشان تحفظ المكونات وبنفس الوقت يمديك وقت الاستخدام ترجين العلبة عشان تختلط المكونات ، لانها وقت تنترك لمدة ينفصل الزيت عن البودرة .. 

استخداماتها :

الخليط السابق انا استخدمه حق بشرة الوجه ، مرة واحدة في الاسبوع كـ مقشر لطيف و بنفس الوقت زيت جوز الهند يعطيني ترطيب حلو مرة ، غالباً اسويه وقت الاستحمام ، زيت جوز الهند بالنسبة لي مايسد المسام و لايسويلي حبوب (بشرتي مختلطة) .
و أيضاً، استخدمه كسكرب للجسم .. يعطي نعومة جداً جداً جميلة .. تقشير وبنفس الوقت ترطيب .. طبعاً وانتي تسوينه ممكن تتحكمين في كمية البيكنق صودا اذا كثرتي بيكون مقشر وترطيب خفيف حلو اما اذا قللتي فراح يكون مرطب بتقشير لطيف ، يعني انتي واللي تفضلينه .. 
واستخدام اخر مره مهم (انصحكم تجربونه مررة) ، هالخليط ممكن تستخدمينه للعناية بمنطقة تحت الذراعين ، اللي يسويه انه يطهر المنطقة لو تعانين من حكة او افرازات زيادة او بذلتي مجهود وتبين تاخذين شاور منعش وهذا لانه زيت جوز الهند فيه خصائص مضادة للبكتيريا ، وراح تلاحظين مع الوقت المنطقة فتحت (التفتيح من البيكينق صودا وجوز الهند) يعني وانتي في الشاور اول ماتبدآين وجسمك مبلل ، تاخذين كمية من المعجون (يفضل يكون قوام الخليط لهاشي سميك حبتين) وتوزعين بفرك لطيف تحت الذراعين ، وكملي حمامك واخر شي اغسليه .. 



ماسك ترطيب و (لمعة) للشعر :



المكونات :
- زيت جوز الهند
- زيت الارقان
- زيت الاڤوكادو
- زيت الجوجوبا

الوقت
ساعة

الطريقة :

في صحن صغير ، حطي كمية من زيت جوز الهند اللي تحسيها تكفي لشعرك ، اضفت لها قطرات من زيت الارقان وكمية بسيطة من زيت الاڤوكادو و الجوجوبا .. هذي الزيوت معروفه فوايدها للشعر ، بالإضافة الى ان زيت جوز الهند و الارقان فيهم خصائص مطهرة ومهدئة لفروة الرأس لو تشتكين من حكة او متهيجة بسبب قشرة او استخدام مواد كيميائية مثل الصبغات ..

النتيجة :
ترطيب يجنن ، ولمعة ماحصلتش ، يعني انا جربته على شعري التعبان من الصبغات (خاصة لونه فاتح) وباين مافيه حياة ومغبر مطفي كذا ، بعد ماجربت هالماسك اللمعة بقت لبعد ثاني غسلة .. جربوها و بتدعون لي .. :)


ماسك لتقوية الشعر:



المكونات :
- زيت جوز الهند (ترطيب)
- بياض بيضة (بروتين)
- عسل (تغذية)

الوقت :
نصف ساعة

الطريقة :
كميات تقديرية للزيت والعسل تضيفينه لبياض بيضة واحدة ، تخلطينهم مع بعض و توزعينهم على شعرك ، مع الوقت راح تحسين شعرك يبس فعشان كذا خلك كريمة في اضافة زيت جوز الهند :) 
ممكن تستبديلن زيت جوز الهند بزيت الزيتون العادي ، او اي زيت تفضلينه ،، هو الحكمة منه ترطيب ..

النتيجة :
من استخدامي له مرة واحدة ، لاحظت تحسن خفيف في اطراف شعري المتقصفة ، مع اني اعرف ان تقصف الشعر ماله حل الا القص ، فقصيته واستخدمت هالماسك عشان احافظ عالباقي واحاول اني اتفادى تقصف الشعر والنهايات المزعجة.


طبعاً انا شعري مصبوغ ومالاحظت اي تغيير في لون الصبغة في استخدماتي للماسكات المذكورة .. اصلاً الصبغة تتغير وتخف مع الوقت ومع كثر الغسل والتعرض للشمس مباشرة او من ماء المسابح (الكلور) وأيضاً استخدام الشامبوهات التجاريه اللي فيها سولفات لانها تطير اللون ، فلازم تستخدمين شامبوهات خالية من السولفات وتكون مخصصة للشعر المصبوغ.




استخدامات أخرى قرأتها لزيت جوز الهند :
- مرطب (مُنعم) للكيوتيكل (منطقة ما حول الاظافر)
- إعادة انبات الشعر وتحفيز نموه
- مرطب لنهايات الشعر
- مرطب للشفاه
- مزيل لمكياج العيون 
- لعلاج حب الشباب (لخصائصه المطهرة و المضادة للبكتيريا) توضع كمية بسيطة عالحبة وتترك ١٥ دقيقة وتغسل ، ماجربتها بس شي مفيد ..
- يقلل من ظهور التجاعيد والاكياس حول العين 


الزيوت المذكورة في الموضوع  طلبتهم من فترة وذكرتهم في مواضيع سابقة (مشترياتي في الصيفية) و (طلبيتي من موقع امازون) وهنا بعد روابط مباشرة للزيوت من موقع امازون للوصول السريع ..




___________________________

آلقاكم في مواضيع قادمة ..
مع السلامة :*
اشترك معنــا ليصلك كل جديد
Subscribe to our mailing list


16 comments

  1. الله يعطيك العافية هيونة :$
    حبيييت المعلومات جمميلة
    طبقت أنا اللي لتقوية الشعر لكن بدلت العسل وخليته عسل طبيعي
    يعطي مظهر صحي فعلًا ولمعة
    ومرة ثانية حطيت زيت جوز الهند مع عسل وزبادي
    برضو يعطي لمعة

    والصراحة أنا أعشق ريحته ><

    ReplyDelete
    Replies
    1. هلا هناء
      حلو استخدامك للعسل الطبيعي اكيد بيكون افيد بعد
      وجوز الهند الزين ان ريحته مو قوية او مزعجة ، لطيفة

      نورتيني جميلتي
      :*

      Delete
  2. ياجمالك ماشاء الله كل شي منك يجيب السعادة
    أول ماتنزلين بوست ولاصورة بالإنستقرام بدون مبالغة أبتسامتي تخط ع وجهي
    ربي يسسسعدك دنيا وأخرة قد الجمال والعطاء اللي تقدمينه
    كل ما أشوف زيت جوز الهند بالنت أتذكر بوست مشترياتك من أمازون وأتحمس أشتريه

    لاتواخذيني على لخبطة كلامي، التعبير من جهة وأنا من جهة هههههه

    ReplyDelete
    Replies
    1. ربي يسعدك دوم يا رناااا
      وزين التعبير الللي يجي منك يختي
      :*

      Delete
  3. بووست يجننننننن ومفييييييد ❤

    ReplyDelete
    Replies
    1. تسلمين والله يافرح نورتيني :*

      Delete
  4. الله يسعدك يارب .. ما تدري قد ايش نستفيد منك
    .. عندي سؤال .. انا طلبت من أمازون زيت أغادير الارقان بس اشوف الي تستخدميه غير وش الأفضل ؟

    ReplyDelete
    Replies
    1. هلا عزيزتي ،،
      ماجربت الارقان اللي ذكرتيه ،، وهذا الزيت حسب تجربتي فقط
      اهم شي يكون نقي و طبيعي ومافيه اضافات

      Delete
  5. مبدعة ورائعة انتي ...

    نيمووو

    ReplyDelete
  6. بوست بطعم الجمال

    الله يسلم ايديك على هالابدااااع

    ReplyDelete
  7. الله يعافيك هيا كم كلف عليك زيت جوز الهند مع الشحن ؟؟

    ReplyDelete
  8. يعطيك العافية هيا :*
    زيت جوز الهند من أفضل الزيوت عندي و أستخدمه كثير
    لكن بخصوص مكياج العين صح يشيل الآيشادو لكن الماسكرا
    اللي ضد الماء مو بسهولة يشيلها لازم اكثر من مره
    غير كذا هو مرطب ممتاز
    احب مدونتك يختي الله يوفقك :**

    ReplyDelete
  9. شكرا ربي يسعدك ويفرج عليك مثل ما افرجتي علية

    ReplyDelete
  10. عزيزتي يقولون خلط الزيوت مضر للشعر هل عندك خلفيه عن خلط هذي الزيوت؟؟ الله يسعدك

    ReplyDelete
  11. يعطيك العافيه :)
    هذا الزيت استخدمه لشعري رااائع

    ReplyDelete
  12. انا اشتريت جوز الهند نفس اللي في صورة حسيت سبب تساقط الشعر يمكن لاني م حطيته في ثلاجة -مخليته بحرارة المطبخ ردي الله يسعدك لاني برميه

    ReplyDelete