مدونة هيا أدون ، اكتب و اُصور

طلبيتي من موقع امازون

بسم الله الرحمن الرحيم



وصلتني قبل اسبوع منتجات طلبتها من آمازون ..
الموضوع اليوم عن هالآشياء الحلوة وليش طلبتها وروابطها من على الموقع .. 

في البداية .. 
انا مو خبيرة بالتسوق عن طريق الانترنت .. وهذي اعتبرها اول طلبية اطلبها بنفسي ..
في البداية لازم يكون عندك:
حساب على موقع الامازون 
فيزا
بريد عشان توصلك الطلبيات (بعض المتاجر في امازون ماتوصل لبرا الوايات المتحدة فلازم من اشتراك في احدى شركات الشحن في خدمة يوفرونها عشان يسوون لك بريد هناك ومنها للسعودية ، مثل واصل و ارامكس)

آول شي لما جيت ابي اطلب .. فتحت القوقل و كتبت (الطلب من امازون) وطلعلي هالموضوع من الاقلاع واللي فادني صراحة مع انه مخالف .. شارح كل شي بالتفصيل ،، هنا الرابط .. ومشيت على نفس خطواته وتمام ..
وفي مدونة اسماء مواضيع عن الطلب و التسوق اون لاين .. حافظتها عندي من فترة ..
الاغراض وصلتني خلال شهر وانا عامله حسابي لاني اخذت اطول فترة عشان اكون في الخبر وقت التسليم ..
جميع روابط المنتجات اللي طلبتها بتكون في في نهاية كل جزء .. ومعها اسعارها ..

ـــــــــــــــ


 Chemex Glass Coffeemaker
كِمكس لصنع القهوة
Chemex Bonded Unbleached Pre-folded Square Coffee Filters, 100 Count
فلاتر صنع قهوة كِمكس - ١٠٠ فيلتر




هذه الزجاجة العجيبة مفتونة فيها من زمان وانا اشوف لها صور في كل مكان ..
ما آنكر ان هذا هو السبب الرئيسي لطلبي من امازون .. تحفة فنية وتسوي قهوة ، عز الطلب ..
طلبت الكلاسيك من كِمكس ،، الحجم هذا يكفي لعمل ٦ اكواب قهوة .. فيه مقاسات ثانية لـ ٣ - ٨ - ١٠ اكواب ..
المقاس لـ ٣ اكواب شكلها مو اللي ابيه فأخذت على الشكل اللي حابته والآنسب هو لـ ٦ اكواب تكفيني ..
فيه موديل ثاني يختلف عن الصورة ، بدال المسكة الخشبية يكون لها مثل اليد الزجاجية بدون الخشب .. 
اكيد شاريتها عشان الاضافة الخشبية وشكلها التحفة ..
عملها: تحتاج لفلتر متوفر في امازون يباع بشكل منفصل واخترت الفلتر الغير مُبيض جاي على لون اصفر ..
بالنسبة للقهوة، يفضل عمل القهوة باخذ حبات قهوة وطحنها طحن متوسط غير ناعم ، اشتريت كيس حبات القهوة من ستاربكس من التميمي واطحن كمية في طاحونة كهرباء صغيرة (بشتري الطاحونة اليدوية عشان تكتمل الصورة ههه)
طبعاً الطريقة بالتفصيل تلقونها في اليوتيوب .. وبسوي عنها فيديوهات اكيد :*

القهوة فيها جميلة .. تاخذ وقت .. بس سبب كافي في الاسترخاء وعمل كوب قهوة رايق ..
اذا كنت تحتاجين كوب قهوة سريع فماراح تناسبك .. المغزى منها عمل القهوة بهداوة و تأمل على الصبح .. :)

انا للي يعرفوني احب الاشياد الانتيك اللي لها تاريخ .. اقدرها بشكل .. وكنت حاطة في بالي لو ماعجبتني او طلع فيها اي عيب ، يكفي شكلها .. شكل الساعة الرملية مُلهم .. خلاص يكفي غزل و ننتقل للمنتج الثاني .. :)

رابط المنتج على موقع امازون ..



Organic Coconut Oil - 907g
 زيت جوز الهند العضوي  - ٩٠٧ غرام




هذا الزيت .. ادري زهقتكم فيه في الانستقرام .. بس من كثر ما اشوفه على البنترست واجمع وصفات عنه وهو مو عندي احس لو ماشريته بنهبل الا شوي .. كل ماسك - سكرب - كريم ، هو احد المكونات .. غير طبعاً انه امن في الاكل .. 
وقريت قريب عن حركة المضمضة بالزيت Oil Pulling وكيف تآثيره الصحي على الفم و الاسنان .. وطبعاً افضل شي نصحو فيه هو زيت جوز الهند العضوي .. 

جربته كبداية كزيت للشعر قبل الاستحمام .. خليته على شعري لمدة ساعتين و غسلته .. وانا حاطته توقعت بمشي وافحفح برائحة جوز الهند بس لا ابداً كان لطيف وريحته مو قوية .. وتاثيره بعد الغسل على شعري المنفوش كان جميل .. انا بالمناسبة ما ستخدم زيوت واشياء لشعري بس هذا بيغيرني :)

رابط المنتج على موقع امازون ..


Argan Oil for Hair and Skin by Poppy Austin® - 60ml
زيت الارقان للبشرة و الشعر من بوبي اوستن - ٦٠ مل




انا مثلكم .. سمعت عن فوائد زيت الارقان للبشرة و الشعر والأظافر .. وفايدته في اعطاء الترطيب و الحيوية ..
يحتوي زيت الارقان على كمية وافرة من ڤيتامين أي E ، ويحتوي على ٨٠٪ من الاحماض الدهنية الغير مُشبعة وهذا اللي يخليها افضل مرطب طبيعي للشعر والبشرة.

كنت بطلب زين ارقان ثاني منتشرة صورته في كل مكان اتوقع اسمه موروكون (الازرق) بس نبهوني البنات انه يحوي على سيلكون .. يعني ماراح استفيد منه كثير مثل ما آبي .. وايضاً ، فيه منتج اخر لزيت الارقان من جوسي مارن  Josie Maren .. بس في متجرهم على الامازون كانت اخر الريڤيوهات عنه انه مغشوش .. وسعره مو رخيص .. فاخترت المضمون والريڤيوهات عنه جيدة واللي هو من بوبي اوستن ..

رابط المنتج على موقع امازون ..



 Sweet Almond Oil - Avocado Oil
زيت اللوز الحلو - زيت الاڤوكادو



زيت اللوز الحلو: (٤٧٣ مل)
زيت اللوز الحلو من غير اضافات .. من غير رائحة تقريباً .. جربته لمرتين بعد الشاور لترطيب الجسم وجميل جداً..
تمتصه البشرة بسرعة وماياخذ وقت عكس البيبي اويل اللي كنت استخدمه في هذا الغرض وياخذ وقت ويترك اثر بسيط على الملابس .. هذا الزيت جميل .. لكل شي ، لترطيب البشرة و ماحول الاظافر لانه يحوي فيتامين إي وترطيب عالي جداً.
من فوائد زيت اللوز الحلو للبشرة و الشعر: (جمعتها من مواقع متفرقة)
- مناسب لجميع انواع البشرة خاصة الجافة و الحساسة ..
- يعمل الزيت على تحسين مظهر البشرة بتوحيد اللون وإعادة النضارة ..
- غني بفيتامينات أ و ب و ه التي تحارب ظهور التجاعيد المبكرة و تساعد على تجديد خلايا البشرة ..
- يساعد زيت اللوز الحلو على التخفيف من حساسية الجلد و الإلتهابات
- هو زيت ذو خصائص مضادة للبكتيريا و الميكروبات و هو بالتالي يطهر البشرة و يساعد على القضاء على البثور و حماية البشرة من الإلتهابات (بالنسبة لهذي النقطة انا مجربتها ، جت فترة سابقة وبشرة جسمي قالبة حساسة بزيادة واستخدامي لهالزيت في هالمرتين بس هداها و حسيت راحت الحساسية اللي كانت ظاهرة على شكل حبوب صغيرة كنها قرصات ناموس ههه .. بس الحمدلله كله راح)
- يدخل في تعمل ماسكات و منظفات للبشرة
- لاحتوائه على ڤيتامين إي E فهو يعمل على حل مشاكل الهالات السوداء حول العينين نتيجة كثرة الجلوس امام شاشة الكمبيوتر او التعب و الارهاق و ايضاً له دور في التقليل من مظاهر التجاعيد.

رابط المنتج على موقع امازون ..

زيت الاڤوكادو: (٤٧٣ مل)
زيت الاڤوكادو فوايدة لما بحثت عنها كانت كثيرة ، يحتوي على كمية وافرة من الڤيتامينات والمعادن الصحية مثل ڤيتامينات A - D - E و B1-B2 .. ومعادن مثل البوتاسيوم الضروري للحفاظ على نضارة البشرة .. وايضاً هو غني بـ البروتينات و الاحماض الدهنية مثل الأوميقا 3 .. مو بس فوايده للبشرة و الشعر، له استخدامات في الاكل ،، هذا الزيت اللي طلبته و السابق هو من الزيوت الامنة في الاكل ، ممكن تنضاف للسلطة .. له فوايد كثيرة صحية .. ابحثي عنها :)

رابط المنتج على موقع امازون ..
ـــــــــــــــــــــــــــــ


هذي كل الاشياء اللي طلبتها من موقع امازون ..

تقريباً كلفتني حول ٤٨٩ ريال .. بس الشحن الشحن الشحن .. لاني استخدمت الشوب اند شيب من ارامكس لانه الوحيد اللي لقيته يشحن سوايل كلفني الشحن بس ٣٥٠ ريال ..
طبعاً البنات ماقصرو وعلموني عن موقع آي هِرب iherb.com وكيف انه يوفر هذي الزيوت ويشحنها بشكل مباشر للسعودية بس انا كان سبب اختياري لآمازون هو الاختيارات المفتوحة والكِمكس والارقان والاحجام لهالزيوت ..

عاد كل هالطلبات كنت حاطتها ومصورتها في تويتر اني راح اطلبها ،، في لحظتها بصراحة ماتوقعت اني بتلَحلَح واطلب بس صارت هههه .. عاد من الحين محضرة اشياء بطلبها بس اجمعهم واطلبهم مرة وحده :)




ألقاكم في مواضيع قادمة ..
مع السلامة :*





ليصلكِ الجديد ؛ اشتركِ معنـا
Subscribe to our mailing list


33 comments

  1. تتهنين فيهم حبيبتي
    و لاتنسين الريفيو
    <3

    ReplyDelete
  2. بالعافية عليك
    ترى ورلدشيب يشحن سوايل طلبت زيت شعر وفاونديشن وشحنوه وحتى الفيتامينات

    ReplyDelete
    Replies
    1. تحمست للوورد شيب
      ان شاء الله في المرات الجايه اجربهم
      شكراً عالإفادة جميليتي هيون
      :*

      Delete
  3. الله تحمست اطلب خرابيط من النت

    السعاده لما توصل

    :B

    ReplyDelete
    Replies
    1. ايه والله تبرد القلب
      ههههه

      Delete
  4. تتهنبن فيهم حبيبتي هيونه
    الاغراض جدا جميله وعجبتني حيل حقت القهوه مع اني من راعية قهوه
    ننتظر الاشياء الجميله اللي راح تطلبينها

    ReplyDelete
    Replies
    1. ربي يسعدك دوم هيونه الحلوة
      :*

      Delete
  5. ماشاء الله تبارك الرحمان تخلصينهم بالعافيه يابعدي،،،،
    انا من اشد لمعجبين بزيت اللوز يالله قد ايش عجيب وجميل...
    لي ولآطفال ومثل ماقلتي امتصاصه رائع...

    تقبلي مروري العاجل
    نيرمين

    ReplyDelete
    Replies
    1. هلا والله نيرمين
      شكراً على مرورك العطر
      :*

      Delete
  6. تتهني فيهم يارب و ضروري اجربه واشوف ، شكرا عالبوست

    ReplyDelete
  7. جمال ماشالله تتهني فيهم ياعسل
    تحمست لهذا حق القهوة افكر اجيبه لاختي تعشق القهوه مره

    بالنسبة لشحن انصحك بوولدشيب
    ذكرت تجربتي معاهم ممتازين مره ادخلي مدونتي واقري عنها لو حابه ^^

    ReplyDelete
    Replies
    1. شكراً نورا
      شفت مدونتك جميلة وشباب شباب ماشاء الله
      وشكراًعلى الافادة بقراها في موضوعك زيادة
      :*

      Delete
    2. ربي يجزاك كل خير ويعطيك العافية
      صراحة اثق فيك ثقه عمياء اي شي تمدحيه اشتريه من غير تفكير ولله الحمد ما خذلتيني ولامرة تحمست للزيوت كثير خصوصا جوز الهند احتاجه لشعر بنتي . الحلو انها امنه وممكن استخدمها لبنتي كمان وفي الطبخ ضربنا كل العصافير بحجر واحد.
      يعطيك العافية ياعسل وفي انتظارك كل ثلاثاء

      Delete
    3. حبيبتي اميره كلامك اسعدني جداً ..
      ربي يرفع قدرك ومحلك في قلبي
      :*

      Delete
  8. هيا لما شفت ثمن الشحن انقهرت والله :"
    آيهرب جداً سهل ومايحتاج ارامكس و و و ، وعلى طول يوصل على بيتك
    شرحت طريقة الشراء منه بالتفصيل هنا :
    http://imawadda.blogspot.com/2014/02/blog-post.html

    كل مره اطلب طلبيات ضعف اللي طلبتيها والشحن مايكلف اكثر من 20$ و بـ 3 ايام بالكثير :"(
    تتهنين بمشترياتك يارب ، و اكيد الانسان حبه حبه من مواقفه يستفيد

    ReplyDelete
    Replies
    1. حبيبتي والله شكراً ،، شنسوي ابي اتعلم وما ابي اسآل اللي حولي واثقل بس على قولك حبه حبه
      ربي يسعدك حبيبتي ،راح احفظ تدوينتك عندي للطلب الجاي ..
      شكراً على لطفك وقلبك

      Delete
  9. يعطيك الف عافيه , البوست اللي كنت استناه لأن من فتره حاطه زيت جوز الهند بقائمة الاشياء الضروريه واللي ابي اجربها بس دخلت وقريت كلامك زادت القائمه بإذن الله بطلب زيت اللوز الحلو وزيت الافوكادو
    شكراً جداً

    ReplyDelete
    Replies
    1. الشكر لك يانوه على مرورك العَطر
      :)

      Delete
  10. مشتريات حلوه
    مبدعه كالعاده
    سلمت يداك

    ReplyDelete
  11. حلووووو, عجبني و عجبني تصويرش! ما شاْ الله
    <3

    ReplyDelete
  12. So sorry to post this here, but I cannot find your email.
    Asalam Alaykum Wafa, We are a new network for women bloggers in the Kingdom. We will be opening our site this week and we have big plans for the bloggers. We are going through and asking our favorite bloggers 3 questions to post on the site. Each blogger will get 3 different questions :)
    Please write in English and Arabic below too.. Thank you and cannot wait to get to know you and your blog more.
    -sfb

    Your question is tell us 3 of your favorite places to shop online and why.
    You can send a picture to go with it if you want. It should be 735px wide. If not we can provide that for the post . Please email it to us asap.. Thanks and love the blog..

    ReplyDelete
    Replies
    1. Hello ,, mu Name is Haya :)
      Thank you for reminding me of putting my email in the blog ..

      Delete
  13. اول شيء تتهني فيها مقاضي جدا جدا جميله وذوق مثلك
    ثاني شي ترا الورد شيب يشحن سوائل دايم اطلب سواىل وتوصل لي طلبت حامي شعر ومثبت ميك اب وتمام
    بس هم يقصدون في السوائل العطورات والمناكي واي سائل قابل للاحتراق
    افتحي لك بالورد شيب واستمتعي بالتجميع او ماي يو اس كثير يمدحونه بعد
    وعقبال ما تورينا مقاضي ثانيه من الاون لاين

    ReplyDelete
  14. This comment has been removed by the author.

    ReplyDelete
  15. خيارات حلوه .. تتهني فيهم يا رب

    انا مثلك بداية تجاربي مع التسوق الخيار الوحيد والمتنوع كان أمازون
    ولكن بعد عدة تجارب شراء ومتابعة الرفيوز من المنتجات صرت أهتم بموضوع أختيار المنتجات أكثر

    أحلى مافي أمازون أنه متنوع بشكل كبير
    ولكن الأهم من هذا المنتج اللي نختاريه يكون أصلي ومضمون
    بالإضافه إلى عدم ضمان المنتج هو تكلفته الأعلى من المواقع الثانيه غير الشحن ! وسعر صرف العمله كمان

    لذلك صرت أبحث أكثر وأهتم بالشركات المنتجه ومواقع البيع في حال كان موقع الشركه مايتيح هالشي
    او خياراته ماتناسبني


    iherb خيار حلو ومضمون ومعروف بالمنتجات الطبيعيه ولي أكثر من تجربه معاه وخدمتهم سريعه
    بس يعيبه قلة الخيارات / الشركات

    اما مع الشحن تجاربي مع الوورلد شيب وجربت شحن سوائل معاهم عن طريق أرامكس ووصلتني سالمه


    تحياتي ^_^

    ReplyDelete
  16. can you please review the Chemex ?

    ReplyDelete
  17. حلووه أغراضك تتهنين
    حابه اسالك صدق لو طلبت ماتنشحن
    الاغراض سوا الا لو من نفس البائع ؟

    ReplyDelete
  18. حبيت التدوينة بالفعل من زمان و انا خاطري بزيت الافوكادو
    و اتوفع انه مو موجود بالعالم العربي ابد
    ياليت تصنفين تدوينه في كيفية الطلب عبر النت
    و شكرا يا جميله

    ReplyDelete
  19. هالتدوينه جميله

    يبغى لها جالسه هيوني

    راجعه بأذن الله

    ReplyDelete