بعض أشياء في رمضان | Few things in Ramadan

بسم الله الرحمن الرحيم

رمضان ..

شهر العبادة والقرب من الله اكثر .. شهر اشعر فيه بنفسي وذاتي وافكاري .. شهر التفكر، بكل ما حولي ..

اعتبر هالشهر راحة نفسية بالنسبة لي .. سبحان الله ..

مثلي .. كما الغالبية .. تمنياتي في هذا الشهر ودعواتي .. اجمعها في سجادة .. قراءة قران .. تفكر ..

ابتعاد عن ملهيات بلا قيمة ..

ماحبيت يمر شهر الخير بدون ما اترك بصمة له في مدونتي .. يوم من رمضان هو موضوعي اليوم ..

في بداية الشهر كنت امر بوعكة صحية حرمتني من الفرح بقدوم الشهر حتى في الايام الاولى ماحسيتها من رمضان ولا استشعرته .. ضعف الانسان ياهو ضعف .. بس الحمدلله على الصحة ..

في يوم ..

في الساعة الواحدة بعد الظهر اقوم واصلي .. لاني مانام الا بعد صلاة الفجر فاعتبره معقول ولاتفوتني الصلوات كذا ..

ومع فطور صغيراتي واجهز مكونات الفطور لليوم وارتبها .. 

في البداية عشان اضمن لنفسي ساعة رواق قبل الدخول للمطبخ لتحضير الفطور ، اجهز ورشة عمل لـ بناتي .. من تلوين واعمال المعجون وكذا .. منها يستفيدون وينشغلون بشي مفيد حتى فيما بينهم الثنتين من توزيع المهام وحوارات تنمي افكارهم وابداعاتهم وتزيد ترابطهم كأخوات .. كما أتمنى وكل أُم ..

بعد ماضمنت انشغال كتاكيتي بالمفيد .. يكون وقت لقراءة جزء من القرآن بحيث اقرا كل يوم جزء .. 

الحمدلله عادة ماقطعتها من سنين .. 

لا بدا وقت الطبخ يكون على الساعة ٤ لازم ادخل المطبخ واشغل التلفزيون على برامج مفيدة ،، ماحب اشتغل عالهدوء و المسلسلات ماني حولها ولا هي هوايتي أبداً .. 

من البرامج اللي احرص اتابعها هي البرامج ذات الطابع التطويري للنفس والحياة و فيها فايدة للشخص نفسه لمعرفة ذاته وتعطيه مهارات في كيفية ادارة مشاعره والتحكم في ردات فعله ..

وسويت الفطور وجا وقت الإفطار .. وربي يتقبل صيامنا .. و طبعاً مافيه أحلى من القهوة بعد الفطور .. رد اعتبار .. 

وبعدها يومي مثل ماهو من قبل مثل ايام غيري .. اغلبها في البيت لاني ماحب اطلع في رمضان خاصة ان مافيه الا السوق وهالمكان اعتبره مزعج وياخذ من نفسي ووقتي وماأخلي الطلعة فيه الا مضطرة عشان اجيب اغراض ناقصة .. واكون انا اصلا مخلصة من اغراض العيد ومستلزماته من قبل رمضان بوقت طويل بحيث اني اذا شفت شي عجبني لي وللبنات اخذه لاني عارفة لا جا وقت احتاج فيه ماراح القى شي ..

جمعات الاهل وفطور أمي هو اللي افقده في هالشهر .. بس ان شاء الله الحق عليهم في اواخر رمضان قبل العيد لا سافرت للدمام ..

قبل آذان الفجر .. سحوري يكون خفيف .. عندنا السحور مو وجبة اساسية .. الفطور والباقي منه على مدار بقية اليوم يكفي .. بس في اليوم اللي احس فيه كني جعت مالي الا كاس حليب وتصبيرة ..

أشياء في رمضان ..

* الحمدلله ان ربي كتبلي عمرة وان شاء الله يقبلها .. بصراحة ماهتميت لكل النداءات والمسجات اللي تجيني عالجوال بطلب تأجيل العمرة .. احس هالشي لو حصل لأي احد ماراح يأجله .. انا كذا ،، لاني ما أضمن عمري ولا أدري وين بكون رمضان الجاي .. ودامي الحين في الطايف فلازم اروح، اخاف يجي وقت اطلع من هنا واتحسف اني قدرت وما رحت ..

* غالباً ماحب اكل برا البيت .. فكيف بوقت مثل هالشهر .. رحت يومين لجدة تغيير جو .. احب جدة واحب جوها في رمضان .. بس يومين تكفي .. الفطور في رمضان هو فطور البيت ونَفَس البيت .. لو من احلى المطاعم ..

يوم في رمضان .. كتبتها لاني احتجت اكتب .. اذا انقطعت عن المدونة حسيت الاشياء تتراكم داخلي ..

ومدونتي اعتبرها صديقتي اللي اكلمها واشوف نفسي فيها ..

احاول هنا اكون عفوية قد ما أقدر .. احب العفوية بس تهرب مني أوقات .. الحياة فيها أحلى ..

ربي يبارك لي ولكم بقية رمضان .. ويعيده علينا اعوام عديدة مع من نحب ..

جميع مواضيع سلسلة (بعض أشياء)

ألقاكم في مواضيع قادمة :)

مع السلامة :*

ليصلكِ الجديد ؛ اشتركِ معنـا
Subscribe to our mailing list