مدونة هيا أدون ، اكتب و اُصور

مشترياتي من سيفورا *الخبر و دبي* وشويات

بسم الله الرحمن الرحيم



مشترياتي على قسمين:


  • سيفورا الخبر (مجمع الراشد):

1- The Porefessional - benefit



منتج غني عن التعريف، بورفيشنال من بينيفت للتقليل من مشكلة ظهور المسامات في الوجه ويستخدم قبل الاساس والبودرة بالطبطبة فقط وليس المسح ، وممكن استخدامه بعد تطبيقك للمكياج بنفس الطريقة على الأماكن المحتاجة (الطريقة على العلبة).

المنتج عبارة عن بلسم شفاف تقريباً ينعم ويعطي ملمس حريري ويملي المسامات ويخفف من مشكلة وضوحها.
المنتج بنفسه ماوعد بتغطية كاملة للمسامات (مصداقية) وعلى العلبة موضح انه للتقليل من شكل المسامات على الوجه. احترم هالشي من ماركة تجميلية. 

تجربتي: كانت عندي هذي المشكلة بس كنت اتجاهلها, المسام توضح بزيادة بعد ساعة من تطبيق الاساس والمكياج ككل. فعملت مقارنة وصورت نفسي من غير استخدام المنتج بمكياج كامل وصورة أخرى باستخدام بورفيشنال وملاحظات من اخواتي. 
المنتج نجح في تحقيق اللي وعد فيه (التقليل بشكل واضح جداً وليس تغطية كاملة). وبالتأكيد راح يكون من الأشياء الأساسية في روتين المكياج. لمناسبة اوغيرها

السعر: 132 ريال واتوقع في وجوه بـِ 145 ريال.

2- Sephora - All over shadow brush large (21)



فرشة من سيفورا لكامل جفن العين. تغطيه بنفس المساحة. مناسبة جداً لاستخدام اللون الواحد من الظلال. سعرها 42 ريال. 

  • سيفورا دبي (فروع متعددة)
    • سيفورا ديرة سيتي سنتر - سيفورا دبي مول:

1- Too Faced BB cream (Vanila glow)


القصة: هذا البيبي كريم رحت وجيت عليه اكثر من مرة, في اول فرع البائعة علمتني عليه بس بدرجه الكراميل قلو مع اني ماكنت مقتنعه ابدً لاني عارفة ومتأكدة انها اغمق مني وباخذ درجة تان لي (هي اوكرانية او شي كذا) بالأخير طلع المنتج من هذي الدرجة خالص ولا قدرت تعطيني بديل لان ماتقدر تغيير بكلامها ولا حبيت اخذ شي ثاني.
في فرع اخر البائعة عطتني نفس درجتي (الفانيلا قلو) وطبقته على باطن الذراع (الأنسب) وناسبني جداً. 
اللي كان مخليني مترددة عليه سعره، ولا ابي اشتري شي ولا استخدمه مع وجدو بدائل مو شرط بنفس الجودة بس من الماركات الرخيصة زي بي بي كريم غارنييه اللي شريته عشان ماأشتري هذا. 

رأيي في المنتج: جميل جميل .. يعطي اضاءة من غير مبالغة ولا قليتر مزعج. توزيعه احلى واسهل بكثير من بي بي كريم غارنيه وتغطية متوسطة لكن افضل من غارنييه ايضاً. بشرتي مختلطة والتي زون دهني .. ناسبني ولا فيه مشكلة. 

فيه حماية من الشمس 20 . وسعره 172 درهم.


 2- Urban Decay - Eyeshadow Primer and 24/7 Concealer

و ..

تكلمت عنهم في تدوينتي السابقة كونسيلر وبرايمر شادو من اوربن ديكاي  

ومن نفس الفرع عطوني عينة لحمرة على مشمشي من بينيفت ..


  • أماكن متفرقة (دبي):~
    • من كارفور: 

1- Garnier BB cream (Light/Clair - Medium)


بي بي كريم من غارنييه اللي قلت ممكن استخدمه قبل لا أشتري شي غالي واعرف وش هي شروطي. اخذت درجتين فاتحة ومتوسطة. ممكن ادمجهم مع بعض او استخدمهم بنفس الوقت (كونتورينق). مع استخدامي الدرجة الفاتحة مناسبة لدرجتي والغامقة مغمقتني درجة (تان). 

المنتج حلو وماعليه (للبشرة الخالية من العيوب) ويمكن تستخدمينه يومياً. بس التغطية مو متوسطة، التغطية قليلة جداً (مافيه تغطية تقريباً بس اعطاء لون للوجه وحماية من الشمس).  استخدمه في البيت اوقات لاعطاء الوجه لون او قلو خفيف. 

السعر 27 درهم للحبة.


 2- Sally Hansen - Nails & Cuticles Hand creme + Firming Hand Creme


كريمين من سالي هانسن (لها سمعة في منتجات العناية باليدين والاقدام) عجبني احتوائها على الشيا وتخصيصها لشيئ من الترطيب للأظافر والكيوتيكل (ماحول الظفر) .. في تلك الفترة كانت ايديني تمر بحالة جفاف وعدم اهتمام مني (لظروف الانشغال والسفر) 
استخدمته وعطاني ترطيب جميل بس للي مايحبون الرائحة القوية (برتقال وشيا) مايناسبهم. 

السعر للحبة 21 درهم.

    • من الصيدلية:
1- Vitamin E-OIL


كنت ادوره من زمان في السعودية ولا لقيته حتى في بوتس. وبالصدفة لقيته في صيدلية في مول. 
فوايد زيت الفيتامين إي كثيرة لبشرة الوجه والاظافر. وصرت استخدمها في روتيني اليومي (تكلمت عنه في تحديثي لروتين العناية  اليومي). 

السعر 45 درهم.

2- Hydrogen Peroxide


هيدروجين بيروكسايد نفس قصة الفيتامين مالقيته في الصيدليات اللي مريتها في السعودية ولقيتها فـ دبي.  قريت عنه كثير واستخداماته اكثر ومكن استخدامه كمحلول مخفف بالماء كمضمضة لتبييض الاسنان. 

 *اي منتجات طبية لازم تعملي عنها بحث وتشوفين الاعراض الجانبية ومضارها قبل منافعها. حرصك على نفسك واهتمامك بصحتك مسؤليتك وهذا اهم من اي نتايج وقتيه ويمكن تكون مضرة.*

سعره 13 درهم.


    • من السوق الحرة (مطار دبي):

1- Estee Lauder - Perfectly Clean Cleanser


هذا الغسول من ايستي لودر مايحتاج اقول كمية الحب اللي بيني وبينه (تدوينة عنه هنا) وكنت اشتريه من اي محل تجميل فوق الـ 200 ريال. في السوق الحرة لقيته بـِ 140 واخذت واحد وعند المحاسبة لقيته ب 103 دراهم وطبعاً ماخليته بخاطري ونقزت اخذتلي ثاني 


2- Braun - Satin Hair 3



صارلي فترة وانا ادور مجفف للشعر بحرارة متوسطة عشان ماينشف لي شعري ويخربه واستخدمه في الايام العادية. مرت علي ايام جنون كنت بكل شاور انشف شعري بالاستشوار الاحمر (من نزيه). وبما اني بديت علاقة جديدة وصحية مع تاج راسي فقررت اخليه على طبيعته او انشفه بحرارة اقرب للهواء الدافي. وهذا حرارته 400 واط. 
في محلات التجميل كانت اسعارهم ماتقل عن 290 وماعجبني ومن ماركات اول مرة اسمع فيها. ويوم شفته في السوق الحرة فوق انها من براون (احب هالشركة) سعره بـ 107 دراهم. يابلاش 

وبكذا خلصت مشترياتي التجميلية ..  
وشكراً على وقتكم في قرائة هالتدوينة. شوي دسمة بس ماحبيت اقسمها لاني من زمان وانا أأجلها. وحطيتكم مكاني لاني احب اتفرج على مشتريات الناس المصورة 




ألقاكم في مواضيع قادمة :)

مع السلامة :*




ليصلكِ الجديد ؛ اشتركِ معنـا
Subscribe to our mailing list





22 comments

  1. روعه البوست ومشترياتك جميله تتهني فيهم..حمستيني على غسول استيلودر أن شا الله اجربه قريب
    عجبني تصويرك مرره مبدعه

    يعطيك العافية

    ReplyDelete
    Replies
    1. حبيبتي شكراً على كلامك .. فرحتيني ..
      واستيلودر اذا بشرتك مثلي خذيه وانتي مغمضه
      :D

      دمتِ بـِ هنااء ..

      Delete
  2. تتهنين بمشترياتك ياجميلة كريم سالي هانسن فيرمينج مره بطل غير لي يدي في فتره بسيطة بس ريحته مثل ماقلتي تضايق شوي وللأسف مو موجود هنا
    موفقه لكل خير ♥

    ReplyDelete
    Replies
    1. بالضبط الكريم حلو بس ريحته قوية شوي .. زي البلسم ملمسه
      شكراً حبيبتي ..

      دمتِ نقية

      Delete
  3. يَّ جمالو يَّ جمالو وش هالاشياء الجميله حبيت مشتريتك من قلب
    بس كان رحتي سيفورا دبي ترا احلى وربي الباكيج تبع منتجاتنا غير ترا عنهم هم احلى :(

    ReplyDelete
    Replies
    1. ايه رحت لسيفورا دبي .. نص هنا ونص هناك ههههه
      غير الباكيج عندهم ماركات لسه موعندنا!! الله يعلم السبب
      |:

      شكراً ياطيبة

      Delete
  4. حلوييـن تخلصينهم بالعافية يا قلبي


    http://elegantelady.blogspot.com/

    ReplyDelete
  5. المنتج Hydrogen Peroxide
    هذا انا ألاقيه عن العطار ويسمونها شيقور و تستخدم مع الحنا علشان تحصلين على لون بني
    ومدونتك رائعه

    ReplyDelete
    Replies
    1. شكراً حبيبتي من ذوقك

      والهيدروجين بيروكسايد طبي ماينباع عند العطارين يمكن قصدك حق المشقر والصبغات !! بس والله ماعندي خبر اخاف افتي بهالاشياء ههههه

      تسلمين عالمرور وتعليقك الجميل ❤

      Delete
    2. ماأدري يا أختي
      بس خفت عليك
      سوي بحث بالنت شيقور
      ويطلع لك صورة العلبة واستخدامها
      ربي يحفظك

      Delete
    3. حبيبتي تسلمين والله
      سويت بحث وشفت اللي تقولين ): ماكنت ادري انه ينباع عند العطارين
      بس على العلبة مكتوب امكانية استخدامه كمضمضة بتخفيفه مع الماء

      مانحرم منك ومن حرصك

      Delete
  6. بشرتي مختلطه مايله للدهنيه خاصه خشمي مررره دهني بيناسب لي الغسول؟ وايش فوائده يعني وش خلاك تحبينه هالحب ههه والهيدروجين بروكسايد هو بس للمضمضه مو لشي ثاني !

    ReplyDelete
    Replies
    1. مثل بشرتي .. مدري والله ليه هالحب بس احس حلو وريحته نظيفة وينشف بشرتي وتكلمت عنه بعد في بوست قبل عن هالغسول هناا
      http://www.le-haya.com/2012/08/estee-lauder-cleanser-daywear-lotion.html

      والهيدروجين بيروكسايد انا اقرا عنه كثير عن البلوقرز الاجانب واليوتيبات انه شي لتبييض الاسنان .. وممكن تحطين منه شوي مع بيكينغ صودا وهذي طريقة للتبيض وتفرشين فيها اسنانك بس .. الطريقة لها اثار جانبية منها حساسية الاسنان ..

      سوي بحث وبتلقين في المواقع الاجنبية اشكثر

      :x

      Delete
  7. طيب حبيبتي انتي شفتي نتيجة استخدامك لهيدروجين بروكسايد تحسين بيض لك اسنانك وبدون اثار جانبية !
    معليش ازعجتك ياقمر
    بس مااسوي بحث لانو ماعرف انقلش :(
    يسعدك ربي ❤️❤️

    ReplyDelete
    Replies
    1. الا اكيد فيه اثار جانبية، منها حساسية الاسنان. اسنانك بتصير حساسة واذا كانت حساسة اصلاً بتزيد الحساسية، يعني حطي في بالك هالشي وبعد انه يضعف الطبقة الخارجية للاسنان عشان البيكينق صودا لو استخدمتيه معه.
      وكمان من تأثير البيروكسايد انه هو اصلا مبيّض فلا يطول على اسنانك عشان مايحرق. يعني لو مرة استخدمتيه وزودتي بكمية كبيرة عشان تبييض اكثر ماراح تستفيدين وراح تتأثر اللثة بيصير فيها زي حرق اذا فهمتي علي وبيستمر لثاني يوم الين يروح.
      استخدمته مرتين وفتح شوي بس مايعطي ذاك البياض اللي على ازرق لاني ماستمريت والمفروض يكون مرة بالكثير في الاسبوع وبعدين لماتوصلين للدرجة اللي تبين تصير مرة بالشهر. مع ان البعض يقول تقدرون استخدامه يومياً بس على اللي شفته مايتفع ابداً. اسبوعي وكفاية. :)

      Delete
  8. I've a verrrry oily skin, and I want to ask u if the BB cream from garnier is suitable for my skin or not ?!

    Thank u

    ReplyDelete
    Replies
    1. Garnier bb cream is not for oily skin. I have a combination skin and its not that perfect for me. I got shiny, greasy and oily look for all my face when i use it, so i apply a matte powder as a mattifier. :)

      Delete
  9. بلوقك ممتع

    ReplyDelete
  10. hi is urban decay available in khobar?

    ReplyDelete